ލިވަޕޫލުގެ މުޅި ތާރީޙުގައިވެސް އެޓީމަށް އެންމެ ބޮޑު ކާމިޔާބީއެއް ހޯދައިދިން ކޯޗު، ޔާގަން ކްލޮޕް މިސީޒަނަށް ފަހު އެޓީމު ދޫކޮށްލާކަން އިޢުލާނު ކޮށްފިއެވެ.

ޖަރުމަނަށް އުފަން ކްލޮޕްއަކީ ލިވަޕޫލްގެ ތާރީހުގައި އެންމެ ކާމިޔާބު ކޯޗުކަން ތަފާސްހިސާބުތަކުން ދައްކާއިރު، އޭނާގެ ބެލުމުގެ ދަށުން މިހާތަނަށް 466 މެޗު ކުޅުނު އިރު 283 މެޗުން ވަނީ މޮޅުވެފައެވެ. އޭގެ މާނައަކީ ކާމިޔާބުގެ ނިސްބަތަކީ %60.73 އިންސައްތައެވެ. މިއީ މިހާތަނަށް އެޓީމާއި ހަވާލުވެފައިވާ އެއްވެސް ކޯޗަކަށް ހާސިލްކުރެވިފައިވާ ކާމިޔާބީއެއް ނޫނެވެ.

ފުޓްބޯޅައިގައި އެންމެ ކާމިޔާބު އެއް ކޯޗުގެ ގޮތުގައި ފާހަގަކުރެވޭ ކްލޮޕް 2015ގައި ލިވަޕޫލްއާ ހަވާލުވުމަށް ފަހު ބޮޑު ބަދަލެއް ގެނެސް، އެންމެ ގިނަ މެޗުން މޮޅުވި އެއް ކޯޗުގެ ގޮތުގައި ހުރި އިރު ، ކްލޮޕުގެ ނިންމުން މި އައީ ކުއްލިއަކަށެވެ. ލިވަޕޫލްއާ އެކު އެންމެ ފަހުން ހެދި ކޮންޓްރެކްޓްގެ މުއްދަތު ވެސް ހަމަވާނީ 2026 އަށެވެ. އެ ކޮންޓްރެކްގައި ސޮއިކުރި އިރު އޭނާ ބުނެފައި އޮތީ އެ މުއްދަތު ހަމަވަންދެން ކްލަބްގައި ހުންނާނެ ކަމާ މެދު "%100 އިންސައްތަ ޔަގީން" ކަމަށެވެ.

Advertisement

"އަހަންނަށް ކުރެވެން ހުރި ހުރިހާ ކަމެއް ކުރެވިއްޖެ. އަހަންނަށް އެނގޭ އަހަންނަށް ލިބެން ހުރީ ނިމުމެއް ނެތް އެއްޗެހި ނޫންކަން. އެހެންވެ އެ ހުރިހާ އެއްޗެއް މި ސީޒަނަށް އެއްކޮށްލާފައި ދެން ބްރޭކެއް ނަގާނީ، ނުވަތަ މިކަން މުޅިން ހުއްޓާލާނީ، ނުވަތަ ކޮންމެވެސް އެހެން ގޮތެއް،" ކްލޮޕުގެ ނިންމުމާއި ގުޅޭގޮތުން އޭނަ ބުންޏެވެ.  

މީގެ އިތުރުން ކުލޮޕް ބުނެފައި ވަނީ ކްލަބްގެ ހުރިހާކަމެއް ވެސް ވަރަށް ފުރިހަމަކަމަށާއި ކުޅުންތެރިންނާއި ސަޕޯޓަރުންގެ އިތުރުން ޓީމުގެ މުއައްޒަފުންނާއި ދޭތެރޭ ހިތްމަޖެހޭކަމަށެވެ.

"އަހަންނަށް ޔަގީން މިއީ ހަމަ ރަނގަޅު ނިންމުމެއްކަން. މިއީ އެހާ ފަސޭހަކޮށް އަހަރެން ނަގާނެ ކަންކަމެއް ވެސް ނޫން." ލިވަޕޫލް ދޫކޮށްލުމާއި ގުޅޭ ގޮތުން ކުލޮޕް ބުންޏެވެ.

ލިވަޕޫލަށް 30 އަހަރު ދުވަހުގެ ތެރޭގައި ފުރަތަމަ ފަހަރަށް އިނގިރޭސި ލީގުގެ ޗެމްޕިއަންކަން 2019-2020 ސީޒަންގައި ހޯދައިދިނުމުގެ އިތުރުން ކްލޮޕް ވަނީ ޗެމްޕިއަންސް ލީގުގެ ތަށި ވެސް އެޓީމަށް ކާމިޔާބުކޮށްދީފައެވެ.

މިދިޔަ ސީޒަންގައި އެއްވެސް ތަށްޓެއް ނުލިބި ތާވަލުގެ ފަސް ވަނާގައި އޮވެ ސީޒަން ނިންމާލި ނަމަވެސް ލިވަޕޫލް މި ސީޒަންގައި ވަނީ ބޮޑު ކުރިއެރުންތަކެއް ހޯދާފައެވެ. އެގޮތުން މި ވަގުތު ލިވަޕޫލް އޮތީ ޕްރިމިއަރ ލީގުގެ ތާވަލްގެ އެއް ވަނައިގައެވެ. އަދި އެފްއޭ ކަޕްގެ ހަތަރު ވަނަ ބުރަށް ދިއުމުގެ އިތުރުން ލީގު ކަޕްގެ ފައިނަލުން ވެސް ވަނީ ޖާގަ ހޯދައިފަ އެވެ.

ލިވަޕޫލް ދޫކޮށްލަށް ނިންމަމުން ކްލޮޕް ބުނީ އެނާއަށް ކުރިމަގުގައި ކަންތައްތައް ވެގެން ދާނެ ގޮތް ނޭނގޭ ކަމަށާއި އެކަމަކު ޔަޤީންވާ އެއްކަމެއް އެބައޮތް ކަމަށެވެ. އެގޮތުން ކުލޮޕް ދިން ޔަޤީން ކަމަކީ އޭނާ ދެން އިނގިރޭސި ޓީމަކާއި ހަވާލު ނުވާނެކަމުގެ ޔަޤީން ކަމެވެ.

"އެކަމަށް އަހަންނަށް ހުވާކުރެވިދާނެ. އަހަރެން ކާނެ އެއްޗެއް ނެތަސް ދެން އެކަމެއް ނުވާނެ،" ވަރަށް ޔަޤީންކަމާއި އެކު ކްލޮޕް ބުންޏެވެ.

ކުލޮޕް 2015 ވަނަ އަހަރު، ލިވަޕޫލާއި ހާލުވެ މިވީ މުއްދަތުގެ ތެރޭގައި އޭނާވަނީ އެ ކްލަބާއެކު ޕްރިމިއާ ލީގާއި ޗެމްޕިއަންސް ލީގުގެ އިތުރުން  އެފްއޭ ކަޕް އަދި ލީގު ކަޕް ވެސް ކާމިޔާބުކޮށްފައެވެ. ހަމަ އެއާއި އެކު ކުލަބު ވޯލްޑްކަޕްވެސް ކާމިޔާބު ކޮށްފައެވެ.