ރައީސުލްޖުމުހޫރިއްޔާ ޑރ. މުހައްމަދު މުއިއްޒު މިވީ ކުރު މުއްދަތުގެ ތެރޭގައި ކުރެއްވި މަސައްކަތްޕުޅު ރަން އަކުރުން ލިޔުން ޙައްޤުކަމަށް އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ވަޒީރު ޑރ.ޝަހީމް މިފަދައިން ވިދާޅުވެފައި މިވަނީ، އިދިކޮޅު އެންމެ ބޮޑު ޕާޓީ އެމްޑީޕީ އާއި ދަ ޑިމޮކްރަޓްސް ޕާޓީ ގުޅިގެން އިދިކޮޅު ޕާޓީއެއްގެ ގޮތުގައި ސަރުކާރާއި ދެކޮޅަށް މަސައްކަތް ކޮށް، ސަރުކާރު "ހަންމަތަ ކުރާން" ނިންމިކަން އިއުލާން ކުރުމާއި ގުޅިގެން "އެކްސް" ގައި ކުރެއްވި ޕޯސްޓެއްގައެވެ.
އެގޮތުން ޝަޙީމް ކުރެއްވި ޕޯސްޓުގައި ވިދާޅުވެފައި ވަނީ ދިމިޤުރާޠީ އުޞޫލުތަކާއި އެއްގޮތަށް ރައްޔިތުން އިންތިޙާބު ކުރި ސަރުކާރަށް ޤައުމު ހިންގަން ފުރުޞަތެއް ދޭންޖެހޭނެ ކަމަށެވެ.
އަދި އެތައް ބިލިއަން ރުފިޔާގެ ދަރަނި އަދާކުރަމުން، ޒާތީ ބަދަލުހިފުމުން ޤައުމު ސަލާމަތްކޮށް، ޞުލްޙަވެރިކަމާއި އަމާންކަމާއެކު ބޯހިޔާ ވަހިކަމަށް ދާއިމީ ޙައްލު ހޯދައިދެއްވާފައި ވާތީ ރައީސް ޑރ. މުހައްމަދު މުއިއްޒުގެ މަސައްކަތްޕުޅު ރަން އަކުރުން ލިޔުން ޙައްޤުކަމަށެވެ.
"ދިމިޤުރާޠީ އުޞޫލުތަކާއި އެއްގޮތަށް ރައްޔިތުން އިންތިޚާބު ކުރި ސަރުކާރަށް ޤައުމު ހިންގަން ފުރުޞަތެއް ދޭންޖެހޭނެ. އެތައް ބިލިއަން ރުފިޔާގެ ދަރަނި އަދާކުރަމުން، ޒާތީ ބަދަލުހިފުމުން ޤައުމު ސަލާމަތްކޮށް، ޞުލްޙަވެރިކަމާއި އަމާންކަމާއެކު ބޯހިޔާ ވަހިކަމަށް ދާއިމީ ޙައްލު ހޯދައިދެއްވައި ޒަމާނީ ތަރައްޤީގެ އާ ހަރުފަތްތަކަށް ޤައުމު ވާޞިލުކުރުމަށް ރައީސް ޑރ މުއިއްޒު މި ވީ ކުޑަ މުއްދަތުގައި ކުރެއްވި މަސައްކަތްޕުޅުތަކަކީ ރަން އަކުރުން ލިޔަން ޙައްޤު މަސައްކަތްތަކެއް." ޑރ. ޝަޙީމުގެ އެކްސް ޕޯސްޓް މެސެޖުގައި ވިދާޅުވެފައި ވެއެވެ.
މިއަދު ހަވީރު އެމްޑީޕީ އާއި ޑިމޮކްރެޓްސް ގެ އިސް ސަފުގައި މަސައްކަތް ކުރައްވާ ފަރާތްތަކުން ބޭއްވި ނޫސްވެރިންގެ ބައްދަލުވުމެއްގައި ބުނެފައި ވަނީ ސަރުކާރު ޒިންމާދާރު ކުރުވުމަށްޓަކައި އެ ދެ ޕާޓީ ގުޅިގެން މަސައްކަތް ކުރަން ނިންމާފައިވާ ކަމަށާއި، ޙާއްޞަކޮށް މަޖިލީހުގެ ތެރެއިން ސަރުކާރު ޖަވާބުދާރީ ކުރުވާނެ ކަމަށެވެ.
"މި ސަރުކާރު ހަންމަތަ ކުރުމާއި، ޖަވާބުދާރީ ކުރުވުމާއި، މިގައުމުގެ ޑިމޮކްރެޓިކް މުސްތަގުބަލު ރަނގަޅު ކުރުމަށް ބޭނުންވާ ގާނޫނީ ބަދަލުތައް މަޖިލިސްގެ ތެރެއިން ގެނައުމަށް، މަޖިލިސްގެ ތެރޭގައި އަޅުގަނޑުމެން އެއްކޮށް މަސައްކަތް ކުރުމަށް (ނިންމީ)." މިއަދުގެ ނޫސްވެރިންގެ ބައްދަލުވުމުގައި ފައްޔާޒު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
