ދިވެހިރާއްޖޭގެ އިޤްތިޞަދަށް މިއަހަރު %5.5 އިންސައްތައިގެ ކުރިއެރުމެއް ލިބިގެންދާނެ ކަމަށް މި ސަރުކާރުގެ އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
މިނިސްޓަރ ސައީދު މިފަދައިން ވިދާޅުވެފައި ވަނީ ކްރެޑިޓް ކާޑުތަކާއި ޑެބިޓް ކާޑުތަކުން ބޭރު ފައިސާ ނަގަން ކަނޑައަޅާފައިވާ މިންވަރު ކުޑަކުރުމަށް ތައްޔާރުވާ ކަމަށް ހަބަރުތައް ފެތުރުމާ ގުޅިގެން ރާއްޖޭގެ މާލީ ވުޒާރާއިން ނެރުނު ބަޔާން ރިޓުވިޓް ކުރައްވާ އެކްސްގައި ކުރެއްވި ޕޯސްޓެއްގައެވެ.
މި ޕޯސްޓުގައި މިނިސްޓަރ ސައީދު ވިދާޅުވެފައި ވަނީ މިހާރުގެ ރައީސުލްޖުމުހޫރިއްޔާ ޑރ.މުހައްމަދު މުއިއްޒު ރާއްޖޭގެ ވެރިކަމާއި ހަވާލުވެ ވަޑައިގެންނެވި އިރު ރާއްޖޭ ވައްޓާލައިފައިވަނީ މާލީގޮތުން ވަރަށް ނުރައްކާތެރި ހާލަތަކަށް ކަމަށެވެ. އެ ނުރައްކާތެރި މާލީ ހާލަތުން ސަލާމަތްކޮށް ދަރަނި އަދާކޮށް އަދި ނުދައްކާ ހުރި ބިލްތައް ދައްކަމުން އަންނަ ކަމަށް ވެސް ސައީދުގެ ޕޯސްޓުގައި ވިދާޅުވިއެވެ.
"މި އަހަރު އިންޝާ ﷲ. ރާއްޖޭގެ އިގްތިސާދު %5.5 ކުރިއެރުމެއް ލިބޭނެ. އެސްޑީއެފް އަށް ޑޮލަރު މިހާރު ވެސް އެބަ ޖަމާކުރަން،"
މިނިސްޓަރ ސައީދު ޕޯސްޓް ނިންމާލައްވަމުން ވިދާޅުވެފައި ވެއެވެ.
މިނިސްޓަރ ސައީދު މިފަދައިން ވިދާޅުވެފައި ވާއިރު މިއަދު ފިނޭންސް މިނިސްޓްރީން ނެރުނު ބަޔާނުގައި ބުނެފައިވަނީ ސަރުކާރުން ވެރިކަމާ ހަވާލުވިއިރުގައި ގައުމަށް ކުރިމަތިވެފައި ހުރި މާލީ ދަތިތަކުން އަރައިގަނެ، ރާއްޖޭގެ އިގްތިސާދީ ހާލަތަށް އަދި ރައްޔިތުންގެ ފުދުންތެރިކަމަށް ހެޔޮ ބަދަލެއް މި ސަރުކާރުން ގެނެސްދޭނެ ކަމުގެ ފުރިހަމަ ޔަގީންކަން ދިވެހި ރައްޔިތުންނަށް އަރުވާކަމަށެވެ.
މި ސަރުކާރުވެރިކަމާއި ހަވާލުވުމަށްފަހު ރާއްޖޭގެ މާލީހާލަތު ރަނގަޅުކުރުމަށްޓަކައި ހަރުދަނާ ފިޔވަޅުތަކެއް ގެންދަވަނީ އަޅުއްވަމުންނެވެ. އަދި ދުނިޔޭގެ ބޮޑަތި މާލީ ޢިދާރާތަކުން ވަނީ މި ސަރުކާރުގެ އިޤްތުޞާދީ އެޖެންޑާ ބަލައިގަންނަކަން ހާމަކޮށް އެ އެޖެންޑާއަށް ތައުރީފް ކުރައްވާފައެވެ.
Advertisement
This content is created and paid for by advertisers and does not involve Voice Journalists
