ރައްޔިތުންގެ މަޖިލީހުގެ ކޮމިޓީން ދިރާސާ ކުރުމަށްފަހު، ސަރުކާރުގެ ވަޒީރުންގެ ޝަރުތު ހަމަވާ ކަމަށް ކަނޑައަޅައި، އެ ވަޒީރުންނަށް ރުހުން ދިނުމަށް ނިންމުމުން، މަޖިލީހުގެ ތަޅުމުން އެ ވަޒީރުންނަށް ރުހުން ދޭންޖެހޭ ކަމަށް ރައްޔިތުންގެ މަޖިލީހުގެ ތިމަރަފުށީ ދާއިރާގެ މެންބަރު އަބްދުالله ރިޔާޒް ވިދާޅުވެއްޖެއެވެ. 

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ކެބިނެޓްގައި ހިމެނިވަޑައިގަންނަވާ ވަޒީރުންނަށް ރުހުން ދިނުން، މަޖިލިސް ދައުރު ނިމުނު އިރުވެސް ކުރިއަށް ނުގެންދެވިފައި ވާއިރު، މިއަދު ދައުރުން ބޭރުން ޖަލްސާއެއް ބާއްވައިގެން އެ މަސައްކަތް ކުރުން ވަނީ ފަށާފައެވެ. 

އެގޮތުން، ރުހުން ދިނުމާއި ގުޅޭގޮތުން ކޮމިޓީން އެކުލަވާލި ރިޕޯޓަށް ބަހުސް ކުރައްވަމުން ރިޔާޒް ވިދާޅުވީ، ގާނޫނު އަސާސީގައި ވަޒީރުންގެ ކިބާގައި ހުރުމަށް ކަނޑައަޅާފައިވާ ޝަރުތުތައް ހަމަވާ ބޭފުޅުން އެ މަގާމަށް އައްޔަން ކުރެއްވުމުން، އެ ބޭފުޅުންނަށް މަޖިލީހުން ރުހުން ދޭން ޖެހޭ ކަމަށެވެ. 

Advertisement

ރިޔާޒު ވިދާޅުވީ ވަޒީރުންނާއި ގުޅޭ އެއްވެސް މައްސަލައެއް އޮތް ނަމަ، ކޮމިޓީ މަރުހަލާގައި އެކަމެއް ބަލައި ނިންމައި، މަޖިލީހުގެ ތަޅުމަށް ފޮނުވާނެ ކަމަށެވެ. އެހެން ނަމަވެސް، އެފަދަ އެއްވެސް މައްސަލައެއް ފޮނުވާފައި ނުވާ ކަމަށް އޭނާ ވިދާޅުވި އެވެ. 

އެހެންކަމުން، ރިޔާޒު ވަނީ ކޮމިޓީން ނިންމާފައިވާ ނިންމުމާއި އެއްގޮތަށް ހުރިހާ ވަޒީރުންނަށް ވެސް ރުހުން ދިނުމަށް އެދިވަޑައިގެންފައެވެ.