އަމީނީމަގުގައި އެއްކޮޅުން އަނެއް ކޮޅަށް ބަލައި، މަގުގައި ހުރި މައްސަލަތައް ރަނގަޅު ކުރަމުންދާ ކަމަށް އިމާރާތްކުރުމާއި ބިނާރާ ބެހޭ ވަޒީރު އަބްދުالله މުއްޠަލިބު ވިދާޅުވެއްޖެއެވެ. 

ކުރީ ސަރުކާރުން އަމީނީ މަގުގައި ތާރު އަޅާފައިވާ ސަރަހައްދުގެ ބައެއް ތަންތަނުން ތާރުގަނޑު ނައްޓައިގެން ގޮސްފައިވާ މަންޒަރު ފެންނަ ވީޑިއޯއެއް މީސްމީޑިއާގައި ހިއްސާކޮށް، އެއީ މިފަހުން ތާރު އެޅިތަން ކަމަށް ދޭހަވާ ގޮތަށް ދެއްކި ވާހަކައަށް ރައްދު ދެއްވައި ވަޒީރު "އެކްސް" ގައި ކުރެއްވި ޕޯސްޓެއްގައި ވިދާޅުވީ އަމީނީ މަގު އިއްޒުންދީން މަގާ ހަމައަށް ކޮށްފައިވާ މަސައްކަތަކީ 17 ނޮވެންބަރުގެ ކުރިން ކޮށް ނިންމާފައިވާ މަސައްކަތެއް ކަމަށެވެ.

އަދި ރޯޑް ޑިވަލޮޕްމަންޓް ކޯޕަރޭޝަން، އާރްޑީސީން މިހާރު ދަނީ އަމީނީ މަގުގެ އެއްކޮޅުން އަނެއްކޮޅަށް ހުރި މައްސަލަތައް ބަލައި ރަނގަޅުކުރުމުގެ މަސައްކަތް ކުރަމުން ކަމަށް ވެސް ވަޒީރު މުއްޠަލިބު ވިދާޅުވި އެވެ. 

Advertisement

އަމީނީމަގު ޒަމާނީ ފެންވަރަށް ތަރައްގީކުރުމުގެ ޢަމަލީ މަސައްކަތް ފަށާފައިވަނީ 2022 ވަނަ އަހަރުގެ އޯގަސްޓް މަހުގެ ތެރޭގައެވެ. 2023 ވަނަ އަހަރުގެ ކުރީ ކޮޅުގައި ނިންމުމަށް ފެށުނު އެ މަސައްކަތް ދިގުލައިގެން ގޮސް، ދައުރު ނިންމާލި އިރުވެސް މަގުހެދުމުގެ މަސައްކަތް ނިމިފައެއް ނުވެއެވެ.

އެގޮތުން ދައުރު ނިމުނު އިރު، 2 ސެގުމެންޓުގެ މަސައްކަތް ނުނިމި އޮތް އިރު، މި ސަރުކާރުން އެ މަސައްކަތް އަލުން ފެށީ، ޑިސެންބަރު މަހުގެ 9 ދުވަހުއެވެ. އަދި އެ މަސައްކަތް ނިންމައި މިހާރު ވަނީ މަގު ހުޅުވާލާފައެވެ.