ވަގުތީ ފޮސްޓަރިން އަށް ޝައުގުވެރިވާ ފަރާތްތަކަށް ހާއްސަކޮށް، އެކަމާއި ގުޅޭ މައުލޫމާތު ދިނުމަށް މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމެންޓް އިން ސެޝަނެއް ބާއްވަން ނިންމައިފިއެވެ. 

މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމެންޓް އިން އިންތިޒާމް ކޮށްގެން ބާއްވާ މި ސެޝަން އޮންނާނީ މިރޭ 8:45 ގައި ދިވެހި ރާއްޖޭގެ ގައުމީ ޔުނިވާސިޓީގެ ސެންޓްރަލް އޮޑިޓޯރިއަމް ގައެވެ. މިނިސްޓްރީން މިހާރު ވަނީ މި ސެޝަން ގައި ބައިވެރިވާން ބޭނުންވާ ފަރާތްތަކަށް، ރެޖިސްޓްރީ ވުމުގެ ފުރުސަތުވެސް ހުޅުވާލާފައެވެ.

އެ މިނިސްޓްރީން ދައުލަތުގެ ބެލުމުގެ ދަށުގައި ތިބޭ ކުދިން، ވަގުތީ ގޮތުން ފޮސްޓަރކުރުމަށް ބޭނުންވާ ފަރާތްތަކަށް، އެ ފުރުސަތު ހުޅުވާލީ މިދިޔަ މަހުގެ ތެރޭގައެވެ. މިގޮތަށް ހަވާލުކުރެވޭ އެންމެ ކުރު މުއްދަތަކީ 2 އަހަރުކަމަށް އެ ވުޒާރާއިން އެކުލަވާލި ގަވާއިދުގައި ވެއެވެ. 

މީގެ ބޭނުމަކީ ކުއްޖާގެ އުފަން އާއިލާގެ ހާލަތު ރަނގަޅުކުރުމަށް ބާރުއަޅައި، ކުއްޖާ އަނބުރާ އާއިލާއާއި ހަވާލުކުރެވެން ދެން ވެސް، އާއިލީ ލޯބާއި އަޅާލުން ލިބި، އާއިލީ ވެއްޓެއްގައި ކުއްޖާއަށް ދިރިއުޅުމުގެ މަގު ފަހިކޮށްދިނުން ކަމަށް މިނިސްޓްރީން ހާމަކުރެއެވެ. 

ވަގުތީ ގޮތުން ފޮސްޓާ ކުރާ މުއްދަތު ހަމަވި ނަމަވެސް، އާއިލާގެ ހާލަތު ރަނގަޅުވެ ކުއްޖާ އަނބުރާ އާއިލާއަށް ނުގެންދެވޭ ހާލަތުގައި، ފޮސްޓާކުރާ މުއްދަތު އިތުރުކޮށް އެ ކުއްޖާ ބަލަހައްޓަމުން ދާ ފޯސްޓަރ ބެލެނިވެރިން ގާތުގައި ބެހެއްޓޭނެ މަގު ވަގުތީ ފޮސްޓަރިން ނިޒާމުގެ ތެރެއިން މިނިސްޓްރީން ވަނީ ހަމަޖެއްސޭނެ ގޮތް ހަދާފައެވެ.

މީގެ އިތުރުންވެސް، ވަގުތީ ފޮސްޓަރިންގެ ތެރެއިން ގެންދާ ކުދިންގެ ދާއިމީ ޤާނޫނީ ބެލެނިވެރިކަމަށް އެދުމުގެ އިޚްތިޔާރު ވެސް ފޮސްޓަރ އާއިލާއަށް ލިބިގެންދާނެ އެވެ.  

މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމެންޓް ގެ ނަންބަރު 1433 އާއި ގުޅުމުން ވަގުތީ ފޮސްޓަރިންނާއި ގުޅޭ އިތުރު މައުލޫމާތު ލިބިގެން ދާނެ ކަމަށް މިނިސްޓްރީ އިން ބުނެއެވެ.

މި ޕްރޮގްރާމަކީ ރައީސް ޑރ.މުއިއްޒުގެ ރިޔާސީ ވައުދުފުޅެއްކަން ފާހަގަކޮށްލަން ޖެހެއެވެ. މިގޮތުން "ކޮންމެ ކުއްޖަކަށް އާއިލާއެއް" ޕްރޮގްރާމް ވަނީ އެމަނިކުފާނުގެ ހަފްތާ 14ގެ މަގުޗާޓުގައި ވެސް ހިމަނުއްވާފައެވެ. މި ޕްރޮގްރާމްގެ ތެރެއިން  ކޮންމެ ކުއްޖަކީ ވެސް އާއިލީ ވެއްޓެއްގެ ހިމާޔަތާއި ލޯތްބާއެކު ބޮޑުވުމުގެ ފުރުސަތު ލިބިފައިވާ ކުއްޖެއްކަން ޔަގީންކުރުމަކީ އެމަނިކުފާނުގެ ތަސައްވުރެކެވެ.