ޤައުމިއްޔަތު ވަކި މާއްދާއެއްގެ ގޮތުގައި ސްކޫލްތަކުގައި ކިޔަވައިދިނުން ތަޖުރިބާ ކުރުމަށް ފަށާ ޕައިލެޓް ޕްރޮޖެކްޓްގެ މަސައްކަތް މާލެއާއި އަތޮޅުތައް ހިމެނޭގޮތަށް 11 ސްކޫލެއްގައި ފަށައިފިއެވެ.

ކިޔަވައިދިނުން ތަޖުރިބާ ކުރުމަށް ފަށާ ޕައިލެޓް ޕްރޮޖެކްޓްގެ ޕްރޮގްރާމް ފުރަތަމަ ފަށާފައި މިވަނީ ރާއްޖޭގެ 11 ސްކޫލެއްގެ ގްރޭޑް 4ގެ ދަރިވަރުންނަށް އަމާޒުކޮށްގެންނެވެ.

އެގޮތުން ޤައުމިއްޔަތު މާއްދާ ކިޔަވައިދެން ފެށި ސްކޫލުތަކަކީ 

1. ޞަލާޙުއްދީން ސްކޫލް – ހުޅުމާލެ

2. ކަލާފާނު ސްކޫލް – މާލެ

3. ތާޖުއްދީން ސްކޫލް – މާލެ

4. މުހިއްޔިއްދީން ސްކޫލް – ވިލިމާލެ

5. ބ.އަތޮޅު ތަޢުލީމީ މަރުކަޒު – ބ.އޭދަފުށި

6. ޅ.އަތޮޅު ތަޢުލީމީ މަރުކަޒު – ޅ.ހިންނަވަރު

7. ވ.އަތޮޅު ތަޢުލީމީ މަރުކަޒު – ވ.ފެލިދޫ

8. މަގޫދޫ ސްކޫލް – ފ.މަގޫދޫ

9. އަބޫބަކުރު ސްކޫލް – ގދ.ތިނަދޫ

10. ހިތަދޫ ސްކޫލް – ހިތަދޫ، އައްޑޫ ސިޓީ

11. މުޙައްމަދު ޖަމާލުއްދީން ސްކޫލް – ފުވައްމުލައް ސިޓީ

ތަޢުލީމީ ވުޒާރާއިން ދައުލަތުގެ މީޑިޔާ ޕީއެސްއެމް އަށް މަޢުލޫމާތު ދެއްވާފައިވާ ގޮތުގައި ޤައުމިއްޔަތު މާއްދާ ކިޔަވައިދެން މި ފެށުނު 11 ސްކޫލުގައި، އެ މާއްދާ ކިޔަވައިދިނުމަށް މުދައްރިސުންނަށް ބޭނުންވާ ތަމްރީން ޕްރޮގްރާމްތައް ވަނީ ވަރަށް ފުރިހަމައަށް ކުރިއަށް ގެނދެވިފައެވެ. އެގޮތުން އެ، 11 ސްކޫލުން ޕްރިންސިޕަލުންނާއި، ޓިޗަރުންނާއި އަދި ފޯކަލް ޕޮއިންޓުން ހިމަނައިގެން ޤައުމިއްޔަތު މާއްދާގެ ތަޢާރަފާއި، މަންހަޖުގައި މާއްދާ އެކުލަވާލެވިފައިވާ ގޮތާއި އަދި ކިޔަވައިދޭނެ ގޮތުގެ މައުލޫމާތު ދެވިފައިވެއެވެ.  

މިހާރު ރާއްޖޭގެ 11 ސްކޫލެއްގައި މި މާއްދާކިޔަވައިދެން ފެށި ނަމަވެސް ސަރުކާރުގެ އަމާޒަކީ އަންނަ ދިރާސީ އަހަރުން ފެށިގެން ޤައުމީ މަންހަޖުގެ ތެރެއިން މި މާއްދާ ކިޔަވައިދޭން ފެށުންކަމަށް މިނިސްޓްރީން މައުލޫމާތު ދެއްވާފައިވެއެވެ.

ވަކި މާއްދާއެއްގެ ގޮތުގައި ރާއްޖޭގެ 11 ސްކޫލެއްގައި "ޤައުމިއްޔަތު" ކިޔަވައިދެން ފަށާފައިވާއިރު ، ކިޔަވާ ދަރިވަރުންގެ ހިތުގައި ޤައުމިއްޔަތު ދިރުވާ އާލާކުރުމަށް މިސަރުކާރުގެ ފަރާތުން އަންނަނީ ތަފާތު ޕްރޮގްރާމުތައް ހިންގަމުންނެވެ.

އެގޮތުން ސްކޫލުތަކުގެ ކިޔެވުން ފެށުމުގެ ކުރިން ކޮންމެ ދަންފަޅިއެއްގައި ވެސް އެސެމްބުލީ ބާއްވާ އެސެމްބުލީގައި ޤައުމިއްޔަތާއި ގުޅުންހުރި ހަރަކާތެއް ކުރިއަށް ގެންދިއުމަށާއި، ޤައުމީ ސަލާމް ކިއުމަށް ސްކޫލުތަކަށް ވަނީ އަންގާފައެވެ.