ހުރިހާ ދިވެހިން ތެލިސީމިއާ އަށް ޓެސްޓްކުރުމަށް އަމާޒުހިފާ، ތެލިސީމިއާއަށް ހޭލުންތެރި ކުރުވުމަށް ފެށި ޤައުމީ ކެންޕެއިންގެ ދަށުން ގްރޭޑް 10 ގައި ކިޔަވަމުން ގެންދާ ދަރިވަރުން ތެސީމިއާއަށް ސްކުރީން ކުރަން ފަށައިފިއެވެ.

މިގޮތުން އެންމެ ފުރަތަމަ ތެލިސީމިއާއަށް ސްކްރީން ކުރުމުގެ ހަރަކާތް ކުރިއަށް ގެންގޮސްފައިވަނީ އަރަބިއްޔާ ސްކޫލުގެ ގްރޭޑް 10 ގައި ކިޔަވަމުން ގެންދާ ދަރިވަރުންނަށެވެ. އޭގެ އިތުރުން ގްރޭޑް 10 ގެ ދަރިވަރުންގެ ބެލެނިވެރިން ހިމެނޭނެހެން ހުރިހާ ގްރޭޑެއްގެ ބެލެނިވެރިންނަށް ތެލިސީމިއާއަށް ހޭލުންތެރި ކުރުވުމުގެ ޕްރޮގްރާމް ހިންގުމަށް ހަމަޖެހިފައި ވެއެވެ.

މި ޕްރޮގްރާމް އިފުތިތާހުކުރުމުގެ ރަސްމިއްޔާތު ޝަރަފުވެރިކޮށްދެއްވީ ސްޓޭޓް މިނިސްޓަރ ޢާއިޝަތު ޞަފޫރާއެވެ.

Advertisement

ތެލިސީމިއާ ބައްޔަށް ދިވެހިން ހޭލުންތެރިކުރުވާ، ކުރިއަށް އޮތް 10 އަހަރަށް އަމާޒުކޮށް ރާއްޖޭގައި ތެލިސީމީއާ އަށް އުފަންވާ ކުދިންގެ ރޭޓް 50 އިންސައްތައަށް ދަށްކުރުމުގެ ވަރުގަދަ އަޒުމާއިއެކުގައި މި މަހު 1 ގައި ފެއްޓި ޤައުމީ ކެންޕެއިން ފައްޓަވައި ދެއްވާފައި ވަނީ ސިއްހަތާއި ބެހޭ ވަޒީރު ޑރ. އަބްދުالله ހަލީލެވެ.

މި ޤައުމީ ކެންޕެއިން ފައްޓަވައި ދެއްވަމުން މިނިސްޓަރ ހަލީލު ވިދާޅުވީ ރާއްޖޭގައި މި ފެށޭ ކެމްޕެއިންގެ ތެރެއިން ރާއްޖޭގެ ހުރިހާ ފަރާތްތަކެއް ތެލެސީމިއާ އަށް ޓެސްޓު ކުރެވިގެން ދާނެކަމަށާއި، ރާއްޖޭގައި ތެލެސީމިއާ ބައްޔަށް ބަލާއިރު، ރާއްޖޭގެ އާބާދީގެ 17 އިންސައްތަ އަކީ ތެލެސީމިއާ ބަލީގެ މީހުން ނުވަތަ  އޭގެ އަލާމާތްތައް ހުރި މީހުން ކަމަށެވެ.

ތެލިސީމިއާ ބައްޔަށް އާއްމުން ހޭލުންތެރި ކުރުވުމަށް ހިންގާ ޤައމީ ބޮޑު ކެމްޕެއިން ފެށުނު ދުވަހު ސިއްހަތާއި ބެހޭ ވުޒާރާއިން މައުލޫމާތު ދެއްވާފައިވާ ގޮތުގައި ކުރިއަށް އޮތް 4 މަސް ދުވަހުގެ ތެރޭގައި މާލޭ ކައިރި ސަރަހައްދުގެ ދަރިވަރުންނަށް ހޭލުންތެރިކަމުގެ ޕްރޮގްރާމުތައް ހިންގާ ނިންމަވާލެވޭނެކަމަށެވެ.

މިއަދު އަރަބިއްޔާ ސްކޫލުގައި ބޭއްވުނު ތެލެސީމިއާ ސްކްރީނިންގ ޕްރޮގްރާމް އިފުތިތާހުކުރުމުގެ ރަސްމިއްޔާތު ޝަރަފުވެރިކޮށްދެއްވީ ސްޓޭޓް މިނިސްޓަރ ޢާއިޝަތު ޞަފޫރާއެވެ.