ދިވެހިންގެ އަދަބިއްޔާތުގައި ހިމެނޭ އެންމެ މުހިއްމު އެއްވައްތަރުކަމަށްވާ ދިވެހި ޅެންތައް ބޭނުންކޮށްގެން ނަފްސާނީ ފަރުވާ ދިނުމުގެ މަސައްކަތް ކުރުމަށް ދިރާސާކުރެވެމުން އަންނަކަމަށް ދިވެހި ބަހާއި، ސަގާފަތާއި ތަރިކައާއި ބެހޭ ވަޒީރު އާދަމް ނަސީރު އިބްރާހީމް ވިދާޅުވެއްޖެއެވެ.

ވަޒީރު އާދަމް ނަސީރު މިފައިދައިން ވިދާޅުވެފައި ވަނީ މި އަހަރުގެ ޅެންވެރިންގެ ދުވަސް ފާހަގަކުރުމަށް ގދ.ތިނަދޫގައި ރޭ ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.

ރޭގެ އެ ޖަލްސާގާއި ވާހަކަފުޅު ދައްވަމުން އާދަމް ނަސީރު ވިދާޅުވީ ދިވެހި ޅެން ބޭނުންކޮށްގެން ނަފްސާނީ ފަރުވާ ދިނުމަށް އެ ކަމާއި ގުޅުންހުރި ދިރާސާތަކާއި މަސައްކަތްތައް އެ ވުޒާރާއިން ކުރައްވަމުން ގެންދަވާކަމަށެވެ.

ދިވެހި ޅެން ބޭނުންކޮށްގެން ނަފްސާނީ ފަރުވާ ދިނުމުގެ މުހިއްމު ކަމާއި ގުޅޭގޮތުން ވަޒީރު ވިދާޅުވީ، ޅެންތައް ބޭނުންކޮށްގެން ފަރުވާދިނުމަކީ ނަފްސާނީ ބަލިތައް ތަހައްމަލުކުރާ މީހުންނަށް އުފާވެރިކަން ގެނެސްދޭ ކަމެއްކަމަށާއި ހިތްވަރު އާލާކުރެވި ފިކުރުތަކާއި ދުރުކުރެވޭނެ ކަމެއް ކަމަށް ދުނިޔޭގެ ދިރާސާތަކުން ދައްކައިފައިވާ ކަމަށެވެ.

ރޭގެ އެ ޖަލްސާގައި ވާހަކަފުޅު ދައްކަވަމުން ވަޒީރު އާދަމް ނަސީރު އިތުރަށް ފާހަގަ ކުރެއްވި ގޮތުގައި ގައުމުގެ ސަގާފާތާއި ތާރިހު ދިރުވުމުގައި އެންމެ ބޮޑު ދައުރެއް އަދާކުރަނީ ޅެންތަކެވެ.

މިއަހަރުގެ ޅެންވެރިންގެ ދުވަސް ރަސްމީކޮށް ހާއްސަ ކުރައްވާފައި ވަނީ ރާއްޖޭގެ މަޝްހޫރު ޅެންވެރިއެއްކަމަށްވާ ގދ. ތިނަދޫއަށް ނިސްބަތްވެ ވަޑައިގަންނަވާ ތިނަދޫ އަބްދުﷲ އަފީފް (އަފީފްބެ)އަށެވެ.

މިދަވަސް ފާހަގަ ކުރުމުގެ ގޮތުން ދިވެހި ބަހުގެ އެކަޑަމީގެ ފަރާތުން ވަނީ ސްކޫލުތަކުގެ އެސެމްބުލީ މެދުވެރިކޮށް އަފީފުބެ ހައްދަވާފައިވާ ޤައުމީ ޖޯޝްހިމެނޭ ޅެން ކިއުމުގެ އިތުން އަފީފުބެ އާއި ގުޅޭ މަޢުލޫމާތުވެސް ކިޔަވާ ކުދިންނާއި ހިސާބަށް ފޯރުކޮށްދީފައެވެ.