މާލެއަށް ނުގޮސް ރަށުގައި ތިބެގެން ވަޒީފާ އަދާކުރުމުގެ ފުރުސަތު ޒުވާނުންނަށް ހޯއްދަވައި ދެއްވާނެ ކަމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވެފައި ވަނީ މީސްމީޑިޔާ މެދުވެރިކޮށް އާއްމުންކުރާ ސުވާލުތަކަށް ސީދާ ރައީސް ޖަވާބު ދެއްވާގޮތަށް ރައީސުލްޖުމްހޫރިއްޔާގެ އޮފީހުން ކުރިއަށް ގެންދަވާ ސިލްސިލާ "ރައީސްގެ ޖަވާބު" ގެ މިއަދުގެ ޕްރޮގްރާމުގައި ތ.ކިނބިދޫ، އުފާ، ޢާއިޝަތު ރައުނާ މުޙައްމަދު ކުރެއްވި ސުވާލަށް ޖަވާބު ދެއްވަމުންނެވެ.
މިއަދުގެ ޕްރޮގްރާމް މެދުވެރިކޮށް ރައުނާ ރައީސް ޑރ.މުހައްމަދު މުއިއްޒާއި ކުރި ސުވާލު އަމާޒުކުރީ ކިޔެވުން ނިންމައި ވަޒީފާއަށް ނުކުންނަ ކުދީންނަށް ރަށުގައި ތިބެ ވަޒީފާ އަދާކުރާނެ ފުރުސަތު ފަހިކޮށްދިނުމާ ގުޅޭ ގޮތުންނެވެ.
ރައުނާގެ ސުވާލުގެ ޖަވާބުގައި ރައީސް ޑރ. މުއިއްޒު ވިދާޅުވީ ޒުވާނުންނަށް މާލެ ނުގޮސް ރަށުގައި ތިބެގެން ވަޒީފާގެ ފުރުސަތު ހޯއްދަވައިދެއްވަން ބޭނުންފުޅުވާ ކަމަށެވެ.
ރައުނާގެ ސުވާލު ބޮޑަށް އަމާޒުވެފައި ވަނީ ތ.އަތޮޅަށް ކަމަށް ވަތީވެ ރައީސް ވިދާޅުވީ ތ.އަތޮޅުގައި އިޤްތިޞާދީ އަދި އާމްދަނީ ހޯދުމުގެ ފުރުޞަތުތައް މަދުކަން ޤަބޫލުކުރައްވާ ކަމަށާއި ނަމަވެސް އަތޮޅުގެ ރައްޔިތުންނަށް އާމްދަނީ ހޯދޭނެ ގޮތްތައް ފަހިކޮށްދެވުމަށް އެކި ގޮތްތަކުން މަސައްކަތްކުރައްވާނެ ކަމަށެވެ.
ތަފްސީލް ދެއްވަމުން ރައީސް ޑރ.މުހައްމަދު މުއިއްޒު ވިދާޅުވީ އިތުރަށް ރިސޯޓްތައް ތަރައްޤީކުރުމާއި މަސްވެރިކަން އަދި ވަކިވަކި ފަރުދުންގެ ހުނަރުވެރިކަން ބޭނުންކޮށްގެން އުފައްދާ ތަކެތި ފަސޭހައިން ވިއްކޭނެ ޕްލެޓްފޯމެއް ޤާއިމުކޮށްދެއްވާނެ ކަމަށެވެ. ދިވެހިންތެރޭގައި ވަރަށް ފަންނުވެރި އެކިކަހަލަ މަސައްކަތްތައް ކުރާ މީހުން އެބަތިބި ކަމަށާއި އެފަދަ މީހުން އަމިއްލަ ރަށުގައި ތިބިގެން ތަކެތި އުފެއްދުމުން އޮންލައިން ޕޭމަންޓް ގޭޓްވޭއެއްގެ ތެރެއިން އެ ތަކެތި މާކެޓްކޮށް ވިއްކޭނެ ގޮއްތައް ސަރުކާރުން ފަހިކޮށްދެއްވާނެ ކަމަށްވެސް ރައީސް ޑރ. މުއިއްޒު ވިދާޅުވިއެވެ.
"ކްރިއޭޓިވް އެކޮނޮމީގައި ކޮންމެ ތާކު ހުރެގެންވެސް މަސައްކަތްކުރެވޭނެ. އެކި ކަހަލަ ޓެލެންޓް ހުރި މީހުން އެބަތިބި. އެމީހުންނަށް އޮންލައިންކޮށް ތަކެތި ވިއްކާ މާރކެޓް ކުރެވޭނޭ ނިޒާމެއް ޤާއިމުކުރުމަށް އެބަ މަސައްކަތް ކުރަން."
ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވިއެވެ.
ރައީސުލް ޖުމުހުރިއްޔާ ޑރ.މުހައްމަދު މުއިއްޒު ވެރިކަމާއި ހަވާލުވެ ވަޑައިގެންނެވި ފަހުން ރާއްޖޭގެ އަތޮޅަކަށް ކުރެއްވި އެންމެ ފުރަތަމަ ދަތުރުފުޅު މީގެ ދެތިން ދުވަސްކުރިން ވަނީ ތ.އަތޮޅަށް ކުރައްވާފައެވެ. އެދަތުރުފުޅުގައި އެމަނިކުފާނު ވިދާޅުވެފައި ވަނީ ނިމިދިޔަ ސަރުކާރުން ތ. އަތޮޅުވަނީ ރާޑަރުން ގެއްލުވާލައިފައި ކަމަށާއި އެހެން ނަމަވެސް މި ސަރުކާރުން ތ. އަތޮޅަށް ޙަޤީގީ ތަރައްޤީ ގެނެސް ދެއްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
