މިފުކޯއަށް ލޯނެއް ނަގައިގެން ވިޔަސް މަސްވެރިންނަށް ނުދެވިހުރި ފައިސާގެ ކަންތައްތައް ހަމަޖައްސަވައި ދެއްވާނެކަމަށް ރައީސުލްޖުމުޙޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ މީސްމީޑިޔާ މެދުވެރިކޮށް އާއްމުންކުރާ ސުވާލުތަކަށް ސީދާ ރައީސް ޖަވާބު ދެއްވާގޮތަށް ރައީސުލްޖުމްހޫރިއްޔާގެ އޮފީހުން މިއަދު ފެށްޓެވި ސިލްސިލާ "ރައީސްގެ ޖަވާބު" ޕްރޮގްރާމުގައި ވާހަކަފުޅު ދައްކަވަމުންނެވެ.

މިއަދުގެ މި ޕްރޮގްރާމުގައި އާއްމުގެ މީހަކު ކުރި ސުވާލަކަށް ޖަވާބުދެއްވަމުން ރައީސް ޑރ.މުހައްމަދު މުއިއްޒު ވިދާޅުވީ މި ސަރުކާރު ވެރިކަމާއި ހަވާލުވިއިރު މަސްވެރިންނަށް ދޭންޖެހޭ 250 މިލިއަނެއްހާ ރުފިޔާ ހުރިކަމަށެވެ. އެހެން ނަމަވެސް މި ސަރުކާރު ވެރިކަމަށް އައިސް ދެ ފަހަރެއްގެ މަތިން 200 މިލިޔަން ރުފިޔާ މަސްވެރިންނާއި ހަވާލުކުރެވިފައިވާ ކަމަށެވެ. އެހެން ނަމަވެސްއަދިވެސް މަސްވެރިންނަށް ދޭންޖެހޭ ގިނަ އަދަދެއްގެ ފައިސާ އެބަހުރިކަމަށް ރައީސް ވިދާޅުވިއެވެ.

"ރައީސްގެ ޖަވާބު" ގައި ވާހަކަފުޅު ދައްކަވަމުން ރައީސް ޑރ.މުހައްމަދު މުއިއްޒު އިތުރަށް ވިދާޅުވީ މި ސަރުކާރުން މަސައްކަތް ކުރަނީ ވީހާވެސް އަވަހަކަށް މަސްވެރިންނަށް ނުލިބިހުރި ފައިސާ ހަމަޖައްސައިދެއްވުމަށެވެ.

ކުރިމަގުގައި މި ސަރުކާރުގެ ކަންތައްތައް ބައްޓަން ކުރައްވަމުން ގެންދަވާނީ މަސްވެރިންނަށް ބޮޑުއަދަދުތަކުން ދޭންޖެހޭ ފައިސާތައް ދިނުމުގައި ލަސްވެގެން ނުދާނެ ފަދަ ގޮތަކަށް ކަންތައްތައް އިންތިޒާމް ކުރުމަށް ކަމަށްވެސް ރައީސް ވިދާޅުވިއެވެ.

ރައީސުލް ޖުމުހުރިއްޔާގެ އޮފީހުން މިއަދު މިފެއްޓެވި ސިލްސިލާގެ ދަށުން ކޮންމެ ދުވަހަކުވެސް ރައިސުލްޖުމުހުރިއްޔާއަށް ވަގުތު ލިބިވަޑައިގެންނެވި ވަރަކުން އެމަނިކުފާނާއި ކުރެވޭ ސުވާލުތަކަށް ޖަވާބު ދެއްވާނެކަމަށް ރައީސުލް ޖުމުހުރިއްޔާގެ އޮފީހުން ވިދާޅުވެއެވެ.

މި ސަރުކާރު ވެރިކަމަށް އައުމަށްފަހު ރާއްޖޭގެ މަސްވެރިންގެ ކުރިއެރުމަށް އަންނަނީ ގިނަ ކަންތައްތަކެއް ކުރަމުންނެވެ. އެގޮތުން މިދިޔަ ސަރުކާރުން މަސްވެރިންނަށް ދޭން ޖެހިފައިވާ ފައިސާގެ ތެރެއިން ބޮޑުބައެއް ވަނީ ހަވާލުކޮށްފައެވެ.