އިސްލާމީ ކަންތައްތަކާ ބެހޭ ވުޒާރާގެ ފަރާތުން ކ. ގުރައިދޫގައި ހުންނަ ޚާއްސަ އެހީއަށް ބޭނުންވާ މީހުންގެ މަރުކަޒަށް 32 މެޑިކަލް އެނދު ހަދިޔާކޮށްފިއެވެ. 

މިއަދު ބޭއްވުނު ޚާއްސަ ރަސްމިއްޔާތުގައި، އިސްލާމީ ކަންތައްތަކާ ބެހޭ ވުޒާރާގެ ފަރާތުން މި އެނދުތައް ހަވާލުކުރެއްވީ ވަޒީރު ޑރ މުހައްމަދު ޝަހީމް ޢަލީ ސަޢީދެވެ. އެއާއި ހަވާލުވެވަޑައިގެންނެވީ، އިޖްތިމާޢީ ތަރައްގީއާ ބެހޭ ވުޒާރާގެ ވަޒީރު ޑރ ޢާއިޝަތު ޝިހާމެވެ. 

އިސްލާމިކު މިނިސްޓްރީން ބުނެފައިވާ ގޮތުން، މިއަދު މި ހަވާލު ކުރެވުނު މި ޒަމާނީ އެނދުތަކުގެ ޖުމްލަ އަގަކީ، ގާތްގަނޑަކަށް ފަސްލައްކަ ހަތަރު ހާސް ރުފިޔާ އެވެ. އަދި މި އެނދު ހަދިޔާ ކޮށްފައިވަނީ އިސްލާމިކް ޗެރިޓީ ފަންޑުންނެވެ. 

Advertisement

އިސްލާމިކު މިނިސްޓްރީން، ޚާއްޞަ އެހީއަށް ބޭނުންވާ މީހުންގެ މަރުކަޒަށް 32 މެޑިކަލް އެނދު ހަދިޔާކުރުމުގެ ރަސްމިއްޔާތުގައި ވަޒީރު ޑރ ޝަހީމް ވާހަކަ ދައްކަވަނީ-- ފޮޓޯ/ މިނިސްޓްރީ

މި ރަސްމިއްޔާތުގައި ވާހަކަދައްކަވަމުން ވަޒީރު ޝަހީމް ވިދާޅުވީ، ރައީސުލްޖުމުހޫރިއްޔާ ޑރ. މުޙައްމަދު މުއިއްޒު އެއްމެ ބޮޑު އިސްކަމެއް ދެއްވާ ކަންކަމުގެ ތެރޭގައި ނިކަމެތިންނަށް އިހުސާންތެރިކޮށް ހިތުމާއި ފަޤީރުންނަށާއި މިސްކީނުންނަށް އަޅައިލުން ހިމެނޭ ކަމަށެވެ.

އަދި މުޖުތަމައުގެ ޚާއްޞަ އެހީތެރިކަމަށް ބޭނުންޖެހިފައިވާ ފަރާތްތަކަށް އޯގާތެރިކޮށް ހިތުމަކީ އިސްލާމީ މުޖުތަމަޢުގެ އެންމެ މުހިންމު އިޖުތިމާޢީ އަޚުލާޤު ކަމަށްވެސް އެމަނިކުފާނު ވިދާޅުވި އެވެ. 

މިއާއެކު ވަޒީރު ޝަހީމް ވަނީ ރައްޔިތުން ޚައިރާތާއި ޞަދަޤާތުގެ ގޮތުގައި ރާއްޖެއިން ބޭރަށް ހޭދަކުރާކުރުން ރާއްޖޭގެ ކަންކަމަށް ހޭދަކުރުމަށް އެދިވަޑައިގެންފައެވެ. އެގޮތުން އެ ފައިސާ ނިކަމެތިންނަށާއި ޤުރުއާން ކުލާސްތަކަށާއި ޤުރުއާން މުބާރާތްތަކަށާއި ޖަމިއްޔާތަކަށާއި ރަށްރަށުގައި ލައިބްރަރީތައް ޤާއިމުކުރުމަށާއި ތައުލީމަށާއި އެހެނިހެންވެސް ހެޔޮ ކަންކަމަށް ޚަރަދު ކުރުމަށް ޝަހީމް ވަނީ އެދިވަޑައިގެންފަ އެވެ.

"މިއިން ކޮންމެ ކަމަކީ ވެސް ހެޔޮ ކަމެއް. ތަނަވަސްކަމުގެ އަހުލުވެރިންނާއި އެންމެހައި ރައްޔިތުންގެ ކިބައިން އަޅުގަނޑު އެދެނީ ޚައިރާތާއި ޞަދަޤާތުގެ ގޮތުގައި މާތް الله ގެ މަގުގައި ހޭދަކުރުމަށް ބޭނުންވާ ބޭފުޅުން އިސްލާމިކް މިނިސްޓްރީ  މެދުވެރިކޮށް އެހީވުމަށް. ތިޔަ ބޭފުޅުންގެ ޞަދަޤާތާއި ޚައިރާތު ހެޔޮ ކަންކަމަށް ވާޞިލްކޮށްދިނުމަށް މިނިސްޓްރީ އިން އަމާނާތްތެރިކަމާއެކު މަސައްކަތްކުރާނެ." ޝަހީމް ވިދާޅުވި އެވެ.