ތުއްތުކުދިންނަށް ދޭ ބުއްފުޅި އާއި ތުން ރާއްޖެއަށް އެތެރެކުރާ ނަމަ ރަޖިސްޓްރީ ކުރަން ޖެހޭނެކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ އިން ބުނެފިއެވެ.

ފުޑް އެންޑް ޑްރަގް އޮތޯރިޓީ އިން މިފަދައިން ބުނެފައިވަނީ އެ ތަނުންކުރި އިޢުލާނެއްގައެވެ.  

އެ އިއުލާނުގައި ބުނެފައިވަނީ 2015 ވަނަ އަހަރު ޢާއްމުކުރި ޤަވާއިދަކުން ގާތުންދޭ ކިރުގެ ބަދަލުގައި ކުޑަކުދިންނަށް ދޭ ބާވަތްތައް ރާއްޖެއަށް އެތެރެކުރުމާއި އުފެއްދުމާއި ވިޔަފާރީގައި ބޭނުންކުރުމުގައި އަމަލުކުރާނެ ގޮތްތަކެއް ކަނޑައަޅާފައި ވީނަމަވެސް މިހާރަކަށް އައިސް ބައެއް ފަރާތްތަކުން އެ ޤަވާއިދަށް އަމަލުކުރަމުން ނުގެންދާ ކަމަށެވެ

Advertisement

އެހެންކަމާއި އެކު އެ އެތޯރިޓީވަނީ އެ ޤަވާއިދަށް އަމަލުކުރުމަށް އަންގާފައެވެ. އެގޮތުން އެތަނުން ބުނެފައިވަނީ ގާތުންދޭ ކިރުގެ ބަދަލުގައި ކުޑަކުދިންނަށް ދޭ ބާވަތްތައް ދިވެހިރާއްޖެއަށް އެތެރެކުރުމާއި، އުފެއްދުމާއި، ވިޔަފާރީގައި ބޭނުންކުރުމުގައި ޢަމަލުކުރާނެ ގޮތުގެ ޤަވާޢިދުގައި ބުނާ ބާވަތްތައް އެއޮތޯރިޓީގައި ރަޖިސްޓްރީ ކުރަންވާނެކަމަށެވެ.

އެގޮތުން ޤަވާއިދުގައި، ރެޖިސްޓްރީ ކުރަންޖެހޭ ކަމަށް ކަނޑައަޅާފައިވާ ތަކެތީގެ ތެރޭގައި ބުއްފުޅި އާއި ބުއްފުޅީގެ ތުން ހިމެނެއެވެ.

ފުޑް އެންޑް ޑްރަގް އޮތޯރިޓީގެ މި އިއުލާނުގައި އިތުރަށް ބުނެފައިވަނީ ގާތުންދޭ ކިރުގެ ބަދަލުގައި ކުޑަކުދިންނަށް ދޭ ބާވަތްތައް އެތަނުން ރަޖިސްޓްރީކޮށްދެނީ "ދިރިތި" ޕޯޓަލް މެދުވެރިކޮށް ކަމަށެވެ.

އެމްއެފްޑީއޭ ގެ އިއުލާނު ނިންމާލަމުން ބުނެފައިވަނީ މިއަހަރުގެ ޖުލައި 31 ގެ ފަހުން ޤަވާއިދުގައި ކަނޑައަޅާފައިވާ ބާވަތްތައް އެ އޮތޯރިޓީގައި ރަޖިސްޓަރ ކުރަންޖެހޭނެ ކަމަށެވެ.

މިފަހަކަށް އައިސް އެމްއެފްޑީއޭ އިން އަންނަނީ މިހެން ހުރި ގިނަ ކަންތައްތަކެއް ރަނގަޅުކުރުމުގެ އިތުރުން ރާއްޖެއަށް އެތެރެ ކުރެވޭ ކާނާގެ ބާވްތަތަކާއި، ބޭހުގެ ބާވަތްތަކަކީ ރައްކާތެރި ތަކެތިތޯ ބަލާ ކަށަވަރުކުރުމަށް ގިނަގުނަ މަސައްކަތްތަކެއް ކުރަމުންނެވެ.