ރައީސުލްޖުމުހުރިއްޔާ ޑރ.މުހައްމަދު މުއިއްޒު، ތުރުކީވިލާތުގެ އަންކާރާގައި ރާއްޖޭގެ އެންބަސީއެއް މިއަދު ގާއިމު ކުރައްވައިފިއެވެ.
ތުރުކީވިލާތުގައި ރާއްޖޭގެ އެންބަސީއެއް ގާއިމު ކުރުމާއި ގުޅޭގޮތުން ރައީސުލް ޖުމުހުރިއްޔާގެ އޮފީހުން ވިދާޅުވީ ތުރުކީގައި ރާއްޖޭގެ އެމްބަސީއެއް ގާއިމު ކުރީ ރާއްޖެއާއި ތުރުކީއާ ދެމެދު އޮންނަ ގުޅުން މިހާރަށްވުރެ ފުޅާކޮށް، ދެ ގައުމުގެ ދެމެދުގައި އޮންނަ ސިޔާސީ، އިގުތިސާދީ، އަދި ސަގާފީ ގުޅުންތައް އިތުރަށް ކުރި އެރުވުމުގެ މަޤްޞަދުގައި ކަމަށެވެ.
ރައީސުލްޖުމުހޫރިއްޔާ ޑރ.މުހައްމަދު މުއިއްޒު މިއަދު ތުރުކީވިލާތުގައި ރާއްޖޭގެ އެންބަސީއެއް ގާއިމުކުރެއްވި އިރު އެމަނިކުފާނު ރާއްޖޭގެ ވެރިކަމާއި ހަވާލުވެ ވަޑައިގެންނެވުމަށް ފަހު އެންމެ ފުރަތަމަ ރަސްމީ ދަތުރުފުޅެއް ވެސް ކުރައްވާފައި ވަނީ ތުރުކީ ވިލާތަށެވެ.
ރައީސް ޑރ. މުހައްމަދު މުއިއްޒުގެ އެ ދަތުރުފުޅުގައި އެ ގައުމުގައި ދިރިއުޅެމުންދާ ދިވެހިންނާއި ބައްދަލުކޮށްލެއްވި ބައްދަލު ކޮށްލެއްވުމުގައި ދިވެހިންގެ ފަރާތުން، އެދިފައިވާ އެންމެ ބޮޑު އެއް އެދުމަކީވެސް ތުރުކީވިލާތުގައި ރާއްޖެގެ އެންބަސީއެއް ގާއިމްކޮށްދިނުމެވެ.
އެ ބައްދަލުކުރެއްވުމުގައި ރައީސް ޑރ. މުހައްމަދު މުއިއްޒު ވަނީ ރާއްޖޭގެ އެމްބަސީއެއް ތުރުކީވިލާތުގައި ހުޅުވުމަށްޓަކައި ކުރަންޖެހޭ މަސައްކަތްތައް ކުރައްވާނެކަމަށް ވިދާޅުވެފައެވެ.
ތުރުކީވިލާތާއި އެކު ރާއްޖެއިން ސިޔާސީ ގުޅުން ގާއިމްކޮށްފައި ވަނީ 28 މެއި 1979 ގައެވެ.
Advertisement
This content is created and paid for by advertisers and does not involve Voice Journalists
