ހަނިމާދޫ އިންޓަނޭޝަނަލް އެއާރޕޯޓުން އިންޑިއާގެ ޓްރިވަންޑްރަމް ފިޔަވާ އިތުރު ސިޓީތަކަށް ދަތުރުތައް ފެށުމަށް މަސައްކަތް ކުރަމުން އަންނަ ކަމަށް އައިލޭންޑް އޭވިއޭޝަނުން ބުނެފިއެވެ.

މިކަން ހާމަކޮށްފައި ވަނީ ދައުލަތުގެ މީޑިޔާ ޕީއެސްއެމް ނިއުސްއަށް މަޢުލޫމާތު ދެއްވަމުން އައިލޭންޑް އޭވިއޭޝަންގެ ޑެޕިއުޓީ މެނޭޖިން ޑިރެކްޓަރ އަލީ ސަލީމެވެ.

އަލީސަލީމް ވިދާޅުވީ އެކުންފުނިން ދަތުރު ކުރަމުން ގެންދާ އެއާރޕޯޓްތަކުގެ ތެރެއިން ހަނިމާދޫ އިންޓަނޭޝަނަލް އެއާރޕޯޓަކީ އެންމެ ޑިމާންޑު ބޮޑު އެއް އެއާރޕޯޓުކަމަށެވެ.

އެހެންކަމާއިއެކު މިހާރު އެކުންފުނީގެ އަމާޒު ހިފާފައި ވަނީ އިންޑިއާގެ ޓްރިވަންޑްރަމް ފިޔަވާ އެ ޤައުމުގެ އެހެން މަންޒިލްތަކަށް ދަތުރުތައް ފެށޭނެގޮތެއް ހޯދުމަށެވެ.

އެކަމުގެ ތަފްސީލް ދެއްވަމުން ސަލީމް ވިދާޅުވީ އެކުންފުނީގެ ކޮމާޝަލް ޓީމުން ދަނީ ދިރާސާތައް ކުރަމުން ކަމަށާއި، އެކަން ކުރިއަށް ގެންދިއުމުގައި ބޮޑު ތިލަދުންމަތީ ސަރަޙައްދުގައި ފަތުރުވެރިކަން ކުރިއަށްގެންދާ މީހުންނާއި އެހެނިހެން ވިޔަފާރިވެރިންނާއި އަދި އާންމުންގެ ޚިޔާލު ހޯދަމުންދާ ކަމަށެވެ

ސަލީމް މިފަދައިން ވިދާޅުވެފައިވާއިރު ހަނިމާދޫ އިންޓިނޭޝަނަލް އެއާރޕޯޓް ތަރައްޤީކުރުމުގެ ބިޔަ ބޮޑު މަޝްރޫއެއް މިހާރު ވަނީ ފެށިފައެވެ.

އެގޮތުން ހަނިމާދޫ އެއާޕޯޓަށް 2.24 ކިލޯމީޓަރުގެ ރަންވޭއެއް އިތުރުކުރެވިގެންދާއިރު، އެއާޕޯޓް ތަރައްގީކޮށް ނިމުމުން ބައިނަލްއަގްވާމީ ދަތުރުތަކުގައި ބޭނުންކުރާ އެއާބަސް A320 އާއި ބޯއިންގް 737 ސައިޒުގެ ބޯޓުތަކަށް ހިދުމަތް ދެވޭނެ އެވެ.