ރައީސުލްޖުމުހޫރިއްޔާ ޑރ. މުހައްމަދު މުއިއްޒުގެ ސަރުކާރުން މާލޭގައި އިމަރާތް ކުރުމަށް ހަމަޖެހިފައިވާ އެންމެ ޒަމަނީ މާރުކޭޓު ހަދާ ނިމުމާއި އެކު މާރުކޭޓުގެ ގޮޅިތަކުގައި މިހާރު ބިދޭސީން ކުރަމުން ގެންދާ ވަޔަފާރިތަކަށް ނިމުން އައިސް އެކަންތައް މުޅިން ހައްލުވެގެން ދާނެ ކަމަށް ރައީސް ޑރ،. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ މީސްމީޑިޔާ މެދުވެރިކޮށް އާއްމުންކުރާ ސުވާލުތަކަށް ސީދާ ރައީސް ޖަވާބު ދެއްވާގޮތަށް ރައީސުލްޖުމްހޫރިއްޔާގެ އޮފީހުން ދާދިފަހުން ފެއްޓެވި ސިލްސިލާ "ރައީސްގެ ޖަވާބު" ޕްރޮގްރާމުގައި ވާހަކަފުޅު ދައްކަވަމުންނެވެ.

އެ ސިލްސިލާގެ ދެވަނަ ޕްރޮގްރާމުގައި  މާރުކޭޓުގެ ހާލަތާއި އަދި ބިދޭސީން ގޮޅިތަކުގައި ވިޔަފާރިކުރާތީ ހުރި ކަންބޮޑުވުންތަކާއި ގުޅިގެން ހއ.ބާރަށު، މަދޮށިމާގޭ، ޢަބްދުﷲ އިބްރާހީމް މަނިކު ކުރެއްވި ސުވާލަށް، ޖަވާބު ދެއްވަމުން ރައީސް ވިދާޅުވީ، މާލޭގެ ދަތުރުވެރިންގެ މާރުކޭޓް އަދި ލޯކަލް މާރުކޭޓަކީ ވެސް އެންމެ އެކަށޭނެ ގޮތަށް ހުރި ތަންތަން ނޫން ކަމަށެވެ.

Advertisement

ޢަބްދުﷲގެ ސުވާލަށް، ޖަވާބު ދެއްވަމުން ރައީސް އިތުރަށް ވިދާޅުވީ އެ ދެ މާރުކޭޓްގެ ބަދަލުގައި ދުނިޔޭގެ އެންމެ ރަނގަޅު ފެންވަރުގެ މާރުކޭޓް ހުރި ތަންތަނުގައި ހުންނަ ފަދަ އިމާރާތެއް، އެތަނުގައި އަޅަން ނިންމާފައިވާ ކަމަށާއި އަދި އެތަން އަޅަސް ބޭނުންވާ ހުރިހަ އިންތިޒާމްތަކެއް މާލޭ ސިޓީ ކައުންސިލަށް ހަމަޖައްސަވައި ދެއްވަފައިވާ ކަމަށެވެ.

ރައީސް އިތުރަށް ވިދާޅުވީ އާ މާރުކޭޓުގެ މަސައްކަތް ވަރަށް އަވަހަށް ފެށިގެން ދާނެ ކަމަށާއި މިހާރު ހުރި މާރުކޭޓު ރޫޅާލައި ވަގުތީ މަރުކޭޓެއް ހަދާ އެ މާރުކޭޓަށް މިވަގު ގޮޅިތައް ހިފާގެން ތިބި ފަރާތްތައް ބަދަލުކުރެވިގެން ދާނެ ކަމަށެވެ. އެގޮތަށް އެމަސައްކަތް ކޮށް އާ މާރުކޭޓް އެޅި އެތަނުގެ ޚިދުމަތްތައް ލިބެން ފެށުމުން ބިދޭސީންގެ މައްސަލައަށް ހައްލު ލިބިގެންދާނެ ކަމަށްވެސް ރައީސް ވިދާޅުވިއެވެ.