މިނިސްޓްރީ އޮފް ޔޫތް އެމްޕަވަރމެންޓް، އިންފޮމޭޝަން އެންޑް އާޓްސްގެ ފަރާތުން ހަފްތާ ބަންދުގެ ހުކުރު ދުވަހު ޒުވާނުންގެ މަރުކަޒުގައި "ފަންނީ އުފާ" ގެ ނަމުގައި ޕްރޮގްރާމެއް ބޭއްވުމަށް ހަމަޖައްސައިފިއެވެ.
މިކަން ހާމަކޮށްފައިވަނީ އެމިނިސްޓްރީގެ ފަރާތުން ސޯޝަލްމީޑިއާގައި އާއްމުކުރި ކުރު ވީޑިއޯއެއްގައެވެ.
މި ވީޑިއޯގައި އެމިނިސްޓްރީގެ ޑެޕިއުޓީ މިނިސްޓަރ މުޙައްމަދު އަސީލް ވިދާޅުވީ "ފަންނީ އުފާ" ޕްރޮގްރާމުގައި ބޮޑަށް އިސްކަންދޭނީ 18 އަހަރާއި 35 އަހަރާއި ދެމެދުގެ ޒުވާނުން ބާރުވެރި ކުރުވުމަށާއި، ޒުވާނުންގެ ހުނަރުތައް ދައްކާލުމަށް ޕްލެޓްފޯމެއް ހުޅުވާލަ ދިނުމަށް ކަމަށެވެ.
ޑެޕިއުޓީ މިނިސްޓަރ އިތުރަށް ވިދާޅުވި ގޮތުގައި މި ޕްރޮގްރާމް ކުރިއަށް ގެންދިއުމަށް ހަމަޖެހިފައި ވަނީ ދެދަންފަޅިއަކަށް ބަހާލައިގެންނެވެ. އެގޮތުން ހަވީރު ދަންފަޅީގައި ކުރިއަށް ގެންދެވޭނީ ކުޑަކުދިންނާއި ގުޅުންހުރި ހަރަކާތްތައް ކަމަށާއި ރޭގަނޑު ޚާއްސަ ވެގެންދާނީ ސްޓޭޖް ޕަރފޯމެންސްތަކަށް ކަމަށެވެ.
ހަރަކާތްތައް ކުރިއަށްދާއިރު ސޯޝަލް ސެންޓަރުގައި ބެހެއްޓިފައި ހުންނަ ސްޓޯލްތަކުން ޒުވާން ފަންނުވެރިންގެ "ފައިން އާޓް"، "ލައިވް އާޓް" އަދި ޕާރފޯމިންގ އާޓް ވެސް ފެނިގެންދާނެކަމަށް އަސީލް ވިދާޅުވިއެވެ. އޭގެ އިތުރުން ރޭގަޑު ޒުވާނުންނަށް ހާއްސަކުރެވިގެން ކުރިއަށް ގެންދާ އިވެންޓުގައި ބޮޑުބެރާއި ، ލައިވް މިޔުޒިކު ހިމެނޭނެކަމަށް ވެސް އަސީލް ވިދާޅުވިއެވެ.
"ހުރިހާ ޒުވަނުންވެސް މިތަނަށް އަންނާތި ، މިތަނުން ބައިވަރު ފުރުސަތުތައް ލިބިގެން ދާނެ" ޑެޕިއުޓީ މިނިސްޓަރ މުޙައްމަދު އަސީލް ވިދާޅުވިއެވެ.
މިނިސްޓްރީގެ ވީޑިއޯ ނިންމާލަމުން އަސީލް އެދިލެއްވީ ޒުވާނުންނަށް ހުޅުވާލާ މި ރަނުގެ ފުރުސަތުގެ ބޭނުން ވީހާވެސް ގިނަ ޒުވާނުން ހިފައި، ހުކުރުދުވަހުގެ ޕްރޮގްރާމްގައި ހުރިހާ ޒުވާނުން ވެސް ބައިވެރިވުމަށެވެ.
Advertisement
This content is created and paid for by advertisers and does not involve Voice Journalists
