މާލެ ސަރަހައްދުގައި ހަށިވިއްކުމުގެ ވިޔަފާރި ހިންގަމުންގެންދާ 111 ތަނެއް އެބަހުރިކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ހާމަކުރައްވައިފިއެވެ.
މިކަން ހާމަކޮށްފައިވަނީ "ހޯމް ޓީމް" ގެ ނަމުގައި އެ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާނެއެވެ.
ވަޒީރު އިހްސާނު ވިދާޅުވީ މާލޭގައި ހިންގާ ގިނަ ސެލޫންތަކާއި ސްޕާތަކުގައި ހަށިވިއްކަމުންދާ ކަމުގެ މައުލޫމާތު މިނިސްޓްރީއަށް ލިބިފައިވާ ކަމަށާއި، އެގޮތުން މިހާރުވެސް 111 ތަނެއް ފާހަގަކުރެވިފައިވާ ކަމަށެވެ.
"ހަށިވިއްކުމާއި މަސާޖު ޕާލާތަކުގެ ނަމުގައި މާލޭގައި ހިންގަމުންދާ ތަންތަނާއި ބެހޭގޮތުން މިކުރަމުންދާ ތަހުޤީގާއި ބެލެވޭ ބެލުންތަކުން ފާހަގަކުރެވިއްޖެ 111 ތަން މާލެ އާއި މާލެ ސަރަހައްދުގައި ހިންގަމުންދާކަން. މިގޮތަށް ސެލޫނުގެ ގޮތުގަ. އެހެންނަމަވެސް މިތާތެރޭގައި ޣައިރު ޤާނޫނީ އަމަލުތައް ހިންގަމުންދާކަން. އޭގެތެރޭގައި އަޅުގަނޑުމެން ފާހަގަކުރަން ހަށިވިއްކުމަށްޓަކައި ރާއްޖެއަށް ޓޫރިސްޓް ވިސާގަ ބޭރުޤައުމުތަކުން މީހުން އެތެރެކޮށް އެ މީހުން ބޭނުންކޮށްގެން ހަށިވިއްކުމުގެ ކަންކަން ހިންގަމުންދާކަން" މިނިސްޓަރު އިހުސާނު ވިދާޅުވިއެވެ.
މިއަދުގެ މި ނޫސްވެރިންގެ ބައްދަލުވުމުގައި ވަޒީރު ވިދާޅުވީ ހަށިވިއްކުމުގެ މަސައްކަތް ކުރަމުންދަނީ ރާއްޖެއިން ބޭރުން ގެންނަ އަންހެން މަސައްކަތްތެރިންނާއި ޓޫރިސްޓު ވިސާގައި މީހުން އެތެރެކޮށްގެން ކަމަށާއި މިގޮތަށް ހަށިވިއްކާ ފަރާތްތައް ވަގުތުން ޑީޕޯޓް ކުރުމުގެ މަސައްކަތް އެ ވުޒާރާއިން މިހާރު ކުރަމުން ގެންދާ ކަމަށެވެ.
މާލޭގައި ހަށިވިއްކުމުގެ ވިޔާފާރި ހިންގަމުން ގެންދާ ވާހަކައަކީ ނިމިދިޔަ ސަރުކާރުގައިވެސް ވަރަށް ގަދައަށް ދެކެވުނު ވާހަކައެއް ކަމުގައި ވީ ނަމަވެސް މިހާތަފްސީލްކޮށް މިވާހަކަ އާއްމުންނާއި ހިސާބަށް ކަމާއި ގުޅުން ހުރި ވުޒާރާއަކުން ހާމަކުރެއްވި މިއީ ފުރަތަމަ ފަހަރެވެ.
Advertisement
This content is created and paid for by advertisers and does not involve Voice Journalists
