ކުރިއަށް އޮތް ހަ މަސް ދުވަހުގެ ތެރޭގައި ޑްރޯން ބޭނުންކޮށްގެން ބޭސް އުފުލުގެ ހިދުމަތް ފެށުމަށް މަސައްކަތް ކުރަމުން އަންނަ ކަމަށް ސިއްހަތާއި ބެހޭ ވުޒާރާއިން ބުނެފިއެވެ.
އެވުޒާރާއިން މިފަދައިން ބުނެފައި ވަނީ އިއްޔެ އެކްސްގައި ކުރި ޕޯސްޓެއްގައެވެ. އެ ޕޯސްޓުގައި އެ ވުޒާރާއިން ބުނީ ޑްރޯން މެދުވެރިކޮށް ރަށްރަށަށް ބޭސް ފޯރުކޮށްދިނުމަށްޓަކައި ވާންޖެހޭ ތައްޔާރީތަކާއި ގުޅޭގޮތުން އެކަމާއި ގުޅުންހުރި ފަރާތްތަކާއި އެކު މަޝްވަރާ ބައްދަލުވުމެއް އިއްޔެ ބާއްވާފައިވާ ކަމަށާއި، އެ ވުޒާރާގެ އަމާޒަކީ ހަ މަސް ތެރޭ އެ ހިދުމަތް ފެށުން ކަމަށެވެ.
ޑްރޯން ބޭނުންކޮށްގެން ލެބޯޓްރީ ނެތް ރަށްރަށުން ނަގާ ސާމްޕަލްތައް ލެބޯޓްރީ ހުންނަ ރަށްރަށަށް ފޮނުވޭ ގޮތް ހެދުމަކީ ނިމިދިޔަ ސަރުކާރުންވެސް ކުރަން ނިންމާފައިވާ ކަމެކެވެ. އެގޮތުން އަތޮޅުގެ ހުރިހާ ރަށަކުން ނަގާ ސާމްޕަލުތައް އަތޮޅު ހޮސްޕިޓަލަށް ގެންދިއުމުގެ އިންތިޒާމްތައް ހަމަޖެއްސުމަށްވެސް ވަނީ ނިމިދިޔަ ސަރުކާރުގެ ފަހު ދުވަސްކޮޅު މަޝްވަރާކޮށްފައެވެ.
ޑްރޯން ބޭނުންކޮށްގެން އެއް ރަށުން އަނެއް ރަށަށް ސާމްޕަލް ގެންދިއުމުގެ ޓެސްޓްތަކެއް ގދ.އަތޮޅުގައި ނިމިދިޔަ ސަރުކާރުން ކޮށްފައިވާއިރު އެ ސަރުކާރުގެ އެންމެ ފަހު ދުވަސްކޮޅު ބުނެފައި ވަނީ ޑްރޯން ބޭނުންކޮށްގެން ބުލަޑް ސާމްޕަލު އުފުލުމުގެ ހުރިހާ ކަމެއް ހަމަޖެހިފައިވާ ކަމަށެވެ.
ނަމަވެސް ނިމިދިޔަ ސަރުކާރު ބަދަލުވެގެން ދިޔައިރުވެސް އެކަމަށް އަމަލީ ސިފައެއް އައިސްފައިވާ ނުވާއިރު މިހާރުގެ ރައީސް ޑރ.މުހައްމަދު މުއިއްޒުގެ ސަރުކާރުން ބުނެފައި މިވަނީ ކުރިއަށް އޮތް ހަމަސް ދުވަހުގެ ތެރޭގައި ޑްރޯން ބޭނުންކޮށްގެން އެއްރަށުން އަނެއް ރަށަށް ބޭސް އުފުލުމުގެ މަސައްކަތް ފަށާނެކަމަށެވެ.
Advertisement
This content is created and paid for by advertisers and does not involve Voice Journalists
