މިހާރު ވަރަށް ބޮޑަށް އާއްމުވަމުން އަންނަ އެއް ބަލިކަމަށްވާ ކެންސަރުބަލިން ރައްކާތެރިވުމަށް ޖަހާ  ހިއުމަން ޕެޕިލޯމާ ވައިރަސް (އެޗްޕީވީ) ވެކްސިން ދިނުން މިއަދު ހަވީރު އޮންނާނެ ކަމަށް ހެލްތު ޕްރޮޓަކްޝަން އެޖެންސީން ހާމަކުރައްވާފިއެވެ.

އެ އެޖެންސީން މިކަން ހާމަކުރައްވާފައި ވަނީ އެކްސް މެދުވެރިކޮށް މިއަދު ކުރި ޕޯސްޓެއްގައެވެ.

އެގޮތުން ހެލްތް ޕްރޮޓެކްޝަން އޭޖެންސީ (އެޗްޕީއޭ)ގެ ޕޯސްޓުގައި ބުނެފައިވަނީ އުމުރުން 10 އަހަރާއި 15 އަހަރާ ދެމެދުގެ އަންހެން ކުދިންނަށް އެޗްޕީވީ ވެކްސިން ދިނުން މިއަދު ހަވީރު ހެންވޭރު ދަނޑުގައި ކުރިއަށް ގެންދިއުމަށް ހަމަޖެހިފައިވާ ކަމަށެވެ.

Advertisement

އެޕޯސްޓުގައި އިތުރަށް ބުނެފައިވާ ގޮތުގައި ވެކްސިން ދިނުން ކުރިއަށްދާނީ މިއަދު ހަވީރު 16:00 އިން 18:00 އަށް ކަމަށާއި ވެކްސިން ޖަހަން އަންނަ އިރު ވެކްސިން ކާޑު ގެނައުމަށް އެދޭ ކަމަށެވެ.

މަޢުލޫމާތު ލިބިފައިވާ ގޮތުގައި މި ހަރަކާތަކީ ދުނިޔޭގެ ކެންސަރު ދުވަހާއި ގުޅިގެން އެޗްޕީއޭއިން ބާއްވާ ހަރަކާތެކެވެ.  

އެޗްޕީވީ ވައިރަހަކީ ނުރައްކާތެރިކަން ކުޑަ އަދި އަވަހަށް ރަނގަޅުވާ ވައިރަހެއް ނަމަވެސް ބައެއްފަހަރު މި ވައިރަހުން ރަހިމުގެ ދޮރަށްޖެހޭ ކެންސަރަށް މަގުފަހިވާކަމަށް ދިރާސާތަކުން ދައްކައެވެ.

އެޗްޕީގެ ފަރާތުން މިއަދު އެޗްޕީވީ ވެކްސިން ދިނުމަށް ހަމަޖެހިފައިވާ އިރު ރާއްޖޭގައި ހޯއްގޮވާކެންސުމުގެ ކޭސްތަކެއް ފެނިގެން އެކަމަށް ސަމާލުވުމަށް ވެސް ވަނީ މީގެ ދުވަސްކޮޅެއް ކުރިން އެ އެޖެންސީން އިލްތިމާސްކޮށްފައެވެ.

ހޯއްގޮވާކެންސުމަކީ ގަވާއިދުން ވެކްސިން ދޭންފެށުމާއި ގުޅިގެން ކޮންޓްރޯލް ކުރެވިފައިވާ ބައްޔެއް ނަމަވެސް މަދު މަދުން ރާއްޖެއިން ފެންނަ ބައްޔެކެވެ. މިފަހަރު މި ބަލި ފެނިފައިވަނީ  މިދިޔަމަހުގެ 23 ވަނަ ގއ.ވިގިލިންނެވެ. މިހާތަނަށް އެރަށުން މި ބަލީގެ 5 ކުއްޖެއް ފެނިފައިވާ ކަމަށް އެޗްޕީއޭއިން ހާމަކޮށްފައިވެއެވެ.