ރާއްޖޭގެ ބާ ކައުންސިލުގެ އެގްޒެކްޓިވް ކޮމިޓީގެ މެމްބަރު ކަމަށް އައިޝަތު ޝީނާ އިންތިހާބުކޮށްފިއެވެ.
ބާ ކައުންސިލްގެ އެގްޒެކެޓިވް ކޮމެޓީއަށް ބޭފުޅަކު އައްޔަން ކުރުމަށް ބޭއްވި ބައި-އިލެކްޝަނަށް ކުރިމަތިލާން ހުޅުވާލި ފުރުސަތުގައި އެ މަގާމަށް ކުރިމަތިލެއްވީ ވެސް ޝީނާ އެކަންޏެވެ.
އެ އިންތިހާބުގައި ވޯޓުދިން 36 މީހުންގެ ތެރެއިން އެ މަގާމަށް ޝީނާ އިންތިހާބު ކުރަން ފެންނަ ކަމަށް 24 މީހަކު ވޯޓު ދީފައިވެއެވެ. ޖުމުލަ 71 މީހުން ވޯޓުލުމަށް ރެޖިސްޓްރީވެފައިވާ މި އިންތިހާބުގައި 35 މީހުން ވޯޓު ލާފައެއް ނުވެއެވެ.
މިއަދު ބާކައުންސިލުން ބެއްވި މި ބައި އިލެކްޝަނަކީ އެ ކައުންސިލްގެ އެގްޒެކްޓިވް ކޮމިޓީގެ މެމްބަރުކަމުގެ މަގާމުގައި ހުންނެވި އަލީ އަބްދުއްލަތީފް އެ މަޤާމުން އިސްތިއުފާ ދެއްވުމާއި ގުޅިގެން ގާނޫނީ ފަންނުގެ ޤާނޫނުގެ ދަށުން ބާ ކައުންސިލުން އިންތިޒާމުކޮށްގެން ބޭއްވި ވޯޓެކެވެ.
މިއަދު ބާ ކައުންސިލްގެ އެގްޒެކްޓިވް ކޮމިޓީއަށް އިންތިހާބުވެ ވަޑައިގެންނެވި ޝީނާއަކީ ގާނޫނީ ދާއިރާއިން ސްރީލަންކާގެ ޔުނިވާސިޓީ އޮފް ލަންޑަން އިންޓަނޭޝަނަލްއިން ބެޗްލާސް ހާސިލު ކުރައްވާފައިވާ ފަރާތެކެވެ. އޭނާ ވަނީ ކުރީގެ ސަރުކާރުގައި ރައީސް އޮފީހުގެ ލީގަލް ކައުންސިލް އަންޑަ ސެކްރެޓަރީކަން ވެސް ކުރައްވައިފައެވެ.
ބާ ކައުންސިލަކީ ގާނޫނީ ފަންނުގެ ގާނޫނުގެ ދަށުން ވަކީލުންގެ އެންމެހާ ކަންކަން ބެލެހެއްޓުމަށް އުފައްދާފާއިވާ ކައުންސިލެކެވެ.
Advertisement
This content is created and paid for by advertisers and does not involve Voice Journalists
