މިދިޔަ އަހަރުގެ ފަހު ކުއާޓަރުގައި ފަތުރުވެރިކަމުގެ ސިނާއަތުގައި ވަޒީފާތައް އިތުރުވެ އެމްޕްލޯއިމެންޓް އިންޑެކްސްވަނީ 13 ޕޮއިންޓުން 60 ޕޮއިންޓަށް އިތުރުވެފައިވާ ކަމަށް، އެމް.އެމް.އޭއިން ކޮންމެ 3 މަހަކުން ނެރޭ ކުއާޓަލީ ބިޒްނަސް ސާރވޭ ރިޕޯޓުގައި ބުނެފިއެވެ. 

އެމް.އެމް.އޭގެ ކުއާޓަލީ ބިޒްނަސް ސާރވޭ ރިޕޯޓަކީ ރާއްޖޭގެ އިޤްތިޞާދުގެ މިހާރުގެ ޙާލަތާއި ކުރިއަށް އޮތް ކުއާޓަރުގައި އަތުވެދާނެކަމަށް ލަފާކުރެވޭ ބަދަލުތަކާއި ގުޅޭގޮތުން، އިޤްތިޞާދުގައި ހިމެނޭ މުހިންމު 4 ދާއިރާކަމަށްވާ ފަތުރުވެރިކަން، އިމާރާތްކުރުން، ދަތުރުފަތުރު އަދި މުއާސަލާތީ ޚިދުމަތްތައް، ހޯލްސޭލް އަދި ރީޓެއިލް ސިނާއަތުގައި ހަރަކާތްތެރިވާ ބޮޑެތި ވިޔަފާރިތަކާއި ސުވާލުކޮށް މައުލޫމާތު އޮޅުން ފިލުވުމަށް ކުރިއަށްގެންދާ ސަރވޭއަކަށްފަހު ނެރޭ ރިޕޯޓެކެވެ.

އެމްއެމްއޭއިން އެންމެފަހުން ނެރުނު ރިޕޯރޓުގައިވާ ގޮތުން ފަތުރުވެރިކަމުގެ ދާއިރާއިން ވަޒީރާގެ ގިނަ ފުރުޞަތުތަކެއް ވަނީ 4 ވަނަ ކުއާޓަރުގެ ތެރޭގައި އުފެދިފައެވެ. އެ ރިޕޯޓުގައިވާގޮތުން، އެމްޕްލޯއިމެންޓް އިންޑެކްސްވަނީ 13 ޕޮއިންޓުން 60 ޕޮއިންޓަށް އިތުރުވެފައެވެ. މީގެއިތުރުން ފަތުރުވެރިކަމުގެ ދާއިރާގެ މުސާރަތަކަށްވެސް 4 ވަނަ ކުއާޓަރުގައި ކުރިއެރުން ލިބިފައިވާކަމަށް ރިޕޯޓުގައި ފާހަގަކޮށްފައިވެއެވެ.

އެމްއެމްއޭގެ ކުއާޓަލީ ބިޒްނަސް ސާރވޭ ރިޕޯޓުގައިވާގޮތުން ޢިމާރަތްކުރުމުގެ ދާއިރާ، ދަތުރުފަތުރު އަދި މުވާސަލާތީ ދާއިރާއިން ވަޒީފާގެ ފުރުޞަތުތައް މިދިޔަ އަހަރުގެ ފަހު ކުއާޓަރުގައި އިތުރުވެފައެއް ނުވެއެވެ

ކުއާޓަލީ ބިޒްނަސް ސާރވޭ ރިޕޯޓުގައިވާގޮތުން މިދިޔަ އަހަރުގެ 4 ވަނަ ކުއާޓަރުގައި ފަތުރުވެރިކަމުގެ ސިނާއަތަށް އެހާބޮޑު ކުރިއެރުމެއް ލިބިފައި ވުމުގެ މައިގަނޑު ސަބަބަކީ އެކުއާޓާއަކީ ފަތުރުވެރިކަމުގެ ޕީކް ސީޒަނަށް ވެފައި ރިސޯޓު ބުކިންތައް އިތުރުވެ، އާމްދަނީ ވެސް އިތުރުވެފައި ވުމެވެ.

އެމް.އެމް.އޭއިން ވިދާޅުވެފައިވާ ގޮތުގައި 2013 ވަނަ އަހަރުން ފެށިގެން ކޮންމެ އަހަރަކު 4 ފަހަރު އެމް.އެމް.އޭއިން އާއްމުކުރާ ބިޒްނަސް ސާރވޭގެ މަޤްޞަދަކީ ކުރު މުއްދަތުގައި އިޤްތިޞާދަށް އަންނަމުންދާ އަދި އަތުވެދާނެކަމަށް ލަފާކުރެވޭ ބަދަލުތައް އަވަސް މުއްދަތެއްގެ ތެރޭގައި ދެނެގަނެ، ސިޔާސަތުތައް ކަނޑައެޅުމުގައި އެހީތެރިވެދިނުމެވެ.