ނިމިދިޔަ ރައީސް އިބުރާހިމް މުހައްމަދު ޞާލީހްގެ ސަރުކާރުގެ އެންމެފަހު ދުވަސްކޮޅު "ގެދޮރުވެރިޔާ" ސްކީމުގެ ދަށުން ދޫކުރި 4000 ފުލެޓްގެ ތެރެއިން 2400 ފުލެޓް ދޫކޮށްފައިވަނީ  ޝަރުތު ހަމަ ނުވާ މީހުންނަށް ކަމަށް އެންޓި ކޮރަޕްޝަން ކޮމިޝަން (އޭސީސީ) އިން މިއަދު ބުނެފި އެވެ.

އޭސީސީން މިކަން ހަމަކޮށްފައިވަނީ  4000 ފުލެޓްގެ މައްސަލާގައި އޭސީސީއަށް ހުށަހެޅު މައްސަލަ ތަޙްޤީގު ކުރުމަށްފަހު އެކަމާއި ގުޅޭ މައުލޫމާތުތައް ނޫސްވެރިންނަށް ހިއްސާކުރުމަށް މިއަދު ބޭއްވުނު ބައްދަލުވުމެއްގައެވެ.

އޭސީސީގެ މި ބައްދަލުވުމުގައި އެއިދާރާއިން ހާމަކުރެއްވި ގޮތުގައި އެ ކޮމިޝަނުން ކުރި ތަހުގީގުގައި ޖުމްލަ 4،048 ފޯމެއް ބެލި ކަމަށާއި، އޭގެ ތެރެއިން 59.6 ޕަސެންޓް ފޯމުގެ ޝަރުތު ހަމަނުވާކަމަށެވެ. ފުލެޓްތަކުގެ އަދަދަށް ބަލާއިރު އެއީ ގާތްގަނޑަކަށް 2،400 ފްލެޓްކަމަށްވެސް އެކޮމިޝަނުން ހާމަކުރެއްވިއެވެ.

އެސީސީން ހާމަކުރެއްވި ގޮތުގައި ފުލެޓްލިބުމުގެ ޝަރުތު ހަމަވެ، އެއްވެސް މައްސަލައެއް ނޫޅޭ ފޯމްގެ އިންސައްތައަކީ 20.7 އެވެ. ސަރުތު ހަމަވި ނަމަވެސް 19.7 އިންސައްތަ ފޯމުގައި މައްސަލަހުރި ކަމަށް އޭސީސީން ވިދާޅުވިއެވެ. ފުލެޓަށް ބަލާނަމަ އެއީ 1600 ފުލެޓެވެ.

އޭސީސީން މިއަދު މިހެން ވިދާޅުވެފައިވާއިރު، ނިމިދިޔަ ސަރުކާރުން ފުލެޓް ލިބުނު ބައެއް ފަރާތްތަކަކަށް ވަނީ ލިޔުންވެސް ހަވާލު ކުރައްވާފައެވެ. 

އެކަމާއި ގުޅޭގޮތުން އޭސީސީގެ ރައީސް އާދަމް ޝާމިލް ވިދާޅުވީ ފްލެޓް ލިބިފައިވާ މީހުންނާއި އެގްރިމެންޓް ހަދައި ލިޔުން ދީފައިވާ މީހުންނާ ދޭތެރޭ ދެން ހަދާނެ ގޮތެއް އެނގޭނީ ހައުސިން މިނިސްޓްރީ އަށް ކަމަށާއި އެއީ އޭސީސީގެ މެންޑޭޓްގެ ތެރޭގައި ހިމެނޭކަމެއް ނޫންކަމަށެވެ.