މޯލްޑިވްސް ކޮލިފިކޭޝަން އޮތޯރިޓީގެ (އެމްކިޔުއޭ) ގެ ވަގު ތައްގަނޑެއް ޖަހައިގެން ތައުލީމީ ސެޓްފިކެޓުތަކެއް ރާއްޖޭގައި ބޭނުން ކުރަމުންދާ ކަމަށް އެ އޮތޯރިޓީން މިއަދު ބުނެފި އެވެ.
މިކަން ހާމަކޮށްފައި ވަނީ އެ އޮތޯރިޓީން ނެރުނު ބަޔާނެއްގައެވެ. އެ ބަޔާނުގައި ބުނެފައި ވަނީ އެ އޮތޯރިޓީގެ ވަގު ރިކޮގްނިޝަން ތައްގަނޑެއް ބޭނުންކޮށް، އެ އޮތޯރިޓީގެ މުވައްޒަފެއްގެ ސޮއި ކޮށްފައިވާ ސަނަދުތަކެއް ދައުރުވަމުންދާކަން އެ އޮތޯރިޓީގެ ސަމާލުކަމަށް އައިސްފައިވާ ކަމަށެވެ.
އެހެންކަމާއިއެކު މަތީ ތައުލީމު ފޯރުކޮށްދޭ އިދާރާތަކުންނާއި ވަޒީފާ ދޭ ފަރާތްތަކުން އެކަމަށް ސަމާލުވުމަށް އޮތޯރިޓީ ގެ ބަޔާނުގައި ވަނީ އިލްތިމާސްކުރައްވާފައެވެ.
"އޮތޯރިޓީގެ ފޭކު ތައްގަނޑު ބޭނުންކޮށް، މުވައްޒަފެއްގެ ސޮއި ކުރުން ފަދަ ކަންކަމަކީ މި އޮތޯރިޓީގެ މުވައްޒަފުންގެ ހައްގަށް ލިބޭ އުނިކަމެއް، އަދި މި އޮތޯރިޓީ އިން މަތީ ތައުލީމާއި ތަމްރީނުގެ ފެންވަރު ކަށަވަރު ކުރުމަށްޓަކައި ކުރަމުންދާ މަސައްކަތާ މެދު އާންމުންގެ މެދުގައި ސުވާލު އުފެދުމަށް މެދުވެރިވާ ކަމެއް" އެމްކިޔުއޭގެ ބަޔާނުގައި ބުނެފައިވެއެވެ.
އެމްކިޔުއޭގެ ބަޔާނުގައި އިތުރަށް ބުނެފައި ވަނީ އެ އޮތޯރިޓީއަށް އެ މައްސަލަ ފާހަގަވި ހިސާބުން އެކަންތައް ސަރުކާރުގެ ކަމާއި ގުޅުން ހުރި ފަރާތްތަކުގެ ސަމާލުކަމަށް ގެނެސްފައިވާ ކަމަށާއި، އަދި އެމައްސަލަ ތަހުގީގު ކުރުމަށް ކަމާއި ގުޅުންހުރި ފަރާތްތަކާއި މަޝްވަރާ ކުރަމުން ގެންދާ ކަމަށެވެ.
އެމްކިޔުއޭގެ ބަޔާން ނިންމާލައިފައި ވަނީ މިފަދަ ކަންކަމަށް މަތީ ތައުލީމް ފޯރުކޮށްދޭ އިދާރާތަކުންނާއި ވަޒީފާ ދޭ ފަރާތްތަކުން ސަމާލުވުމަށް އިލްތިމާސް ކުރައްވަމުންނެވެ.
Advertisement
This content is created and paid for by advertisers and does not involve Voice Journalists
