ތިލަމާލެ ބްރިޖް ހެދުމުގެ މަސައްކަތް ކުރަމުން ގެންދާ އިންޑިއާގެ ކުންފުނި، އެފްކޮންސްއިން ބޭނުންކުރަމުން ގެންދިޔަ ޕްލެޓްފޯމެއް ވިލިމާލެ ފަރަށް އަރައި، ލިބުނު ގެއްލުންތަކުގެ ސަބަބުން އެ ކުންފުނި ކޮށްފައިވާ ޖޫރިމަނާ ދައްކަށްޖޭހޭ މުއްދަތު ހަމަވިއިރު ވެސް ދައްކާފައި ނުވާތީވެ،  އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ) އިން އެ މައްސަލަ ކޯޓަށް ހުށަހަޅަން ނިންމައިފި އެވެ.

އެފްކޮންސްއިން ބޭނުންކުރަމުން ގެންދިޔަ ޕްލެޓްފޯމް ވިލިމާލެ ފަރަށް އަރައި އެފަރަށް ލިބުނު ބޮޑު ގެއްލުމުގެ ސަބަބުން އެ ކުންފުނި 69 މިލިއަން ރުފިޔާ އިން ޖޫރިމަނާކޮށްފައި ވަނީ ނިމިދިޔަ ސަރުކާރުން 2022 ވަނަ އަހަރު އެވެ. އީޕީއޭ އިން ހާމަކޮށްފައިވާ ގޮތުގައި އޭރު އެފައިސާ ދެއްކުމަށް އެފްކޮންސްއަށް ދީފައިވަނީ 30 ދުވަހުގެ މުއްދަތެކެވެ. އޭގެފަހުން ދިން މުއްދަތު މިދިޔަ އަހަރުގެ ނޮވެމްބަރ 15 ވަނަ ދުވަހަށް ހަމަވި އިރުވެސް އެފައިސާ ދައްކާފައި ނުވާކަމަށް އީޕީއޭ އިން ހާމަކުރައްވައެވެ.

އެފްކޮންސްގެ އިހުމާލުން ފަރަށް ލިބުނު ބޮޑުގެއްލުމަށް އިޕީއޭއިން ކުރި ޖޫރިމަނާ ބޮޑުކަމަށް ބުނެ އެކުންފިނިން ތިމާވެއްޓައި ބޭހޭ މިނިސްޓްރީގައި އޭރު މައްސަލަ އިސްތިއުނާފް ކުރި ނަމަވެސް ފަރަށް ލިބުނު ބޮޑު ގެއްލުމަށް ބަލާ މިނިސްޓްރީން ނިންމާފައިވަނީ އެފްކޮންސްއަށް އެކަމުގައި ލުޔެއްދެވެން ނެތް ކަމަށެވެ.

Advertisement

ތިމާވެއްޓާއި ބެހޭ ވުޒާރާއިން އެގޮތަށް އެފްކޮންސްއަށް ލުޔެއްދެވެން ނެންކަމަށް ނިންމުމުން އެކުންފުނިން ވަނީ ޖޫރިމަނާކުރި އަދަދަކީ ލިބުނު ގެއްލުމަށް ވުރެ ބޮޑު އަދަދެއް ކަމަށް ބުނެ ސިވިލްކޯޓަށް މައްސަލަ ހުށަހަޅާފައެވެ. އެ މައްސަލާގައި ޖޫރިމަނާ ފަސްކޮށްދިނުމުގެ  ވަގުތީ އަމުރަކަށް ސިވިލްކޯޓުގައި އެދުނު ނަމަވެސް ސިވިލްކޯޓުންވެސް ނިންމާފައިވަނީ ވަގުތީ އަމުރެއް ނެރެދޭން ޖެހޭ ސަބަބެއް ނެތްކަމަށެވެ.

އެފްކޮންސްއިން ތިލަމާލެ ބްރިޖް ހެދުމުގެ މަސައްކަތުގައި ބޭނުންކުރާ ޕްލެޓްފޯމެއް ވިލިމާލެ ފަރަށް އެރި އިރު އެ ޕްލެޓްފޯމް އެތަނުން ނެގިފައިވަނީ ރާއްޖެއިން ބޭރުން ބައެއް ތަކެތި ގެނެސްގެން އޭތި ފަރަށް އެރިތާ 10 ދުވަސް ފަހުންނެވެ. ޕްލެޓްފޯމް ނެގުނުއިރު ފަރުގައި 10 ވަރަކަށް ފޫޓްގެ ފުންމިނުގައި ވަޅުގަނޑުތައް ހެދިފައި ހުއްޓެވެ.

އެމައްސަލާގައި ރާއްޖޭގައި ތިމާވެށި ހިމާޔަތް ކުރުމަށް މަސައްކަތްކުރާ އަމިއްލަ ފަރާތްތަކާއި ކުލަބު ޖަމްއިއްޔާތަކުން ވަނީ ވަރަށް ބޮޑަށް ނުރުހުން ފާޅުކޮށްފައެވެ.