ރައީސުލްޖުމްހޫރިއްޔާ އަކީ ސިއްރުން ބައްދަލުކުރަންޖެހޭ ފަރާތެއްކަމަށް ދެކެ ވަޑައި ނުގަންނަވާ ކަމަށް ނިމިދިޔަ ސަރުކާރުގެ ޔޫތު އެންޑު ސްޕޯރޓްސް މިނިސްޓަރ އަޙްމަދު މަޙްލޫފު ވިދާޅުވެއްޖެއެވެ.

އެބޭފުޅާ މިފަދައިން ވިދާޅުވެފައި ވަނީ ރައީސުލްޖުމުހޫރިއްޔާ ޑރ.މުހައްމަދު މުއިއްޒާއި ބައްދަލުކުރެއްވި ކަމަށް ބުނެ ސޯޝަލް މީޑިއާގައި ވާހަކަ ފެތުރުމާއި ގުޅިގެންނެވެ.

އެކަމާއި ގުޅިގެން މަހްލޫފް "އެކްސް" ގައި ކުރެއްވި ޕޯސްޓެއްގައި ވިދާޅުވީ ރައީސުލްޖުމްހޫރިއްޔާ ޑރ. މުއިއްޒު އާއި މ. ދިމްޔާތުގައި ބައްދަލު ކުރި ކަމަށް ބުނެ ފަތުރާ ވާހަކަ އަކީ ކަނޑައެޅިގެން ދޮގެއް ކަމަށެވެ.

" އަޅުގަނޑު ރައީސުލްޖުމްހޫރިއްޔާ ޑރ. މުއިއްޒު އާއި މ. ދިމްޔާތުގައި ބައްދަލުކުރިކަމަށްބުނެ ފަތުރާ ވާހަކަ އަކީ ކަނޑައެޅިގެން ދޮގެއް " މަޙްލޫފް އެކްސް ގައި ކުރެއްވި ޕޯސްޓުގައި ވިދާޅުވެފައި ވެއެވެ.

އޭގެ އިތުރުން މަޙްލޫފުގެ ޕޯސްޓުގައި ވިދާޅުވެފައި ވަނީ ރައީސުލްޖުމުހުރިއްޔާގެ މަޤާމުގައި ހުންނަވާ ބޭފުޅަކީ ސިއްރުން ބައްދަލުކުރަން ޖެހޭ ފަރާތެއް ކަމަށް ދެކިވަޑައި ނުގަންނަވާ ކަމަށެވެ.

"ރައީސުލްޖުމްހޫރިއްޔާ އަކީ ސިއްރުން ބައްދަލުކުރަންޖެހޭ ފަރާތެއްކަމަށް އަޅުގަނޑު ނުދެކެން." މަޙްލޫފުގެ ޕޯސްޓް ނިންމާލަމުން ވިދާޅުވެފައި ވެއެވެ.

ކުރީގެ ޒުވާނުންނާއި ކުޅިވަރާއި ބެހޭ ވަޒީރު މަހްލޫފް މިފަދައިން ވިދާޅުވެފައި ވާއިރު ރާއްޖޭގެ ތިން ޑެޕިއުޓީ މިނިސްޓަރަކު އިންޑިއާގެ ބޮޑުވަޒީރު ނަރެންދުރަ މޯދީއަށާއި އެ ޤައުމަށް އަމާޒުކޮށް މީސް މީޑިއާގައި މަލާމާތްކޮށް ބަދު ބަސް ވިދާޅުވި މައްސަލައިގައި ރައީސް ޑރ. މުހައްމަދު މުއިއްޒު ވަކިކުރުމުގެ ވާހަކަތައް މީގެކުރިން ދެކެވުނެވެ.

އެކަމާއި ގުޅިގެން ވެސް މަހްލޫފް ވަނީ ރައްޔިތުން އިންތިހާބުކޮށްފައި އޮތް ސަރުކާރެއް ގަދަބާރުން ވައްޓާލުމާ ދެކޮޅު ކަމަށް ވިދާޅުވެފައެވެ.

އޭގެ އިތުރުން މިހާރުގެ މާލޭގެ މޭޔަރު އާދަމް އާޒިމް ކެމްޕެއިން ތެރޭގައި މިސަރުކާރަށް އަމާޒުކޮށް ދެއްކެވި ބައެއް ވާހަކަތަކަށްވެސް މަޙްލޫފު ވަނީ ރައްދު ދެއްވާފައެވެ.