ރައީސުލްޖުމްހޫރިއްޔާ އަޒުލްކުރުމަށް އިދިކޮޅު އެމްޑީޕީއާއި ޑިމޮކްރެޓުން ރައްޔިތުންގެ މަޖިލީހުގެތެރޭގައި ކުޅެމުންދާ ގޭމަށް އާބޮޅެއް މިއަދު އިތުރުކޮށްފިއެވެ. 
މިއަދު އެމްޑީޕީން ކުރިކަމަކީ ވަޒީރުންނާއި ސުވާލުކުރުމަށް ރައްޔިތުންގެ މަޖިލީހުގެތެރޭގައި ކަނޑައަޅާފައި އޮންނަ ނިޒާމު ރޫޅާލައި ރައީސުލްޖުމްހޫރިއްޔާއާއި ނާއިބް ރައީސް ރައްޔިތުންގެ މަޖިލީހަށް ހާޒިރުކޮށްގެން މެންބަރުންގެ ސުވާލުތަކަށް ޖަވާބުދާރީކުރުމުގެ އިސްލާހެއް ހުށަހެޅުމެވެ. 
މިހުށަހެޅުން ހުށަހެޅުއްވި އެމްޑީޕީގެ ހޯރަފުށީގެ ދާއިރާގެ މެންބަރު އަހްމަދު ސަލީމް ވިދާޅުވީ މިނިޒާމު ރޫޅައިލާން އޭނާ ހުށަހަޅުއްވަނީ ސަރުކާރު ޖަވާބުދާރީކުރުމުގެ އަސްލު މަގްސަދު ހާސިލުވާނީ ރައީސުލްޖުމްހޫރިއްޔާ މަޖިލީހަށް ހާޒިރުކޮށްގެން ސުވާލުތަކަށް ޖަވާބުދެވޭނެ ގޮތެއް ހެދުންކަމުގައި އޭނާއަށް ފެނިވަޑައިގަންނަވާތީ ކަމުގައެވެ.

އެމްޑީޕީން މިކުރާން އުޅޭކަމުގެ ފަހަތުގައިވަނީ ހަގީގަތުގައި އެމްޑީޕީގެ ކުރީގެ ރައީސް މުހައްމަދު ނަޝީދުގެ ހުވަފެނެއް ހަގީގަތަކަށް ހަދައިދެވޭތޯ ބެލުމެވެ. 
އުމުރު ހުސްވަމުންދާ ރައްޔިތުންގެ މަޖިލީހުގެ ބާރު އެމްޑީޕީއަށް މިއޮތް ކުޑަދުވަސްކޮޅުގެތެރޭގައި، އިންޑިއާގައި އޮންނަ ކަހަލަ ޕާލެމެންޓްރީ ނިޒާމެއްގައި ހަދާގޮތަށް ވެރިކަންކުރާ ބާރުގެ ވެރިޔާ ރައްޔިތުންގެ މަޖިލީހަށް ހާޒިރުކޮށް ރައީސުލްޖުމްހޫރިއްޔާއަކީ ރައްޔިތުންގެ މަޖިލީހުން އަންގާގޮތަށް ކަންތައްކުރަންޖެހޭ މީހަކަށް ހެދުމެވެ. 
މިކަން އެމްޑީޕީން ވަރަށް އަވަސްއަރުވާލައިގެން ކޮށް ނިންމާނެކަމާމެދު އެއްވެސް ޝައްކެއްނެތެވެ. ބޭނުމަކީ މިގޮތަށް ނިންމައިގެން ރައީސުލްޖުމްހޫރިއްޔާއާއި ނާއިބްރައީސް އެމްޑީޕީއާއި ނަޝީދުގެ ޑިމޮކްރެޓިކް ޕާޓީގެ މެޖޯރިޓީ އޮތް މަޖިލީހަށް ގިނަގިނައިން ހާޒިރުކޮށް ޒިންމާދާރު ނޫން ވެރިންގެ ގޮތުގައި ރައްޔިތުންގެ މަޖިލީހުން ނިންމައި، އެދެބޭފުޅުން އަޒުލުކުރުމުގެ ކަންކަމަށް އިތުރު ދޮރެއް ހުޅުވާފައި ބޭއްވުމެވެ. ކުރިއަށް މިއޮތް ކުޑަ ދުވަސްކޮޅެއްގެތެރޭގައި މިގޮތަށް ހަދައި ރައީސާއި ނާއިބް ރައީސް މަގާމުން ވަކިކޮށް ރައްޔިތުންގެ މަޖިލީހުގެ ރައީސްކަމުގައި އިންނެވި މުހައްމަދު އަސްލަމް ރައީސުލްޖުމްހޫރިއްޔާ ކަމުގެ ޒިންމާއާއި ކުޑަހިނދުކޮޅަކަށް ނަމަވެސް ހަވާލުކުރެވޭތޯ ބެލުމެވެ.  

މަޖިލީހުގެ ރައީސް އަސްލަމް ވިދާޅުވަނީ ރައްޔިތުންގެ މަޖިލީހުން ކުރަން އުޅޭކަމަކަށް އެހެން ބާރަކުން އަރައިނުގަނެވޭނެ ކަމަށެވެ. މިހަމައިން ބަލާކަމަށް ވަންޏާ ސުޕްރީމް ކޯޓުން ނުވަތަ ދައުލަތް ހިންގުމުގެ ބާރުން ނިންމާ ނިންމުންތަކަށް ރައްޔިތުންގެ މަޖިލީހަކުންވެސް ނުބެހެވޭނެއެވެ. 
އެކަމަކު ރައީސުލްޖުމްހޫރިއްޔާ އަޒުލުކޮށްފީމޭ ނާއިބް ރައީސްވެސް އަޒުލުކޮށްފީމޭ މިހާރު ރާއްޖޭގެ ރައީސުލްޖުމްހޫރިއްޔާކަމުގެ ގޮނޑީގައި އިންމީހަކީ މަށޭ އަސްލަމް ރިޔާސަތުގައި އިންނަވައިގެން ވިދާޅުވިޔަސް އެނިންމުމަށް ތަބާވާނޭ އެހެންމީހަކު ހުންނާނެ ހެއްޔެވެ. 
ތެދެކެވެ. ޔާމީންގެ ވެރިކަން ވައްޓާލަން ގެންނަން އުޅުނު ޖުޑިޝަލް ކޫއަށް އެންމެ ފުރަތަމަ ތާއީދު ކުރި ގައުމަކަށް އަވަށްޓެރި އިންޑިޔާވި ފަދައިން ދިވެހި ދައުލަތުގެ މައްޗަށް ބާރު ހިންގަން އުޅޭ ބޭރުގެ ދައުލަތަކުން މިފަހަރުވެސް ބަޔާނެއް ނެރެފާނެއެވެ. މިއީ މިފަދަ ބަޔެއްގެ ބެކިން ނެތި އެމްޑީޕީން ކުރާނޭ ކަމެއްނޫން ކަން އެންމެންނަށްވެސް އެނގެއެވެ.

ދުސްތޫރީ މައްސަލައެއްގައި އެންމެފަހު ބަސް އިއްވާނީ ސުޕްރީމް ކޯޓުންކަމަށް ކަނޑައަޅާފައި އޮތްނަމަވެސް ރައްޔިތުންގެ މަޖިލީހުން އިއްޔެވަނީ ސުޕްރީމް ކޯޓުގެ ރޫލިންއަށް ކަނޑައެޅިގެން ދެކޮޅުހަދައި، ކޯޓުގެ ހުރުމަތްކަނޑައި މަޖިލީހުގެ ބާރުހުރިކަން ދައްކައިފައެވެ. 
ރައީސުލްޖުމްހޫރިއްޔާ އަޒުކުރުމަށް ވޯޓްހަމަކުރާ މެންބަރުން ގުނާގޮތަށް އެމްޑީޕީން މަޖިލީހުގެ ގަވާއިދަށް ގެންނަން އުޅޭ އިސްލާހް ދުސްތޫރީ މައްސަލަތަކެއް ހުރިކަމަށް ބެލެވޭތީ ބަންޑާރަ ނާއިބް ހުށަހަޅުއްވާފައިވާ މައްސަލަ ބަލައި ނިމެންދެން އިސްލާހް ގެނައުން މަޑުޖައްސާލުމަށް ސުޕްރީމް ކޯޓުން އަމުރުކޮށްފައިވަނިކޮށް އިއްޔެ ރައްޔިތުންގެ މަޖިލީހުގެ ރައީސްވަނީ މަޖިލީހަށް އެއިސްލާހް ހުށަހަޅުއްވައިގެން އޭނާގެ ޕާޓީ އެމްޑީޕީއާއި ރައީސް ނަޝީދުގެ ޕާޓީ ޑިމޮކްރެޓުން ވޯޓްދީގެން އިސްލާހް ފާސްކޮށްފައެވެ. 
ސުޕްރީމް ކޯޓުގެ އަމުރަށް ތަބާނުވެ، އެކޯޓުގެ ހުރުމަތް ކަނޑާލައި ބޯހަރުކަމާއި ގޮތް ދޫނުކުރުން ކުރިއަށް ނެރެ، މިއިސްލާހް ފާސްކުރިޔަސް، އެ އިސްލާހްގެ މައްޗަށް ނަގާ ވޯޓަކުން ރައީސުލްޖުމްހޫރިއްޔާ އަޒުލުކުރެވިއްޖެކަމަށް ނިންމިއަސް، ދައުލަތުގެ އެހެން އެއްވެސް ބާރަކުން އިހްތިރާމް ނުކުރާނެކަން އެގުމުން ކުރިންވެސް ދަންނަވާލިހެން މިއަދު އެހުޅުވައިލީ އެހެން ދޮރެކެވެ. މިއީ އެމްޑީޕީން ކުރަން އުޅޭ ކަންކަމަށް ނަޝީދުގެ ތާއީދު ހޯދަން ރައްޔިތުންގެ މަޖިލީހުގެތެރެއިން ވެރިކަން ހިންގުމުގެ ނިޒާމާއި ކުޅެ ޕާލަމެންޓްރީ ނިޒާމެއްގެ ސޫރަ ޖައްސައިދިނުމަށް ކުރާ ކަމެކެވެ. ރައްޔިތުންގެ މަޖިލީހުން ވަކިކުރި ރައީސާއި ރައްޔިތުންގެ ތާއީދު ނެތި ފައިބާންޖެހުނު ރައީސް މިކަމުގައި އަތާއިއަތްގުޅުއްވައިގެން އުޅުއްވާކަމަށް ދޭހަވެއެވެ.

ކުރިއަށް އޮތީ ދިވެހި ގައުމަށް އުނދަގޫ ދަތި ދުވަސްތަކެއްކަމާއިމެދު އެއްވެސް ޝައްކެއް ނެތެވެ. ރައްޔިތުންގެ މަޖިލީހުގެތެރެއިން ބަޣާވާތެއް ގެނެސް ސަރުކާރު ވައްޓާލުމަށް ހިންގާ ހަރަކާތުން ބޮޑެތި ހަމަނުޖެހުންތަކެއް ހިނގައި މާލޭގެ އަމަންއަމާންކަންނ ގެއްލުވާލާނޭކަމާމެދު ސުވާލެއްވެސް ނެތެވެ.