މޯލްޑިވިއަން ޑިމޮކްރެޓިކް ޕާރޓީ އެމްޑީޕީން ހުސްވެފައިވާ އެޕާރޓީގެ ރައީސްކަމުގެ މަޤާމަށް ކުރިމަތިލުމުގެ ފުރުޞަތު ހުޅުވާލައިފިއެވެ.
މިކަން ހާމަކޮށްފައިވަނީ އެޕާޓީގެ ފަރާތުން މިއަދު ކުރި އިއުލާނެއްގައެވެ. އެ އިއުލާނުގައި ބުނެފައިވަނީ އެ ޕާޓީގެ ރައީސްގެ މަޤާމުގެ އިންތިޙާބު އަންނަމަހުގެ 2 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ކަމަށާއި، އެ ޕާޓީގެ ރައީސް ކަމުގެ މަޤާމަށް ކުރިމަތިލުމަށް އެދޭ މެންބަރުންނަށް އެފުރުޞަތު މިއަދުން ފެށިގެން މި މަހުގެ 20 ވަނަ ދުވަހުގެ 14:00 އާއި ހަމައަށް ހުޅުވާލެވިފައިވާ ކަމަށެވެ.
މި އިއުލާނުގައި އިތުރަށް ބުނެފައި ވަނީ މިކަމަށްއެދޭ އެމްޑީޕީގެ މެމްބަރުން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންއިން ފުރިހަމަކޮށްފައިވާ ކުށާއި ދަރާނީގެ ރިކޯޑާއި އެކު ގޫގުލް ފޯމެއް ހުށަހެޅުމަށް އެދޭކަމަށެވެ.
އެމްޑީޕީގެ ރައީސްކަމުގެ މަޤާމް ހުސްވެގެން ދިޔައީ އެމްޑީޕީ އުފެއްދުމުގައި އިސްކޮށް އުޅުއްވި ކުރީގެ ރައީސުލްޖުމުހޫރިއްޔާ މުޙައްމަދު ނަޝީދާއި ނިމިދިޔަ ސަރުކާރުގައި ވެރިކަން ކުރެއްވި އަލްފާޟިލް އިބުރާޙިމް މުޙައްމަދު ޞާލިހް އާއި ދެބޭފުޅުންގެ ދެމެދުގައި ޖެހުނު މައްސަލައަކާއި ގުޅިގެން ރައީސް ނަޝީދު އެމްޑީޕީގެ ރައީސްކަމުގެ މަޤާމުން އިސްތިއުފާ ދެއްވުމާއި ގުޅިގެންނެވެ.
މިވަގުތު އެމްޑީޕީގެ ވަގުތީ ރައީސްއެއްގެ ގޮތުގައި ހުންނެވީވެސް ނިމިދިޔަ ސަރުކާރުގެ ރައީސުލްޖުމުހޫރިއްޔާ އިބްރާޙީމް މުހައްމަދު ޞާލިހެވެ.
Advertisement
This content is created and paid for by advertisers and does not involve Voice Journalists
