އަވައްޓެރި އިންޑިއާއަށް ނިސްބަތްކޮށް ރައީސް ޑރ. މުހައްމަދު މުއިއްޒު މީގެ ދެ ހަފުތާ ކުރިން ދެއްވި ބަހުގެ ހަމަލާތަކަށް، އެގައުމުގެ ބޮޑު ވަޒީރު ނަރެންދުރަ މޯދީގެ އަރިހުން މައާފަށް އެދިވަޑައިގަންނަވަން ޖެހޭ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހީމް ވިދާޅުވެއްޖެ އެވެ.

އިއްޔެ ބޭއްވި ޖުމްހޫރީ ޕާޓީގެ ކައުންސިލް ބައްދަލުވުމަށް ފަހު ބޭއްވި ނޫސްވެރިންގެ ބައްދަލުވުމައި ނޫސްވެރިއަކު ކުރި ސުވާލަށް ޖަވާބު ދެއްވަމުން ގާސިމް ވަނީ، އާސަންދަ އާއި ބޭސްފަރުވާގެ ކަންކަމާއި ބޭސް ހޯދުމަށް ވެސް އިންޑިޔާއަށް އެކަނި ބަރޯސާ ނުވުމަށް ރައީސް މުޢިއްޒު ދެއްކެވި ވާހަކަ ތަކަށް ރައްދު ދެއްވާފައެވެ.

އެގޮތުން ގާސިމް ވިދާޅުވީ، ނަން ވިދާޅުނުވި ނަމަވެސް އިންޑިޔާއަށް ނިސްބަތް ކުރައްވައި، އެގައުމުން ބޭސް ނުގެންނަން ނިންމެވި ކަމަށާ، އަދި އާސަންދަވެސް އެނޫން ގައުމުތަކުން ދޭގޮތަށް ނިންމުމެއް ނިންމެވި ކަން ދޭހަވާ ފަދަ މޭރުމުން ރައީސް މުޢިއްޒު ދެއްކެވި ވާހަކަތަކަކީ ރަނގަޅު ވާހަކަ ތަކެއް ނޫން ކަމަށް ގާސިމް ވިދާޅުވި އެވެ. 

ގާސިމް ވިދާޅުވީ ރައީސް އެވާހަކަތައް ދެއްކެވީ އޭރު ރާއްޖެއާއި އިންޑިޔާގެ ރައްޔިތުންގެ މެދުގައި އުފެދިފައި އޮތް ހަލަބޮލި ކަމުގެ ތެރެއިން ޖަޒުބާތުގައި ޖެހިވަޑައިގެން ކަމަށެވެ. އަދި އެވާހަކަތަކަށް އިންޑިޔާގެ ބޮޑުވަޒީރު ނަރެންދުރަ މޯދީގެ އަރިހުން މަޢާފަށް އެދެންޖެހޭ ކަމަށްވެސް ޤާސިމް ވިދާޅުވި އެވެ. 

މީގެ އިތުރުން ގާސިމް ވަނީ ޕީޕީއެމް/ ޕީއެންސީން އިދިކޮޅުގައި އޮވެގެން، ރާއްޖޭގައި އިންޑިޔާ ސިފައިން ތިބުމާއި ދެކޮޅަށް ކުރިއަށް ގެންދިޔަ އިންޑިޔާ އައުޓް ކެންޕެއިނާވެސް ދެކޮޅަށް ވާހަކަ ދައްކަވާފައެވެ. ނަމަވެސް، އޭނާވެސް ވަނީ ރާއްޖޭގައި އިންޑިޔާ ސިފައިން ގާއިމްވެ ތިބުމާއި ދެކޮޅު ހައްދަވާފައެވެ. 

ގާސިމް މިހެން ވިދާޅުވެފައި ވާއިރު، ރައީސް މުއިއްޒު ޗައިނާއަށް ކުރެއްވި ރަސްމީ ދަތުރު ނިންމާލެއްވުމަށްފަހު ވެލާނާ އިންޓަނޭޝަނަލް އެއާޕޯޓްގައި ވާހަކަ ދައްކަވަމުން އެމަނިކުފާނު ވަނީ ރާއްޖެއަކީ "ވަކި ގައުމެއްގެ ބެކްޔާޑުގައި އޮތް ގައުމެއް ނޫން" ކަމަށާ އަދި ދިވެހިރާއްޖެއަކީ ކިތަންމެ ކުޑަ ގައުމެއް ނަމަވެސް އެހެން ގައުމުތަކުން ގަނާ ކުރުމަށް ފުރުސަތު ނުދެއްވާނެ ވިދާޅުވެފައެވެ.