ސަރުކާރުގެ ފަރާތުން ޖަލުތައް ބަލަހައްޓާ މައި ޢިދާރާ ، މޯލްޑިވްސް ކަރެކްޝަނަލް ސަރވިސްއިން ހިންގާ ހުޅުމާލޭ ޖަލުގައި ޤާއިމްކުރާ 40 މީހުންގެ ޖާގައިގެ ހޯލްޑިން ޔުނިޓްގެ ބިންގާ އަޅައިފިއެވެ.

މި ހޯލްޑިން ޔުނިޓްގެ ބިންގާ އަޅުއްވާ ދެއްވީ މިއަދު ހެނދުނު ބޭއްވި ރަސްމިއްޔާތުގައި ކޮމިޝަނަރ އޮފް ޕްރިޒަންސް ޙަސަން ޒަރީރުއެވެ.

މޯލްޑިވްސް ކަރެކްޝަނަލް ސާރވިސްއިން މަޢުލުމާތު ދެއްވި ގޮތުގައި ހުޅުމާލޭ ޖަލުގައި ހޯލްޑިން ޔުނިޓް ޤާއިމްކުރުމުގެ މަޤްޞަދަކީ ހުޅުމާލޭ ޖަލުގައި ތިބި ޤައިދީންނަށް ދެވޭ ޙިދުމަތާއި ދިރިއުޅުމުގެ ފެންވަރު ރަނގަޅުކޮށް، އަލަށް ޖަލަށް ގެންނަ ޤައިދީންނާއި ބަންދު މީހުން ޖަލުތަކަށް ގެންދެވެންދެން ބޭތިއްބޭނެ އިންތިޒާމް ހަމަޖެއްސުންކަމަށެވެ. ހަމަ އެއާއި އެކު އެކި ބޭނުންތަކަށް މާލެ ގެންނަ ޤައިދީންނާއި ބަންދުމީހުން ގެންނަ ބޭނުން ނިމި، އަނބުރާ އެޖަލުތަކަށް ގެންދެވެންދެން ބޭތިއްބޭނެ އިންތިޒާމް ހަމަޖެއްސުމަކީވެސް މި ޔުނިޓްގެ ބޭނުމެއްކަމަށް ކަރެކްޝަނުން ބުނެއެވެ.

Advertisement

މީގެ ކުރިން ޓްރާންސިޓްކޮށް ގެންނަ ޤައިދީންނާއި ބަންދުމީހުން ބައިތިއްބަނީ މާލޭ ޖަލުގައި ނަމަވެސް، މި މަހުގެ 7 ވަނަ ދުވަހު މާލޭ ޖަލު ވަނީ ބަންދުކޮށްފައެވެ.

މޯލްޑިވްސް ކަރެކްޝަނަލް ސަރވިސްއިން އިތުރަށް މަޢުލޫމާތު ދެއްވި ގޮތުގައި އަލަށް ޤާއިމްކުރެވޭ 40 މީހުންގެ ޖާގައިގެ ހޯލްޑިންގ ޔުނިޓްގެ އިތުރުން، މުސްތަޤްބަލްގައި އެ އިމާރާތުގައި އިތުރު ބައިތައް ޤާއިމްކޮށް، 77 މީހުންގެ ބޭތިއްބޭވަރަށް އިމާރާތް ބޮޑުކުރެވިގެން ދާނެއެވެ.

ކަރެކްޝަން ސާރވިސްއިން މަޢުލޫމާތު ދެއްވި ގޮތުގައި މިއަދު މި ބިންގާ އެޅުނު ހޯލްޑިން ޔުނިޓްގެ މަސައްކަތް 4 މަސް ދުވަހުގެ ތެރޭގައި ނިންމުމަށް މަސައްކަތް ކުރަމުންދާކަމަށް ވެސް ކަރެކްޝަނުން ބުނެއެވެ.

ރައީސް ޑރ. މުހައްމަދު މުއިއްޒުގެ ސަރުކާރުން ބުނެފައިވަނީ ރާއްޖޭގެ ޖަލުތަކުގެ ފެންވަރު ރަނގަޅުކޮށް ޤައިދީންނަށް ދޭން ޖެހޭ ޚިދުމަތްތައް ހަރުދަނާ ކުރުމުގެ މަސައްކަތް ކުރެވިގެންދާނެ ކަމަށެވެ.