ރައީސުލްޖުމުހޫރިއްޔާ ޑރ.މުހައްމަދު މުއިއްޒާއި އެމަނިކުފާނުގެ އަނބިކަބަލުން މެޑަމް ސާޖިދާ މުޙައްމަދު މިހާތަނަށް ދިރިއުޅުއްވަމުން ގެންދެވި މ.ދިމްޔާތު ދޫކުރައްވާ މުލިއާގެއަށް ދިރިއުޅުއްވުން ބަދަލު ކުރައްވައިފިއެވެ.

މިދިޔަ އަހަރުގެ ނޮވެމްބަރު މަހުގެ 17 ވަނަ ދުވަހު ރައީސުލް ޖުމުހުރިއްޔާކަމުގެ ހުވާ ކުރެއްވި ޑރ.މުހައްމަދު މުއިއްޒު، ދިވެހިރާއްޖޭގެ ރައީސުން ތިއްބެވުމަށް ހާއްޞަ ކުރެވިފައިވާ ގެ ކޮޅަށް ދިރިއުޅުއްވުން ބަދަލުކުރައްވާފައި ވަނީ މިދިޔަ ހޯމަދުވަހުކަމަށް މަޢުލޫމާތު ލިބިފައިވެއެވެ.

މީގެކުރިން ރައީސުލްޖުމުހުރިއްޔާގެ އޮފީހުން ވިދާޅުވެފައި ވަނީ ރައީސް ޑރ.މުހައްމަދު މުއިއްޒަށް މުލިއާގެއަށް ބަދަލުވެ ވަޑައިގެންނެވޭގޮތް ނުވީ އެތަނުގެ މަރާމާތުގެ މަސައްކަތްތަކެއް ކުރަން ޖެހުމާއި ގުޅިގެން ކަމަށެވެ. އޭރު ކޮންމެހެން ކުރަން ޖެހުނު މަރާމާތެއް ކޮށްފައިވަނީ އެތަނުގެ އަސްލު ސިފަ ގެއްލިގެން ނުދާނެ ގޮތަށް ކަމަށްވެސް ރައީސް އޮފީހުން ވިދާޅުވެއެވެ.

މުލިއާގެއަކީ މީގެ 104 އަހަރު ކުރިން އައްސުލްތާން މުހައްމަދު ޝަމްސުއްދީންގެ ވެރިކަމުގައި ބިނާކޮށްފައިވާ ތަނެކެވެ. ރާއްޖޭގެ ތާރީހްގައި މިހާތަނަށް ރައީސުލްޖުމުހޫރިއްޔާގެ މަޤާމް އެންމެ ގިނަ ދުވަހު އަދާކުރެއްވި ރައީސް މައުމޫނު އަބުދުލްޤައްޔޫމު ވެސް އެންމެ ފުރަތަމަ ދިރިއުޅުއްވާފައިވަނީ  މުލީއާގޭގައެވެ. އަދި ހަމަ އެހެންމެ އަމިއްލަ ފުޅަށް ވެރިކަމުން އިސްތިއުފާދެއްވި ރައީސް މުޙައްމަދު ނަޝީދާއި އަދި ވޭތުވެދިޔަ 5 އަހަރު ރާއްޖޭގެ ވެރިކަން ކުރެއްވި ރައީސް އިބުރާހިމް މުހައްމަދު ޞާލިޙްވެސް ރައީސްކަމުގެ މަޤާމުގައި ހުންނެވިއިރު ދިރިއުޅުއްވާފައި ވަނީ މުލިއާގޭގައެވެ.  

މިހާރު މުލިއާގެ ވެފައިވަނީ ދިވެހިރާއްޖޭގައި ހުރި އެންމެ ދުވަސްވީ އެންމެ ރީތި އެއް ޢިމާރާތްކަމުގައެވެ. އެ ޢިމާރާތް މިހާރު ހުރިގޮތައް އެތަނުގެ އަސްލަށް އެއްވެސް ބަދަލެއް ނުގެނެސް އެތަން މަރާމާތުކުރުމާއި އަދި ކުރިއަށް އޮތްތަނުގައި އެތަން ބެލެހެއްޓުމުގެ މަސައްކަތް ކުރިއަށް ގެންދަވާނެ ކަމަށް މިސަރުކާރުން ވަނީ ހާމަކުރައްވާފައެވެ.