ތ. ވިލިފުށީގެ އެއާރޕޯޓާއި ހޮސްޕިޓަލުގެ މަސައްކަތް ކުރިއަށްދާނެކަމަށް ރައީސުލްޖުމުހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމުހޫރިއްޔާ މިފަދައިން ވިދާޅުވެފައިވަނީ ވެރިކަން ލިބިވަޑައި ގެންނެވުމަށް ފަހު ރާއްޖޭގެ އަތޮޅުތަކަށް މިއަދު ކުރައްވަން ފެއްޓެވި ދަތުރުފުޅުގެ ތެރެއިން ތ.އަތޮޅުން 3 ވަނައަށް ވަޑައިގެންނެވި ތ.ވިލިފުށީގެ ކައުންސިލް މެމްބަރުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.
މިބައްދަލުވުމުގައި ވިލިފުށި ކައުންސިލުންވަނީ ނިމިދިޔަ ސަރުކާރުން ފަށާފައިހުރި މަސްރޫޢުތައް ހުއްޓިފައި ހުރުމުގެ ކަންބޮޑުވުން ފާހަގަ ކުރައްވާފައެވެ. އަދި ނިމިދިޔަ ސަރުކާރުން ފެށި އެއްވެސް މަޝްރޫއެއް އެރަށުގައި ނިމިފައި ނުވާކަން އެކައުންސިލުން ފާހަގަކުރެއްވިއެވެ.
ހަމަ އެއާއި އެކު އެރަށުގެ ރައްޔިތުންނަށް އެންމެ ބޮޑަށް ބޭނުންވެފައި ވަނީ ހޮސްޕިޓަލާއި އެއާރޕޯޓްގެ މަސައްކަތް ފެށުންކަމަށް ކައުންސިލުން ފާހަގަ ކުރެއްވިއެވެ.
ކައުންސިލްގެ ވާހަކަތައް އަޑު އެއްސެވުމަށް ފަހު ރައީސުލްޖުމުހޫރިއްޔާ ޑރ.މުހައްމަދު މުއިއްޒު ދެއްވި ޔަޤީންކަމަކީ އެމަނިކުފާނުގެ ސަރުކާރުން ވިލިފުށީގައި ހޮސްޕިޓަލަކާއި އެއާރޕޯޓެއް އެޅުމުގެ މަސައްކަތް ކުރިއަށް ގެންދާވާނެކަމުގެ ޔަޤީންކަމެވެ.
މިއަދުގެ މި ބައްދަލުކުރެއްވުމުގައި ވިލިފުށި ކައުންސިލުންވަނީ އެރަށުގެ ރައްޔިތުންގެ ހުރި ހުރިހާ ކަންބޮޑުވުންތަކެއް ހިއްސާކޮށްފައެވެ. އެގޮތުން ސުނާމީގެ ސަބަބުން ގެދޮރުގެ ދަތިކަން ކުރިމަތިވި ޢާއިލާތަކަށް އެކަމުގެ ހައްލު ހޯދައިދިނުމަށްޓަކައި އެއްބަސްވެވޭ ގޮތެއްގެ މަތިން ހައްލެއް ހޯދުމަށް ބޭނުންވާކަން އެކައުންސިލުން ފާހަގަކުރިއެވެ. އަދި އެރަށުގައި ހަދަމުންގެންދާ 100 ހައުސިން ޔުނިޓް ހަދާ ނިމުމުގެ ކުރިން އެސަރަހައްދުން އަސާސީ ހިދުމަތްތައް ލިބޭނެގޮތް ހޯދައިދެއްވުމަށް ވެސް ކައުންސިލުން ރައީސް ޑރ.މުހައްމަދު މުއިއްޒުގެ އަރިހުން އެދިފައިވެއެވެ.
މި ބައްދަލުވުމުގައި ރައީސް ވިދާޅުވީ ކައުންސިލުން އެދިލެއްވިކަންތައްތައް ސަރުކާރުގެ ކަމާއިގުޅުންހުރި މުއައްސަސާތަކާއި ވާހަކަދައްކައިގެން ފުރިހަމަ ކޮށްދެއްވުމަށް މަސައްކަތް ކޮށްދެއްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
