"ގެދޮރުވެރިޔާ" އަދި "ބިންވެރިޔާ" ސްކީމްގެ ދަށުން ގޯތި ދިނުމުގައި ރައީސް ޑރ. މުހައްމަދު މުޢިއްޒުގެ އަނބިކަނބަލުން އަދި ފަރސްޓް ލޭޑީ، ސާޖިދާ މުހައްމަދު ލިސްޓެއް ގެންގުޅޭ ކަމަށް ދެކެވޭ ވާހަކަތައް ރައީސް ދޮގުކުރައްވައިފިއެވެ.
ރައީސް މުޢިއްޒު މިހެން ވިދާޅުވީ އާންމުންގެ ސުވާލުތަކަށް ޖަވާބު ދިނުމުގެ ގޮތުން ރައީސް އޮފީހުން ފަށާފައިވާ ޕްރޮގްރާމް "ރައީސްގެ ޖަވާބު" ގައި، ސަރުކާރުން ފްލެޓް ބަހާ ގޮތާއިމެދު ފެތުރޭ ބައެއް ވާހަކަތަކުގެ ހަގީގަތް ހޯއްދެވުމަށް، ހުޅުމާލެ ފްލެޓް 104، ފާޠިމަތު އާދަމް ކުރެއްވި ސުވާލަށް ޖަވާބުދާރީ ވަމުންނެވެ.
މިސުވާލަށް ޖަވާބު ދެއްވަމުން ރައީސް މުޢިއްޒު ވިދާޅުވީ އެއީ ރައްޔިތުންގެ ހިތުގައި ޝައްކު އުފައްދަން ބަޔަކު ކުރާ މަސައްކަތުގެ ތެރެއިން އުފެދިފައި އޮތް ސުވާލެއް ކަމަށެވެ.
އަދި އެމަނިކުފާނު ވިޔަސް، އަނބިކަނބަލުން ސާޖިދާ މުހައްމަދު ވިޔަސް، ރައްޓެއްސެއް ވިޔަސް، ސަރުކާރުގެ މަޤާމުގައި ހުންނެވި ބޭފުޅެއް ވިޔަސް ނުފޫޒު ފޯރުވައިގެން މި ސަރުކާރުގައި ރައްޔިތުންގެ އެއްވެސް ޙައްޤަކަށް އަރަިނުގަނެވޭނެކަމުގެ ޔަޤީންކަން ރައީސް މުޢިއްޒު ވަނީ ދެއްވާފައެވެ.
ރައީސް ވިދާޅުވީ ފްލެޓް ލިސްޓް ވިޔަސް ގޯތި ލިސްޓް ވިޔަސް، އަދި އެހެން ޕްރޮގްރާމެއްގެ ތެރެއިން ހަމަޖެހޭ ކަމެއް ކަމުގައި ވިޔަސް، އެކަން ކުރިޔަށްދާނީ އިންސާފުވެރިކަމާ ހަމަހަމަކަމާ އެކީގައި ދެފުށް ފެންނަ ގޮތަށް ކަމަށެވެ. އަދި އެއިން އެއްވެސް ކަމެއްގައި އެހެން މީހެއްގެ ނުފޫޒެއް ފޯރުވުމަކީ ޖާގަ ދޭނެ ކަމެއް ނޫންކަމަށާއި، އެކަހަލަ ކަމެއް ހިންގާ މީހަކަށް ފިޔަވަޅު އަޅުއްވާނެ ކަމަށް ވެސް ރައީސް މުޢިއްޒު ވިދާޅުވިއެވެ.
"މިހާރު ނެރޭ ލިސްޓު ނޫނީ އެކަހަލަ ކަމަކާ ގުޅޭގޮތުން އެ ދައްކާ ވާހަކަ އަކީ އެއްގޮތަކަށްވެސް ހަޤީޤަތެއް ހިމެނޭ ކަމެއްނޫން. އެއީ ދޮގު ވާހަކަތަކެއް ފަތުރައިގެން ފިތުނަ އުފައްދަން ދައްކާ ވާހަކަތަކެއް." ކަމަށްވެސް ރައީސް މުޢިއްޒު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
