މޯލްޑިވްސް ހައްޖު ކޯޕަރޭޝަންގެ ފަރާތުން ކުރާ ޢުމްރާ ދަތުރުތަކުގައި މައްކާއިން މަދީނާއަށް އަދި މަދީނާއިން މައްކާއަށް ބަހުގައި ދަތުރުކުރުމުގެ ބަދަލުގައި ހަރަމައިން ހައިސްޕީޑް ޓްރެއިން ބޭނުންކުރުމަށް ނިންމައިފިއެވެ.

އެކޯޕަރޭޝަނުން މިކަން ހާމަކޮށްފައިވަނީ އެކަން ހާމަކޮށް މިރޭ ނެރުނު ނޫސް ބަޔާނެއްގައެވެ.

މި ބަޔާނުގައި އެކޯޕަރޭޝަނުން ބުނެފައިވަނީ އެގޮތަށް ނިންމުމުގެ އެންމެ ބޮޑު ބޭނުމަކީ  ޢުމްރާ ދަތުރުތަކާއި ގުޅުންހުރި ޚިދްމަތްތައް ލުއިފަސޭހަ އަދި ރަނގަޅު ފެންވަރެއްގައި ފޯރުކޮށްދިނުން ކަމަށެވެ.

Advertisement

މައްކާއިން މަދީނާއަށް އަދި މަދީނާއިން މައްކާއަށް ކުރާ ބަސް ދަތުރުތަކަކީ ގާތްގަނޑަކަށް 6  ނުވަތަ 8 ގަޑީއިރު އޭގައި ހޭދަވާ ވަރަށް އުނދަގޫ ދަތުރުތަކެއް ކަމަށާއ، މިހައި ގިނަ ވަގުތު ބަހުގައި ހޭދަކުރަންޖެހުމުން ޢުމްރާވެރިންގެ މެދުގައި ފަސޭހައިން ހުމާއި ރޯގާ ފެތުރޭކަންވަނީ ފާހަގަކުރެވިފައިކަމަށް ހައްޖު ކޯޕަރޭޝަންގެ ބަޔާނުގައި ބުނެފައިވެއެވެ.

ހައްޖު ކޯޕަރޭޝަނުން ބުނިގޮތުގައި ޓްރެއިންގައި ކުރާ ދަތުރުގެ ދިގު މިނަކީ ގާތްގަނޑަކަށް 2 ގަޑީރު ނުވަތަ 2 ގަޑިއިރާއި 20 މިނެޓް ކަމަށާއި އެހެންކަމުން ވަގުތުގެ ގޮތުން ބެލިކަމުގައި ވީނަމަވެސް، މިއީ ޢުމްރާވެރިންނަށް ލިބިގެންދާ ވަރަށް ބޮޑު ލުއި ފަސޭހަކަމެއް ކަމަށެވެ. އަދި މި ޓްރެއިންތަކަކީ ވަރަށް ޖާގަ ތަނަވަސް، ރަނގަޅު ފެންވަރުގެ ޚިދްމަތްތަކެއް ޢުމްރާވެރިންނަށް ފޯރުކޮށްދޭ ޓްރެއިންއެއް ކަމަށްވެސް އެބަޔާނުގައި ބުނެފައިވެއެވެ.

މައްކާއިން މަދީނާއަށް އަދި މަދީނާއިން މައްކާއަށް ބަހުގައި ދަތުރުކުރުމުގެ ބަދަލުގައި ހަރަމައިން ހައިސްޕީޑް ޓްރެއިން ބޭނުންކުރުމަށް ނިންމުމުގެ ސަބަބުން އެ ކޯޕަރޭޝަންގެ ފަރާތުން އިތުރު ޚަރަދެއް ކުރަންޖެހުނު ނަމަވެސް، މިހާރު ޢުމްރާތަކަށް ނަގަމުންދާ އަގު ބޮޑު ނުކޮށް އެ އަގުގެ ތެރެއިން އެ ޚިދްމަތްދިނުމަށް ނިންމާފައިވާ ކަމަށްވެސް ކޯޕަރޭޝަނުގެ ބަޔާނުގައި ވެއެވެ.

މޯލްޑިވްސް ހައްޖު ކޯޕަރޭޝަންގެ ބަޔާން ނިންމާލަމުން ބުނެފައިވަނީ ބަހުގައި ކުރަމުން ދިޔަ ދިގު ތަކުލީފް ބޮޑު ދަތުރުތައް ޓްރެއިންގައި ފަސޭހަ އަވަސް ދަތުރުތަކަކަށް ބަދަލުކުރަން ނިންމާފައިވާ  ނިންމުމަކީ ރައީސް ޑރ. މުޙައްމަދު މުޢިއްޒު މި ކޯޕަރޭޝަނުގެ މަސައްކަތްތައް ކުރިއެރުވުމަށް ދެއްވާ ސަމާލުކަމާއި އެހީތެރިކަމުގެ ސަބަބުން ފަހިވެގެންދިޔަ ފުރުސަތެއް ކަމަށެވެ.