ރ.އަތޮޅު ކިނޮޅަސްގައި މިހާރު ކުރިއަށްދާ "23 ވަނަ ޖަމިއްޔަތުލް އިއްތިހާދު ވޮލީބޯޅަ ޓޯނަމަންޓް 2024" ގެ ފަސްވަނަ މެޗުގައި ތިން ސެޓު އެއް ސެޓުން ކޯކޯ ބަލިކޮށް ބޭރިއަންސް އިން ލީގު ބުރުގެ އެއްވަނައަށް ކުރިއަށް ޖެހިލައިފިއެވެ.

މުބާރާތުގައި ބޭރިއަންސް އިން ކުޅުނު ފުރަތަމަ މެޗުގައި ތިން ސެޓު އެއް ސެޓުން ހޭވައްލާ އަތުން އެޓީމު ބަލިވި ނަމަވެސް ދެވަނަ މެޗުގައި އެޓީމުން ވަނީ އެންމެ ފަހުގެ ޗެމްޕިއަން ރަށްގުޑުވާ ސީދާ ތިން ސެޓުން ބަލިކޮށްފަ އެވެ. އަދި ކޯކޯގެ ފުރަތަަމަ މެޗުގައި ތިން ސެޓު ދެ ސެޓުން ރަށްގުޑުވާ އަތުން އެޓީމު ބަލިވިއިރު، ދެވަނަ މެޗުގައި ހޭވައްލާ އަތުން އެޓީމު ވަނީ ތިން ސެޓް ދެ ސެޓުން މޮޅުވެފައެވެ.

ބޭރިއަންސް އާއި ކޯކޯ ވާދަކުރި މެޗުގެ ތެރެއިިން 

މިމެޗުގެ ފުރަތަަމަ ސެޓުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު މި ސެޓު 20-25 އިން ކާމިޔާބުކުރީ ބޭރިއަންސް އިންނެވެ. އަދި މެޗުގެ ދެވަަނަ ސެޓުގައި ފޯރިގަދަ ކުޅުމަކަށް ފަހު 31-29 އިން މިސެޓް ކާމިޔާބުކުރީ ކޯކޯ އިންނެވެ. ނަމަވެސް މެޗުގެ ތިންވަނަ ސެޓް ވާދަވެރި ކުޅުމަކަށްފަހު 26-24 އިން ކާމިޔާބުކުރީ ބޭރިއަންސް އިންނެވެ. އަދި މެޗުގެ ހަތަރުވަނަ ސެޓުގައި އެޓީމުގެ ފަރާތުން ތަފާތު މޮޅު ކުޅުމެއް ފެނިގެންދިޔަ އިރު މި ސެޓް ފަސޭހަކަމާއި އެކު އެޓީމުން ކާމިޔާބުކުރީ 16-25 އިންނެވެ.

ބޭރިއަންސް އާއި ކޯކޯ ވާދަކުރި މެޗުގެ ތެރެއިިން 

މިއާއެކު މެޗުގެ ކުޅުން ނިމިގެންދިޔައީ ތިން ސެޓު އެއް ސެޓުން ބޭރިއަންސް ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ބޭރިއަންސްގެ އިބްރާހިމް ފަޒީލު އެވެ.

މިއާއެކު ތިން މެޗުން ލިބުނު 6 ޕޮއިންޓާއެކު ލީގު ބުރުގެ އެއްވަނާގައި މިވަގުތު އޮތީ ބޭރިއަންސް އެވެ. އަދި މިމެޗުން ބަލިވި ކޯކޯއަށް ތިން މެޗުން ތިން ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ބުރުގެ ތިންވަނައިގައެވެ. އަދި މިވަގުތު ދެވަނާގައި އޮތް ހޭވައްލާ އަށް ދެ މެޗުން ހަތަރު ޕޮއިންޓް ލިބިފައިވާއިރު ލީގު ބުރުގެ ފުލުގައި މިވަގުތު އޮތީ ދެމެޗުން ލިބުނު ދެ ޕޮއިންޓާއެކު އެންމެ ފަހުގެ ޗެމްޕިއަން ރަށްގުޑުވާ އެވެ. 

މެޗުގެ މޮޅުކުޅުންތެރިއަކަށް ހޮވުނު ބޭރިއަންސްގެ އިބްރާހިމް ފަޒީލު 

މާދަމާރޭ ކުޅެވޭ ލީގު ބުރުގެ ފަހު މެޗުގައި އެންމެ ފަހުގެ ޗެމްޕިއަން ރަށްގުޑުވާ އިން ނުކުންނާނީ ހޭވައްލާ އާއި ދެކޮޅަށެވެ. 

26 ޖެނުއަރީ 2024 އިން 03 ފެބުރުއަރީ 2024 ގެ ނިޔަލަށް ކުރިޔަށް ގެންދިއުމަށް ހަމަޖެހިފައިވާ މިއަހަރުގެ މުބާރާތުގައި ހަތަރު ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާ އެއްފަހަރު ކުޅެ އެންމެ ގިނަ ޕޮއިންޓް ހޯދާ ޓީމަކަށް މުބާރާތުގެ ފައިނަލުން ޖާގަ ލިބޭގޮތަށެވެ. އަދި ފައިނަލްގެ ދެވަނަ ޖާގަ ލިބިގެންދާނީ ލީގު ބުރުގެ ދެވަނަ ޓީމާއި ތިންވަނަ ޓީމުގެ މެދުގައި ސެމީ ފައިނަލް މެޗެއް ކުޅެ އެމެޗުން މޮޅުވާ ޓީމަކަށެވެ.