ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު ޢަބްދުالله ޖާބިރަށް ޤައުމީ އެއާލައިން، މޯލްޑިވިއަންގެ ފުލައިޓުތަކުން ދަތުރުކުރުން މަނާކުރަން އެ ކުންފުނިން ނިންމައިފިއެވެ.
މޯލްޑިވިއަން އިން މިފަދައިން ނިންމީ މޯލްޑިވިއަންގެ ސީޕްލޭނެއްގައި ތިބި ޕައިލެޓަކާއި ފަޅުވެރިންނާއި ޖާބިރު ހަޑިހުތުރު ބަހުން މުއާމަލާތްކުރެއްވުމާއި ގުޅިގެންނެވެ. ޖާބިރު މިފަދައިން މި ފަރާތްތަކާއި މުއާމަލާތްކުރެއްވި ވީޑިއޯ އަންނަނީ ސޯޝަލް މީޑިއާގައި ދައުރުވަމުން އަންނައިރު، ވީޑިއޯގައި ޖާބިރު ވަނީ އެ ސީޕްލޭން ގެ ޕައިލެޓާ ދިމާލަށް ބޭއަދަބީ ބަހުރުވައިން ހަޅޭއްލަވައި، އޭނާގެ އާއިލާއާ ގުޅުވައި ހުތުރު އިބާރާތްތައް ބޭނުންކޮށްފައެވެ.
މިކަމާއި ގުޅިގެން އެ ކުންފުނީގެ މުއައްޒަފަކު ވަނީ މޯލްޑިވިއަންގެ އެއްވެސް ފްލައިޓަކުން ދަތުރުކުރުން ޖާބިރަށް ވަނީ މަނާކޮށްފައިވާ ކަން ކަށަވަރު ކޮށްދީފައެވެ. އަދި މޯލްޑިވިއަން އިން ޖާބިރާއި މެދު މި އެޅި ފިޔަވަޅަކީ އޭވިއޭޝަން ދާއިރާގައި މަސައްކަތް ކުރާ ފަރާތްތަކާއި މެދު އިހާނެތިކޮށް ކަންތައްތައް ކުރާނަމަ، އަޅާ ފިޔަވަޅެއްކަމަށް އެފަރާތުން ބުންޏެވެ.
މޯލްޑިވިއަން އިން ޖާބިރާއި މެދު މި ފިޔަވަޅު އެޅި އިރު ދާދި ފަހުން ޖާބިރު ނިސްބަތްވެވަޑައިގަންނަވާ ޕާޓީ، އެމްޑީޕީން ވެސް ވަނީ ، މުޖުތަމައުގެ އާއްމު މިންގަނޑާ ޚިލާފަށް ރައްޔިތުންނާއި ބޭއަދަބީ ބަހުރުވައިން މުޢާމަލާތްކޮށް މަސްލަހަތު ގެއްލޭގޮތަށް ތަކުރާރުކޮށް ޖާބިރު އަމަލުކުރައްވަމުންދާތީ، ހަރުކަށި ފިޔަވަޅު ތަކެއް އަޅާފައެވެ. މިގޮތުން އެމްޑީޕީގެ ޕްރައިމަރީގައި ޖާބިރު ވާދަކުރައްވައި ކާމިޔާބު ހޯއްދެވި ކާށިދޫ ދާއިރާގެ މަޖިލިސް ޓިކެޓު އަތުލުމުގެ އިތުރުން، އެޕާޓީން ޖާބިރު ވަނީ ވަކިކުރުމަށް ވެސް ނިންމާފައެވެ.
މީގެ އިތުރުންވެސް އެމްޑީޕީން ވަނީ ޖާބިރު އެ ޕާޓީއާ އަލުން ގުޅުމަށް އެދުނުކަމުގައި ވީނަމަވެސް އެފުރުސަތު ލިބޭނީ ޕާޓީގެ ޤައުމީ މަޖިލިހަށް ހުށައަޅައި އެމަޖިލިހުން ނިންމަވާ ގޮތެއްގެ މަތިންކަމަށް ބުނެފައެވެ. އަދި ޕާޓީއާ ގުޅުމުގެ ފުރުސަތު ދެވުނުކަމުގައި ވީނަމަވެސް ޖާބިރު އެމްޑީޕީގެ މެންބަރަކަށްވާ ދުވަހުންފެށިގެން 5 އަހަރު ވަންދެން، ޕާޓީގެ އެއްވެސް މަޤާމަކަށް އަދި ޕްރައިމަރީއެއްގައި ވާދަކުރުމުގެ ފުރުސަތު ޖާބިރަށް ނުދިނުމަށް އެ ޕާޓީން ވަނީ ނިންމާފައެވެ.
ޖާބިރަކީ މަޖިލިސް ތެރޭގައި ވެސް އަދި މަޖިލީހުން ބޭރުގައި ވެސް ބޭއަދަބީ ބަހުރުވަ ބޭނުންކުރައްވައިގެން މުއާމަލާތު ކުރައްވާ ބޭފުޅެއްކަން ފާހަގަކޮށްލަން ޖެހެއެވެ.
Advertisement
This content is created and paid for by advertisers and does not involve Voice Journalists
