ނިމިދިޔަ އިބުރާޙިމް މުޙައްމަދު ޞާލިޙްގެ ސަރުކާރުން އެންމެފަހުވަގުތު ގެދޮރުވެރިޔާ ސްކީމުގެ ދަށުން ފުލެޓް ދިނުމަށް ކަނޑައަޅާފައިވާ މީހުންގެ ލިސްޓް ބާތިލްކޮށް އަލުން އިޢުލާނު، ނުކުރައްވާނެކަމުގެ ޔަޤީންކަން މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓުން ދީފައިވާ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިން (އެޗްއާރުސީއެމް) ބުނެފިއެވެ.

އެ ކޮމިޝަނުން މިފަދައިން ބުނެފައިވަނީ ގެދޮރު ވެރިޔާ މަޝްރޫއާއި ގުޅިގެން ކޮމިޝަނަށް ހުށަހަޅާފައިވާ މައްސަލަ އަކާއި ގުޅޭގޮތުން ނެރެފައިވާ ބަޔާނެއްގައެވެ.

އެ ބަޔާނުގައި ބުނެފައިވަނީ އޭސީސީން ތަހުގީގު ކުރަމުންދާ މައްސަލާގައި ގިނަ ބައެއްގެ ހައްގުތައް ގެއްލިގެންދާކަމަށް ބުނާ މައްސަލައެއް އެ ކޮމިޝަނަށް ލިބިފައިވާ ކަމަށާއި، އެހެންކަމުން އެ ކޮމިޝަނުން މައްސަލަ ބަލާނީ އިންސާނީ ހައްގުތަކުގެ ނަޒަރުން، ކަން ހިނގާފައިވާ ގޮތުގެ ތަފްސީލް ދެނެގަތުމަށް ކަމަށެވެ.

Advertisement

އެޗްއާރސީއެމްގެ ބަޔާނުގައި އިތުރަށް ބުނެފައިވަނީ މި މައްސަލައިގައި މިހާތަނަށް ކުރެވިފައިވާ މަސައްކަތްތަކަށް ބަލާއިރު، މައްސަލަ ހުށަހެޅުނު ފަރާތްތަކުގެ ކިބައިން މަޢުލޫމާތު ސާފުކުރުމުގެ އިތުރުން މިނިސްޓްރީ އޮފް ހައުސިންގ ލޭންޑް އެންޑް އަރބަން ޑިވެލޮޕްމަންޓާއި އަދި އެންޓި- ކޮރަޕްޝަން ކޮމިޝަނާއި އެކި ފަހަރު މަތިން ބައްދަލުކޮށް މަޢުލޫމާތު ސާފުކުރެވިފައިވާ ކަމަށެވެ.

"އެގޮތުން، މިހާތަނަށް ބޭއްވުނު ހުރިހާ ބައްދަލުވުމެއްގައި ވެސް މި މަޝްރޫޢުގެ ދަށުން ފްލެޓް ދިނުމަށް ކަނޑައަޅާފައިވާ ލިސްޓް ބާޠިލްކޮށް އަލުން އިޢުލާނު ނުކުރައްވާނެކަމުގެ ޔަޤީންކަން މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓުން މި ކޮމިޝަނަށް  ދެއްވާފައިވެއެވެ. " ހިއުމަން ރައިޓްސް ކޮމިޝަން އޮފް ދަ މޯލްޑިވްސްގެ ބަޔާނުގައި ބުނެފައިވެއެވެ.

ކޮމިޝަނުގެ ބަޔާނުގައި އިތުރަށް ބުނެފައިވަނީ އޭސީސީގެ ނިންމުންތަކާ ބެހޭ ގޮތުން އެޓާނީ ޖެނަރަލް އޮފީހުގެ ލަފަޔަކަށް ހައުސިން މިނިސްޓްރީން އެދިފައިވާ ކަމަށް އެ މިނިސްޓްރީން އެކޮމިޝަނަށް މައުލޫމާތު ދެއްވާފައިވާ ކަމަށެވެ.

އެޗްއާރުސީއެމް އިން މިފަދައިން ނޫސް ބަޔާނެއް ނެރެފައިވާއިރު ރައީސް ޞާލިޙްގެ ސަރުކާރުން ހިންގި ގެދޮރުވެރިޔާ ސްކީމްގެ ދަށުން ދޫކޮށްފައިވާ 4000 ފުލެޓްގެ ތެރެއިން، ފްލެޓް ލިބޭ މީހުންގެ 59.6 އިންސައްތަ މީހުންގެ ޝަރުޠު ހަމަނުވާކަމަށް އޭސީސީގެ ތަހުގީގުންވަނީ ހާމަވެފައެވެ. އަދި ޝަރުޠު ހަމަވާކަމަށް ފާހަގަކުރެވުނީ 20.7 އިންސައްތަ މީހުންގެ ފޯމްކަމަށް އޭސީސީން ވިދާޅުވެއެވެ.