ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ޚާރިޖީ ސިޔާސަތު، އިދިކޮޅު އެމްޑީޕީއާ ޑިމޮކްރެޓްސް އަށް ކަމުނުދިޔައީ، މިސަރުކާރުގެ ޚާރިޖީ ސިޔާސަތު ވަކި ގައުމަކަށްގޮސް ހުސްނުވުމުން ކަމަށް ޕީއެންސީގެ ޗެއާޕާސަން އަބްދުއްރަހީމް އަބްދުالله ވިދާޅުވެއްޖެއެވެ.
އަބްދުއްރަހީމް މިފަދައިން ވިދާޅުވެފައި މިވަނީ، އެމްޑީޕީ އާއި ޑިމޮކްރެޓްސް އެކުގައި މަސައްކަތް ކުރަން ނިންމައި އެކަން އިއުލާން ކުރުމަށް އިއްޔެ ބޭއްވި ނޫސްވެރިންގެ ބައްދަލުވުމުގައި، މި ސަރުކާރުގެ ޚާރިޖީ ސިޔާސަތު ކަމު ނުދާ ކަމަށް އެ ދެޕާޓީން ބުނުމާއި ގުޅިގެންނެވެ.
އެގޮތުން ޕީޕީއެމް ޕީއެންސީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އަބްދުއްރަހީމް ވިދާޅުވީ، ދިވެހިންގެ މިނިވަންކަމާއި އިސްތިގުލާލަށް ހުރުމަތްތެރިކޮށް ހިތުމާއިއެކު، ހުރިހާ ގައުމަކާއެކުވެސް މަސައްކަތް ކުރައްވާނެ ކަމުގެ ޔަގީންކަން، ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވެރިކަމަށް ވަޑައިގެންނެވި ފުރަތަަމަ ދުވަހުވެސް، ދެއްވާފައިވާ ކަމަށެވެ.
އަދި، އެމްޑީޕީ ސަރުކާރު އިންޑިޔާއަށް ލެނބިފައިވާ ޚާރިޖީ ސިޔާސަތެއް ގެންގުޅުއްވި އިރު، އެ ބޭފުޅުންނަށް މިސަރުކާރުގެ ސިޔާސަތު ކަމު ނުދާނީ އެފަދައިން ވަކި ގައުމަކަށް ހުސް ނުވާތީ ކަމަށް އޭނާ ވިދާޅުވި އެވެ.
ވަކި ގައުމަކަށް ބަރޯސާ ވުމެއް ނެތި ޚާރިޖީ ސިޔާސަތު ބައްޓަންކުރައްވާނަމޭ. އެއީ ދިވެހި ރާއްޖެއަށް އެންމެ ފައިދާ ހުރިގޮތް. ދިވެހިރާއްޖެ އަބަދުވެސް ދެމިއޮތީ މެދުމިނު ޚާރިޖީ ސިޔާސަތެއް ގެންގުޅޭ ގައުމެއްގެ ގޮތުގައި. އެބޭފުޅުންނަށް (އެމްޑީޕީ އާއި ޑިމޮކްރެޓްސް އަށް) ކަމުނުގޮސްގެން އެ އުޅެނީ ފަހަރެއްގައި ވެދާނެ، ވަކި ގައުމަކަށްގޮސް، ދިވެހިރާއްޖެ ހުސްވާގޮތަށް ޑރ މުޢިއްޒުގެ ޚާރިޖީ ސިޔާސަތު ބައްޓަން ނުކުރީމާ.
އަބްދުއްރަހީމް އަބްދުالله
އަދުރޭ ވިދާޅުވީ ޑރ. މުޢިއްޒުގެ ޚާރިޖީ ސިޔާސަތު ގެންގުޅުއްވަނީ، އަވަށްޓެރި ގައުމުތަކާއި އެކު، އެ ގައުމުތަކާއިއެކު ބާއްވަންޖެހޭ ގުޅުން ބާއްވަވައިގެން ކަމަށެވެ.
"އަދި އެއަށްވުރެ ދުރުގައި ތިއްބެވި ބޭފުޅުންނާއި އެކުގައިވެސް ހަމަ އެ ގުޅުން ބާއްވަމުން. ރާއްޖެއަށް އެންމެ ހެޔޮއެދޭ ބޭފުޅުންނާއިއެކު އެންމެ ގާތް ގުޅުމެއް ބާއްވަމުން. ދިވެހިރައްޔިތުންނަށް ލާބައާއި މަންފާ ކުރުވަނިވި ގޮތަށް ޑރ. މުޢިއްޒުގެ ޚާރިޖީ ސިޔާސަތު ބައްޓަން ކުރުން. އެއީ އަޅުގަނޑުމެންގެ އަމާޒަކީ. ރައީސް މުޢިއްޒުގެ ސިޔާސަތަކީ. އެގޮތް، އެބޭފުޅުންނަށް (އެމްޑީޕީ/ޑިމޮކްރެޓްސް) އަށް ކަމުނުދަނީ ކަމަށް ވެދާނެ."
އަބްދުއްރަހީމް އަބްދުالله
މީގެ އިތުރުންވެސް މިއަދުގެ ނޫސްވެރިންގެ ބައްދަލުވުމުގައި އަދުރޭ ވަނީ، އިދިކޮޅު މައި ޕާޓީ އެމްޑީޕީ އާއި ޑިމޮކްރެޓްސް ގުޅެން ނިންމި ނިންމުމަށް ފާޑުވިދާޅުވެފައެވެ.
އެގޮތުން ވިދާޅުވީ ދަ ޑިމޮކްރެޓްސް އަށް އޭރު އެމްޑީޕީގެ ސިޔާސަތެއް ކަމަކު ނުދިޔަ ކަމަށާއި ވެރިކަން ބަދަލުކުރަން ނުކުތީ އެހެންވެ ކަމަށެވެ. އޭރު ރައީސް ޑރ.މުއިއްޒު ގެންގުޅުއްވާ ސިޔާސަތު ވަރަށް ރަނގަޅުކަމަށް ބުނި ކަމަށާއި އެމަނިކުފާނުގެ ސިޔާސަތާއި ޕީޕީއެމް ޕީއެންސީގެ ސަރުކާރު ކަމުނުދިޔައީ އެބޭފުޅުން ބޭނުންފުޅުވާ ގޮތަށް ނުވަތަ ބޭނުންފުޅުވާ ކަމެއް ހާސިލު ނުވީމާ ކަމަށެވެ.
"މިއަދު އެބޭފުޅުން ބޭނުންފުޅުވާ ގޮތަށް ނުވަތަ ބޭނުންފުޅުވާ ކަމެއް ހާސިލު ނުވީމާ ޑރ.މުއިއްޒުގެ ސިޔާސަތު ކަމުނުދިޔައީ. ޕީޕީއެމް ޕީއެންސީގެ ސަރުކާރު ކަމުނުދިޔައީ. އަލުން އަނބުރާ ގޮސް ހަމަ މިއިށީނީ އޭރުގައި ކަމުނުދިޔަ ސިޔާސަތު ގެންގުޅުނު މޭޒުގައި. އެހެންވީމަ އެބަ އެނގޭނޫންތޯ ރައްޔިތުންނަށް މިދައްކާ ވާހަކައިގެ ދެކޮޅު ދިމާނުވާކަން." އަދުރޭ ވިދާޅުވިއެެވެ.
Advertisement
This content is created and paid for by advertisers and does not involve Voice Journalists
