މިޔަރެއް ހަމަލާދީ ދިވެހި މަސްވެރިއެއްގެ އަތް ވަރަށް ބޮޑަށް ޒަހަމްކޮށްލައިފިއެވެ.
މަސްވެރި އިހަވަންދޫގެ އެފްބީ ޕޭޖުގައި މިއަދު ކުރި ޕޯސްޓެއްގައި ބުނެފައިވާ ގޮތުން، މިޔަރު ހަމަލާދީފައިވަނީ ހއ. އަތޮޅުން ފާނަ މަސްވެރިކަން ކުރަމުންދިޔަ، ފ. ފިއަލީ ދޯންޏެއްގައި ހުރި މީހަކަަށް ކަމަށެވެ.
އަދި އެއީ 28 އަހަރުގެ ދިވެހި ފިރިހެނެއް ކަމަށާ ހަމަލާ ދިނުމުގެ ސަބަބުން އެމީހާގެ އަތް ވަރަށް ބޮޑަށް ޒަހަމްވެފައިވާ ކަމަށެވެ.
އެމީހާއަށް ހއ.ހޯރަފުށީ ސިއްހީ މަރުކަޒުން ފަރުވާ ދިނުމަށްފަހު ލޭ މަނާ ނުވެގެން އިތުރު ފަރުވާ ދިނުމަށްޓަކައި ކުޅުދުއްފުށީ ރީޖަނަލް ހޮސްޕިޓަލަށް ވަނީ ގެންގޮސްފައެވެ.
މި ހާދިސާއާ ގުޅިގެން ކުޅުދުއްފުށީ ހޮސްޕިޓަލުން ބުނީ އެމީހާއަށް ލިބުނު ޒަހަމު ހަ ސެންޓިމީޓަރު ފުން ކަމަށެވެ. ކުޅުދުއްފުށީ ހޮސްޕިޓަލުން މިހާރު އަންނަނީ އޭނާއަށް ފަރުވާ ދެމުންނެވެ.
މިއަދު މީހަކަށް މިޔަރެއް ހަމަލާދީފައިވާ އިރު، މިދިޔަ އާދިއްތަ ދުވަހުވެސް ވަނީ ވަލެއްގައި އޮޅިފައި އޮތް މިޔަރެއް ސަލާމަތްކުރަން އުޅުނު ބަޔަކަށް މިޔަރެއް ހަމަލާ ދީފައެވެ.
Advertisement
This content is created and paid for by advertisers and does not involve Voice Journalists
