ބަލިވީމަ ބަލި ގަބޫލު ނުކުރެވިގެން އުޅުއްވަން މިއީ ރައީސް ނަޝީދެއް ނޫންކަމަށް ރައްޔިތުންގެ މަޖިލިހުގެ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް މިއަދު ވިދާޅުވެއްޖެއެވެ.
20 ވަނަ ރައްޔިތުންގެ މަޖިލީހުގެ އެމްޑީޕީ ޕްރައިމަރީން ރޮޒައިނާ ވާދަކުރި ފޭދޫ ދެކުނު ދާއިރާ އިން ވަނީ ބަލިވެފައެވެ.
މިކަމާއި ގުޅިގެން އެކަމަނާ އެކްސް ގައި ކުރެއްވި ޕޯސްޓެއްގައި ވިދާޅުވީ 20 ވަނަ މަޖިލީހަށް ދެން ވާދަކުރައްވާނެ ގޮތެއް ނޯންނާނެ ކަމަށާއި، ކުރިމަތިލީ ދާއިރާގެ ޓިކެޓު ލިބުނަސް، ކުރިމަތި ނުލައްވާނެ ކަމަށެވެ.
"ވަރަށް ސާފުކޮށް ދަންނަވަން. އަޅުގަނޑު 20 ވަނަ މަޖިލީހަށް ދެން ވާދަ ކުރާނެ ގޮތެއް ނޯންނާނެ! އަޅުގަނޑު މިއީ ރައީސް ނަޝީދެއް ނޫން ބަލިވީމަ ބަލި ގަބޫލު ކުރަން ނޭނގިގެން އުޅޭކަށް! އަޅުގަނޑު ކުރިމަތިލީ ދާއިރާގެ ޓިކެޓް ދެން ލިބުނަސް، އެތަނަށް ވެސް ނުލާނަން. މީނދީ ހާދަ ބޮލަށް ފަސޭހަ ވެފައޭ! އެހެންވީމަ އަނެއްކާވެސް ކޮންމެވެސް ވާހަކައެއް ވިހައިގެން އަޅުގަނޑު ބޮލަށް ޖަހާފަ މިތާ އަޅުގަނޑާއި އަޅައިގަނެގެން އުޅެން ނުހައްދަވާ!"
ރޮޒައިނާ ވިދާޅުވިއެވެ.
ރޮޒައިނާ އަށް ނާކާމިޔާބީ އާއި ކުރިމަތިލައްވަން ޖެހުނަސް އެކަމަނާގެ ފިރިކަލުން މުހައްމަދު ނާޝިޒް ވަނީ ބޮޑު ތަފާތަކުން ކިނބިދޫ ދާއިރާގެ އެމްޑީޕީގެ ޓިކެޓު އިތުރު ދައުރަކަށް ކަށަވަރު ކުރައްވައިފައެވެ.
ރޮޒައިނާ މިފަދައިން ވިދާޅުވެފައިވާއިރު، އެމްޑީޕީން ވަނީ އެޕާޓީގެ ޕްރައިމަރީގައި ކާށިދޫ ދާއިރާގެ ގޮނޑި ކާމިޔާބު ކުރެއްވި އަބްދުﷲ ޖާބިރުގެ ގޮނޑި އަތުލައި ޕާޓީން ވަކިކޮށްފައިކަން ފާހަގަކޮށްލަން ޖެހެއެވެ.
Advertisement
This content is created and paid for by advertisers and does not involve Voice Journalists
