ފޭސްބުކް ލައިވުގައި ވަޒީރު ޑރ. އައިޝާ އާއި ސުވާލުކުރުމުގެ ފުރުޞަތު އެކަމަނާގެ ވުޒާރާ، (އިޖުތިމާއި އަދި އާއިލީ ތަރައްޤީ އާއި ބެހޭ ވުޒާރާ) އިން އާއްމުންނަށް ހުޅުވާލައިފިއެވެ.

މިކަން ހާމަކޮށްފައި ވަނީ އިޖުތިމާއީ އަދި އާއިލީ ތަރައްގީއާއި ބެހޭ ވުޒާރާއިން މިއަދު އެކްސްގައި ކުރި ޕޯސްޓެއް މެދުވެރި ކުރައްވައެވެ. އެ ވުޒާރާއިން ކުރި އެކްސްޕޯސްޓުގައި ބުނެފައި ވަނީ އެ ލައިވް ކުރިއަށް ދާނީ 8 ފެބްރުއަރީ 2024 ވާ ބުރާސްފަތި ދުވަހުގެ ރޭ (މާދަމާ ރޭ) 8:30 ގައި ކަމަށެވެ.

މިނިސްޓްރީގެ ޕޯސްޓުގައި އިތުރަށް ބުނެފައި ވަނީ ފޭސްބުކް ލައިވް ކުރިއަށްދާ ވަގުތު ކޮމެންޓު މެދުވެރިކޮށް ވަޒީރު ޑރ.އައިޝާ އާއި ސުވާލު ކުރެވޭނެ ކަމަށާއި އާންމުންގެ ސުވާލުތަކަށް ޑރ. އައިޝަތު ޝިހާމް ޖަވާބު ދެއްވަމުން ގެންދަވާނޭ ކަމަށެވެ.

މިއީ މިފަދަގޮތަކަށް ވުޒާރާއަކުން އިސްނަންގަވައިގެން ފޭސްބުކް ލައިވްއެއްގައި ވަޒީރަކު ރައްޔިތުންގެ ސުވާލުތަކަށް ޖަވާބު ދެއްވާ ފުރަތަމަ ފަހަރެވެ.

އިޖުތިމާއީ އަދި އާއިލީ ތަރައްގީ އާ ބެހޭ ވުޒާރާއިން އާމުންނަށް ހުޅުވާލައިގެން ފޭސްބުކް ލައިވްއެއްގައި އާއްމުންގެ ސުވާލުތަކަށް ޖަވާބު ދިނުމުގެ ޕްރޮގްރާމެއް ބޭއްވުމަށް ހަމަޖެހިފައިވާއިރު ރައީސް ޑރ.މުހައްމަދު މުއިއްޒު ވިދާޅުވެފައިވަނީ އެމަނިކުފާނުގެ ސަރުކާރަކީ ވީހާވެސް ބޮޑަކަށް ރައްޔިތުންނާއި ގާތުން މަސައްކަތް ކުރާނެ ސަރުކާރަކަށް ވާނެކަމަށެވެ.

އެގޮތުން ވަޒީރުން ރައްޔިތުންގެ ސުވާލުތަކަށް ޖަވާބުދެއްވުމަށްޓަކައި ރައްޔިތުންގެ ގާތަށް ވަޑައިގެން ވަޒީރުންނާއި ކުރެވޭ ސުވާލުތަކަށް ޖަވާބު ދެވޭގޮތަށް "އަހާ" ގެ ނަމުގައި ވަނީ ހާއްސަ ޕްރޮގްރާމްތަކެއް ފައްޓަވާފައެވެ. އަދި ޚުދު ރައީސް ޑރ.މުހައްމަދު މުއިއްޒުވެސް ރައްޔިތުންގެ ސުވާލުތަކަށް ކޮންމެ ދުވަހަކު ކަހަލަގޮތަކަށް ގެންދަވަނީ "ރައީސްގެ ޖަވާބު" ޕްރޮގްރާމު މެދުވެރިކޮށް ޖަވާބު ދެއްވަމުންނެވެ.