ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް، ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2024 ގެ ށ. އަތޮޅު ބުރުގެ ގުރޫޕް އެކެއްގައި ފޯކައިދޫ އާއި ކަނޑިތީމް ވާދަކުރި މެޗު 11-1 ގެ ތަފާތުބޮޑު ނަތީޖާއަކުން މޮޅުވެ، ގުރޫޕްގެ އެއްވަނަ ކަނޑިތީމުން ކަށަވަރުކޮށްފިއެވެ. 

މިމެޗަށް ނިކުތް އިރުވެސް މިދެޓީމަށް ސެމީފައިނަލްގެ ޖާގައެއް ކަށަވަރުވެފައިވާ އިރު، މުބާރާތުގައި ފޯކައިދޫ އިން ކުޅުނު ފުރަތަމަ މެޗުގައި 3-2 ގެ ނަތީޖާއަކުން މަރޮށި އަތުން އެޓީމު ވަނީ މޮޅުވެފައެވެ. އަދި ކަނޑިތީމުގެ ފުރަތަަމަ މެޗުގައި އެޓީމު ވެސް ވަނީ 8-1 ގެ ނަތީޖާއަކުން މަރޮށި އަތުން މޮޅުވެފައެވެ.

ހުޅުމާލޭ ރެހެންދި އެއް ނަންބަރު ފުޓްސަލް ދަނޑުގައި ކުޅެވުނު މި މެޗުގެ ފުރަތަަމަ ހާފުގައި ކަނޑިތީމުން 6 ލަނޑު ކާމިޔާބުކުރިއިރު، މެޗުގެ ދެވަަނަ ހާފުގައި އެޓީމުން ވަނީ އިތުރު ފަސް ލަނޑު ކާމިޔާބުކޮށްފައެވެ. އަދި މިމެޗުގައި ފޯކައިދޫގެ ހަމައެކަނި ލަނޑު ދެވަނަ ހާފުގެ 38 ވަނަ މިނެޓުގައި ކާމިޔާބުކޮށްދިނީ އެޓީމުގެ އިބްރާހިމް މުސީރު އެވެ.

Advertisement

މިމެޗުގައި ކަނޑިތީމުގެ ކެޕްޓަން އިބްރާހިމް ނަދާދު 6 ލަނޑު ކާމިޔާބޮށް ދެ ހެޓްރިކް ފުރިހަމަކުރި އިރު އެޓީމުގެ އަހުމަދު ޒަމީމް ވަނީ ތިން ލަނޑު ކާމިޔާބުކޮށް ހެޓްރިކެއް ހަދާފައެވެ. މީގެ އިތުރުން އެޓީމުގެ ރައުލް ނިޔާޒު އަދި މުހައްމަދު ޝާން މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ކަނޑިތީމުގެ އިބްރާހިމް ނަދާދު އެވެ.

މިމެޗުން ލިބުނު ތިން ޕޮއިންޓާއެކު ކުޅުނު ދެ މެޗުން ވެސް މޮޅުވެ ގުރޫޕްގެ އެއްވަނަ ޓީމުގެ ގޮތުގައި ކަނޑިތީމުން ސެމީ ފައިނަލުގެ ޖާގައެއް ހޯދިއިރު، މިމެޗުން ބަލިވި ފޯކައިދޫ އިން ކުޅުނު ދެމެޗުން ލިބުނު ތިން ޕޮއިންޓާއެކު ގުރޫޕްގެ ދެވަނަ ޓީމުގެ ގޮތުގައި އެޓީމަށް ވެސް ވަނީ ސެމީގެ ފުރުސަތު ލިބިފައެވެ. 

މިއަހަރުގެ މުބާރާތުގައި ޖުމްލަ 129 ޓީމު ބައިވެރިވެފައިވާއިރު، މުބާރާތުގައި 320 މެޗު ކުޅުމަށް ވަނީ ހަމަޖެހިފައެވެ. އަދި މިއަހަރުގެ މުބާރާތުގައި ށ. އަތޮޅުން 6 ޓީމު ބައިވެރިވެފައިވާއިރު، މިއަތޮޅުގެ އަތޮޅުބުރު ކުރިއަށް ގެންދިއުމަށް ހަމަޖެހިފައިވަނީ 2 ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން އެންމެ ރަގަޅު ނަތީޖާއެއް ހޯދާ ދެޓީމު ސެމީއަށް ހޮވޭއިރު، ފައިނަލުގައި ވާދަކުރާ ދެޓީމަށް މުބާރާތުގެ ޒޯނު ބުރުން ފުރުސަތު ލިބިގެންދާނެ އެވެ.