ހަނިމާދޫ އިންޓަނޭޝަނަލް އެއާޕޯޓްގައި ތަރައްގީ ކުރާ 2،460 މީޓަރުގެ އާ ރަންވޭގެ ތެރެއިން ނިމުނު 1،200 މީޓަރު ބޭނުންކުރަން ފަށައިފި އެވެ.

ރީޖަނަލް އެއާޕޯޓްސް ކޮންޕެނީ ލިމިޓެޑް (އާރުއޭސީއެލް) އިން ބުނީ އާ ރަންވޭގެ މަސައްކަތް މި އަހަރުގެ މާޗު މަހުގެ ތެރޭގައި އެއްކޮށް ނިންމާލެވޭނެ ކަމަށެވެ. އާ ރަންވޭ ފަރުމާ ކުރެވިފައިވަނީ ރޭގަނޑު ވެސް ދަތުރުތައް ކުރެވޭނެ ހިދުމަތްތަކާ އެކު ކަމަށް ވެސް އެކުންފުނިން މައުލޫމާތު ދެއެވެ.

އިންޑިއާގެ އެގްޒިމް ބޭންކުގެ ލޯނު ފައިސާ އިން ކުރިއަށް ގެންދާ ހަނިމާދޫ އިންޓަނޭޝަލް އެއާޕޯޓް ގެ މަޝްރޫއު ކުރިއަށް ގެންދަނީ ތިން ބަޔަކަށް ބަހާލައިގެން، ރަންވޭ އެއްކޮށް ބަންދު ނުކޮށެވެ. ރަންވޭގައި އިތުރަށް ނުނިމި އޮތް ބައި ނިންމުމަށް ކުރިން އަޅާފައިވާ ރަންވޭގެ ބައެއް ތަޅާލަން ޖެހޭއިރު، މި މަސައްކަތްތައް ކުރިއަށް ގެންދަނީ އެ އެއާޕޯޓުގެ އޮޕަރޭޝަންތަކަށް ބުރޫނާރާނެހެންނެވެ.

ހަނިމާދޫ އިންޓަނޭޝަނަލް އެއާޕޯޓުގެ އާ ރަންވޭގެ މަސައްކަތް ފެށީ މިދިޔަ އަހަރުގެ ޖެނުއަރީ މަހުއެވެ. މި މަޝްރޫއުގެ ދަށުން އަޅާ ރަންވޭގެ އިތުރުން އަހަރަކު 1.3 މިލިއަން ފަތުރުވެރިންނަށް ހިދުމަތް ދެވޭ ވަރުގެ ޓާމިނަލެއް ހެދުމަށްވެސް ވަނީ ހަމަޖެހިފައެވެ.

މި މަޝްރޫއު ނިމުމުން  އެއާބަސް އޭ320 އާއި ބޮއިން737 މަރުކާގެ ބޯޓުފަހަރަށް ހަނިމާދޫ އެއާޕޯޓުން ހިދުމަތް ދެވި، ރާއްޖޭގެ ފަތުރުވެރިކަން މިހާރަށްވުރެ ތަރައްގީ ވެގެންދާނެ ކަމަށް ސަރުކާރުން ވަނީ ބުނެފައެވެ.