ނިމިދިޔަ އިބުރާހިމް މުޙައްމަދު ޞާލިޙުގެ ސަރުކާރުގެ އެންމެފަހު ދުވަސްކޮޅު "ގެދޮރުވެރިޔާ" ސްކީމްގެ ދަށުން ދޫކުރި ފްލެޓްތަކަށް ޝަރުތު ހަމަވާ މީހުންނަށް ފްލެޓްތައް ދޫކުރެވޭނީ އޭސީސީން ކުރި ތަހުގީގުގެ ތަފްސީލު ދިނުމުން ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެއެވެ.

މިނިސްޓަރ ހައިދަރު މިފަދައިބން ވިދާޅުވީ ޝަރުތުހަމަވާ މީހުންނަށް ފުލެޓްދޫކުރުމާއި ގުޅޭގޮތުން އެކްސް މެދުވެރިކުރައްވާ އާއްމުކުރެއްވި ވީޑިއޯ މެސެޖެއްގައެވެ.

މި ވީޑިއޯ މެސެޖުގައި މިނިސްޓަރ ވިދާޅުވީ ކުރީ ސަރުކާރުން ނެރުނު ފްލެޓް ލިސްޓުގައި ގިނަ ކޮރަޕްޝަންގެ އަމަލުތައް ހިންގާފައިވާ ކަމަށް އޭސީސީ ތަހުގީގަށް އެނގިފައިވާތީ އެ މައުލޫމާތުތައް ހޯދުމަށް މިނިސްޓްރީން ވަނީ އޭސީސީގައި އެދިފައިކަމަށާއި، އަދި އެ މައުލޫމާތު މިނިސްޓްރީ އާއި ހިއްސާކޮށްދެއްވާނެ ކަމަށް އޭސީސީން ވިދާޅުވެފައިވާ ކަމަށެވެ.

އޭސީސީން ކުރިއަށް ގެންދިޔަ ތަޙްޤީގާއި ގުޅޭގޮތުން ހައުސިން މިނިސްޓްރީން ނެރުނު ބަޔާނެއްގައި ބުނެފައިވަނީ  ފްލެޓްތަކާއި ގުޅޭ ގޮތުން އޭސީސީން ކުރިއަށްދާ ތަހުގީގުގެ ފުރަތަމަ މަރުހަލާ ނިންމައި ކޮމިޝަންގެ ހޯދުންތައް މި މަހުގެ އެއްވަނަ ދުވަހު އެ މިނިސްޓްރީ އާއި ހިއްސާކޮށްފައިވާ ކަމަށެވެ. އަދި ކޮމިޝަނާ ބައްދަލުކޮށް އިތުރު ތަފްސީލްތައް ހޯދުމަށް މަޝްވަރާކޮށްފައިވާ ކަމަށްވެސް އެ ބަޔާނުގައިވެއެވެ.

މިނިސްޓަރ މިފަދައިން ވިދާޅުވެފައިވާއިރު އޭސީސީން ކުރިއަށް ގެންދިޔަ ތަހުގީގުން އެނގުނުގޮތުގައި ގެދޮރުވެރިޔާ ސްކީމުގެ ދަށުން ދޫކުރާ ފުރަތަމަ 4،000 ފްލެޓް ލިބުނު މީހުންގެ ތެރެއިން 60 އިންސައްތަ މީހުންނަކީ ޝަރުތު ހަމަނުވާ މީހުންކަން އޭސީސީން ވަނީ ހާމަކުރައްވާފައެވެ.