ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ތަސައްވުރާއި އެއްގޮތަށް ރާއްޖެ ޢުމްރާނީ ގޮތުން ތަރައްގީވެ މާ ގިނަ ދުވަހެއް ނުވެ، ރާއްޖޭގެ އެކި ހިސާބުތަކުން ދުބާއީގެ މަންޒަރުތައް ފެންނަމުންދާނެ ކަމަށް ސިޓީ ތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާ ބެހޭ ވުޒާރާގެ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ. 

ރައީސުލްޖުމްހޫރިއްޔާ ތ އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން، ރޭ އެއަތޮޅު ވޭމަންޑޫ ރައްޔިތުންނާއި ބައްދަލު ކުރުމަށް ބޭއްވި ޖަލްސާގައި ވާހަކަ ދައްކަވަމުން ޝަރީފް ވިދާޅުވީ ރައީސުލްޖުމްހޫރިއްޔާ މަސައްކަތް ކުރައްވަމުންދަނީ އެތެރެއާއި ބޭރުން އެހީތައް ހޯދައިގެން، އެމަނިކުފާނު ވެ ވަޑައިގެންނެވި ވަޢުދުތައް ފުއްދަވަން ކަމަށެވެ. 

އަދި ސަރުކާރުގެ ޚިދުމަތުގައި ހޭދަ ކުރެއްވި ހުރިހާ އަހަރު ތަކުގެ ތަޖުރިބާގެ އަލީގައި ޝަރީފް ވަނީ ރައްޔިތުން އުއްމީދު ކުރާ ކަހަލަ ތަސައްވުރެއް ފެންނަން ފެށީ އަދިކިރިޔާ ކަމަށެވެ.   

Advertisement

"އަޅުގަނޑުމެންނަށް މި ފެނުނު މަންޒަރު ތަކަށް ބަލާއިރު، އަޅުގަނޑު ވެސް ސަރުކާރުގައި އުޅޭތާ 43 އަހަރު ވެގެން މިދިޔައީ، މި ވޭތުވެދިޔަ ދުވަސް ތަކުގައި އަޅުގަނޑު ދަންނަވާނީ، ހަމަ ޔަގީނުންވެސް ދިވެހި ރައްޔިތުން އުއްމީދުކުރާ، ދިވެހި ރައްޔިތުން ދެކެން ބޭނުންވާ ވަރުގެ ތަރައްގީގެ ހަރުދަނާ ތަސައްވުރެއް، ރައްޔިތުން އުއްމީދުކުރާ ކަހަލަ ތަސައްވުރެއް ފެންނަން މިފެށީ، އަދި ކިރިޔާ."

މިއާއެކު ޝަރީފް ވަނީ، މިސަރުކާރުގެ ބޯހިޔާވަހިކަމުގެ އެންމެ ބިޔަ މަޝްރޫޢު ރަސްމާލެ އާއި މާލެ ޓަނެލް އަކުން ގުޅުވާލައްވާނެ ކަމަށް ރައީސް މުޢިއްޒު ވިދާޅުވުމުން އިދިކޮޅު ފަރާތްތަކުން އެކަމަށް ފާޑުކިޔަމުންދާ ދިޔުމަށް ރައްދު ދެއްވާފައެވެ. 

އެގޮތުން ޝަރީފް ވިދާޅުވީ، ރައީސް މުޢިއްޒު އެފަދައިން ކަން ކުރައްވާނެ ކަމަށް ވިދާޅުވާނީ، އެމަނިކުފާނުގެ އިންޖިނިއަރިންގ ގެ ތަޖުރިބާގެ އަލީގައި އެއީ ވާނެ ކަމަކަށް ވާތީ ކަމަށެވެ. އަދި އެ މަންޒަރު ފެންނަމުންދާ ކަމަށްވެސް އޭނާ ވިދާޅުވި އެވެ.