ރައްޔިތުންގެ މަޖިލީހަށް ކުރިމަތިލައްވާ ފަރާތްތަކުގެތެރެއިން އެންމެ އާދަޔާއި ޚިލާފް ވާހަކައެއް ދައްކަވާ ބޭފުޅަކީ ނ އަތޮޅު ހޮޅުދޫ ދާއިރާގެ ޕީއެންސީގެ ޓިކެޓަށް ކުރިމަތިލައްވައިގެން ކެމްޕެއިން ކުރައްވަމުންގެންދަވާ އަލް އުސްތާޒު މުޙައްމަދު ތާހާއެވެ. އޭނާ ވާދަ ކުރައްވާ ދާއިރާގައި ހިމެނޭ ހޮޅުދޫއާއި މިލަދޫއާއި މަގޫދޫ ރައްޔިތުން ބޭނުންވާ ކަންކަން އޭނާއަށް އެނގިވަޑައިގަންނަވައެވެ. އެތިން ރަށަށް ދަތުރުކޮށް ދޮރުންދޮރަށް ހިންގަވައިގެން މީހުން އެދިފައިހުރި ކަންކަން ސަރުކާރުތެރެއިން ހަމަޖެހިގެންދާނެ ކަމާމެދު އޭނާގެ އެއްވެސް ޝައްކެއް ނެތެވެ. އޭނާ ހޮޅުދޫ ދާއިރާއަށް ނުކުމެވަޑައިގަންނަވަނީ އެކަންކަން ފަހިކޮށްދެއްވާނެ ކަމުގެ ޔަގީންކަން ސަރުކާރުގެ އެންމެ މަތިން ލިބިވަޑައިގެންނެވެ. ތާހާގެ އަޅައިގަންނަ ވަޢުދަކީ މިއެއް ނޫނެވެ. ރާއްޖޭގައި އެބައެއްގެ ނުރައްކާތެރިކަން އިންތިހާއަށް ބޮޑުވެފައިވާ ސިހުރުވެރިންނަށް އޭނާ ދެއްވަމުންގެންދަވާ އިންޒާރާހެދިއެވެ. އޭނާގެ ކެމްޕެއިން ވައުދަކީ ރައްޔިތުންގެ މަޖިލީހުގެތެރެއަށް ވަދެވިއްޖެނަމަ ސިހުރުވެރިންގެ ފައިގައި ގާނޫނީ ކަސްތަޅު އަޅުވާނެ ގާނޫނެއް ވުޖޫދަށް ގެނައުމެވެ.

މިވައުދު އާދަޔާއި ޚިލާފް ބޮޑުވައުދަކަށްވަނީ މީގެ ޒަމާންތަކެއް ކުރިން ދިވެހިރާއްޖޭގެ ފުރަތަމަ ޖުމްހޫރިއްޔާގެ ރައީސް ސުމުއްވުލް އަމީރު މުޙައްމަދު އަމީން އަވަހާރަކޮށްލަން ހުވަދުއަތޮޅު ބަޔަކު ސިހުރު ހަދައިގެން އަދި އޭގެ ކުރިން އެއަތޮޅުގެ އަތޮޅުވެރިޔާ ވީރު އަލިދީދީއަށް ސިހުރު ހަދައިގެން މަރައިލުމާއި އަމީން ދީދީއަށް ހެދި ސިހުރުގައި އެމަނިކުފާނު މަރުތަންމައްތީގައި އޮންނަވަނިކޮށް މިސހުރު ފަޅާއަރައިގެން މިމީހުން މާލެގެނެސް ޝަރީއަށް ހިންގައި ބަޑިޖަހައި މެރިފަހުން ސިހުރުވެރިން ހިންގާ ޖަރީމާ ބެލޭނެ ގޮތެއް ރާއްޖޭގައި ނެތި މީހުން ގޮތް ހުސްވެފައިވާ ދަނޑިވަޅެއްގައި މިކަމާއިގެން ނުކުންނެވުމުންނެވެ.

ދިވެހިރާއްޖޭގައި ސިހުރުގެ ބަލާވެރިކަން ނުޖެހޭ އާއިލާއެއް މަދުވާނެއެވެ. ޚާއްސަކޮށް މިހާރު ޒުވާން އަންހެން ކުދިން ކުއްލިގޮތަކަށް ސައިކޯވެފައި ނަފްސާނީ ބަލިގަނޑެއްގެތެރެއަށް ވެށްޓެމުންދާ ދިއުމާއި ދެމަފިރިންގެ ދޭތެރެއަށް ވަދެގަތުމަށާއި މުދަލުގެ ދަހިވެތިކަމުގައި ސިހުރުހަދައި މޮޔަކޮށްގެން މީހުން މަރަމުންދިއުން ފާހަގަ ކުރެވޭ މިންވަރަށް އިތުރުވެފައި ވެއެވެ. ސިހުރުގެ ސުންޕާކަން ޖެހިގެން ދިވެހިރާއްޖޭގައި ރަނގަޅު ނުވެގެން ގޮތް ހުސްވެގެން އިންޑިއާއާއި ސިރީލަންކާގެ ހާމުދުރުން ކައިރިއަށްވެސް ދިވެހިން މިހާރު ދާކަމަށް ވެއެވެ.

އާއިލާއަށް މީހަކު ސިހުރު ހަދާކަން ސާފުކޮށް އެނގުނަސް މިކަންދިމާވާ އާއިލާގެ މީހުންނަށް އިންސާފު ލިބޭނެ ގޮތެއް ނޯވެއެވެ. އެކަކަށް ޖެހިއްޖެއްޔާ ގައިން ގަޔަށް އަރާ ބައްޔެއްހެން މުޅި އާއިލާގައި ސިހުރުގެ ކަތުރުފަނި އެބައަޅައެވެ. ގާނޫނީ އޮނިގަނޑެއް ނެތުމުން ފުލުހުންނަށް ތަހްގީގު ހިންގޭނެ ގޮތެއް ނޯވެއެވެ. ރާއްޖޭގައި މީގެކުރިން ގާނޫން ހަދާ މަޖިލީހުގެ އެއްވެސް މެންބަރަކަށް އެވާހަކަ ދައްކާކަށް ނުކެރެއެވެ. ފުލުހުންނަކަށްވެސް ނުކެރެއެވެ. ތަހްގީގު ކުރަންދާ ފުލުހުންނަށް ސިހުރުހަދާފާނެތީ އެމީހުންވެސް ގަންނަނީ އަމަށަކު ބިރެއް ނޫނެވެ.

މިފަހަރު ތާހާ މި ނުކުންނަވަނީ މިބިރުވެރިކަމުން މީހުން ނެރެދިނުމަށެވެ. އޭނާއަކީ ޝަރުއީ ރުގުޔާ ދިވެހިރާއްޖޭގައި އެންމެ ރަނގަޅަށް ދަސްކުރައްވައި މިހާރުވެސް ގިނަ އަދަދެއްގެ ބަޔަކަށް ފަރުވާ ދެއްވަމުން ގެންދަވާ ބޭފުޅެކެވެ. ސިހުރުވެރިންގެ ސިހުރު ބާތިލް ކުރުމަށް ބޭނުންކުރާ ޝަރުއީ ރުގުޔާގެ އެންމެ ފުންނާބު އުސް އުސްތާޒެވެ. ސިހުރުވެރިއާގެ ގައިގައި ޖަހަންވީ ކޮންތާކުކަން އެންމެ ބޮޑަށް އެނގިވަޑައިގަންނަވަނީވެސް އޭނާއަށެވެ. އެހެންވީމާ ކޮންމެހެންވެސް މިފަދަ ބޭފުޅަކު މަޖިލީހަށް ވަދެ ސިހުރުވެރިންނާ ދެކޮޅަށް ހަނގުރާމަ އިއުލާން ކުރަން އެބަޖެހެއެވެ. މިކަންކުރުމުގެ ބާރު މިފަހަރު މި ލިބުނީ ހޮޅުދޫ ދާއިރާއަށް ނިސްބަތްވާ ތިން ރަށުގެ ރައްޔިތުންނަށެވެ. މިއީ މިތިން ރަށުގެ ރައްޔިތުން އެކަތިގަނޑަކަށްވެގެން ތެދުވާންވީ ވަގުތެވެ. ރައްޔިތުން ތަމްސީލު ކުރާނެ ޝަރުއީ ޢިލްމުގެ ރޮނގުން ފުންނާބު އުސް އިލްމުވެރި ތެދުވެރި ހިތްވަރުގަދަ ޒުވާނަކު މިފަހަރު ހޮޅުދޫ ދާއިރާއަށް ނެރެވެން އެބައޮތެވެ. އެކެންޑިޑޭޓަކީ ތޯހާ ކަމާމެދު އެއްވެސް ޝައްކެއް ނެތެވެ. އަނެއްކޮޅުން ހޮޅުދޫ ދާއިރާގެ ރައްޔިތުންގެ އެދުންތައް ސަރުކާރުތެރެއިން އެންމެ ފަސޭހަކަމާއެކު ކުރެވޭނެ މީހަކަށް ވޯޓްދޭނަމަވެސް އޭނާއަށްވުރެ ވަކި އިތުބާރު ކުރެވޭނެ ފަރާތެއް އެބަހުރިތޯއެވެ.