މި އަހަރުގެ ތެރޭގައި ކ. މާފުށީގައި ޑޮލަރު އޭޓީއެމެއް ބެހެއްޓުމަށް ވަރަށް ބޮޑަށް މަސައްކަތް ކުރައްވާނެ ކަމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ. 

ރައީސް މުޢިއްޒު މިހެން ވިދާޅުވެފައި ވަނީ، ރައީސުލްޖުމުހޫރިއްޔާ އާއި ރައްޔިތުން ސުވާލު ކުރުމަށް ރައީސް އޮފީހުން ކުރިއަށް ގެންދާ ރައީސްގެ ޖަވާބު ގައި މާފުށީ، ޖަންބުމާގޭ އަހުމަދު ސަމީރު ކުރި ސުވާލު ތަކަށް ޖަވާބު ދެއްވަމުންނެވެ. 

އެގޮތުން ސަމީރު ވަނީ މާފުށީގައި ޑޮލަރު އޭޓީއެމެއް ބެހެއްޓޭނެ ތާރީޚަކާއި، އެރަށު ބިން ހިއްކުމުގެ މަޝްރޫޢުގެ އިތުރުން، ޑޮލަރު ލިބުމަށް ޢާއްމުންނަށް ދިމާވެފައިވާ ދަތިތައް ހައްލު ކުރެވޭނީ ކޮންއިރެއްގައިތޯ ސުވާލު ކޮށްފައެވެ.

އެއަށް ޖަވާބު ދެއްވަމުން ރައީސް މުޢިއްޒު ވިދާޅުވީ، މާފުށީގައި ޑޮލަރު އޭޓީއެމް ބެހެއްޓުމަކީ އެމަނިކުފާނު ވެވަޑައިގެންނެވި ވަޢުދުފުޅެއް ކަމަށާ، އެއީ ކޮންމެހެންވެސް ކުރަންޖެހޭ ކަމެއް ކަމަށެވެ. 

މިއާއެކު ރައީސް މުޢިއްޒު ވިދާޅުވީ، މާފުށީގެ ބިން ހިއްކުމަކީވެސް އެމަނިކުފާނު ވެވަޑައިގެންނެވި ވަޢުދުފުޅެއް ކަމަށާ، އެކަން މި އަހަރު ތެރޭގައި ފެއްޓޭނެ ކަމުގެ ޔަގީންކަން ނުދެއްވުނަސް، ވަރަށް އަވަހަށް، ވަރަށް އިސްކަމެއް ދެއްވައިގެން އެ މަސައްކަތް ފަށްޓަވާނެ ކަމަށެވެ. 

ރައީސް މުޢިއްޒު އިތުރަށް ވިދާޅުވީ، ޑޮލަރުގެ ތާށި ކަމަކީ އިގްތިޞާދަށް ގެންނަންޖެހޭ އިސްލާހުތައް ގެނެވުނުން ހައްލުވާނެ މައްސަލައެއް ކަމަށެވެ. އަދި އިންވެސްޓްމަންޓްތައް ގެނެވި، ރާއްޖޭގައި ބިޔަ ބޮޑެތި މަޝްރޫޢުތައް ހިންގެން ފެށުމުން ޑޮލަރު ތިޔާގި ވާނެ ކަމަށެވެ. އެއާއެކު ޑޮލަރު ލިބުން ފަސޭހަވެ އަވަސް ވާނެ ކަމަށެވެ.