ކުރިއަށް އޮތް ރަމަޟާންމަހު މާލޭ ނޫރު މިސްކިތުގައި އިމާމުވެ ތަރާވީހް ނަމާދު ކޮށްދެއްވާނީ އުމުރުން އެންމެ 11 އަހަރުގެ އަލްހާފިޒް އިޒްކާން އަޖީބު ހުސެއިން ކަމަށް އިސްލާމިކް މިނިސްޓްރީން އިއުލާނު ކުރައްވައިފިއެވެ.
މިކަން ހާމަކޮށްފައި ވަނީ އިސްލާމިކް މިނިސްޓްރީން މިއަދު އެކްސް މެދުވެރިކޮށް ކުރެއްވި ޕޯސްޓެއްގައެވެ.
އެ ޕޯސްޓުގައި ބުނެފައިވަނީ އަންނަ އަހަރުގެ ރަމަޟާން މަހު ނޫރު މިސްކިތުގައި އިމާމުވެ ތަރާވީހް ނަމާދުކުރާނީ، އުމުރުން އެންމެ 11 އަހަރުގެ އަލްހާފިޒް އިޒްކާން އަޖީބު ހުސެއިން ކަމަށް އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސަޢީދު ނިންމަވާފައިވާ ކަމަށެވެ.
މިނިސްޓްރީގެ ފަރާތުން މިފަދައިން ޕޯސްޓެއް ކުރެއްވި އިރު އިސްލާމިކް މިނިސްޓަރ ޑރ. ޝަހީމްވެސް ވަނީ އުމުރުން އެންމެ 11 އަހަރުގެ އަލްހާފިޒް އިޒްކާން އާއި ގުޅޭގޮތުން އެކްސްގައި ޕޯސްޓެއް ކުރައްވާފައެވެ.
އެ ޕޯސްޓުގައި މިނިސްޓަރ ވިދާޅުވެފައި ވަނީ އިޒްކާން ވަނީ ގުރުއާން ހިތުދަސްކޮށް ނިންމާފައި ކަމަށާއި، ހާފިޒު ކަމުގެ ސަނަދު ހާސިލްކުރުމަށް ފަހު މަންމަ އާއި ބައްޕައާ އެކު އިޒްކާން ވަނީ މިނިސްޓަރާއި ބައްދަލު ކުރައްވާފައި ކަމަށެވެ.
" އުމުރުން 11 އަހަރު. އިޒްކާން ކީރިތި ޤުރުއާން ހިތުދަސްކޮށް އިމްތިހާނު ހަދައި ނިންމުމުން އޭނާއާއި އޭނާގެ މަންމައާއި ބައްޕައާއި ބައްދަލުކޮށްލުމަކީ އުފާވިކަމެއް. އިޒްކާން އެދުނީ ރޯދަ މަހު އިމާމުވެ ތަރާވީސްކުރުމުގެ ފުރުޞަތު ދެއްވުމަށް. އިންޝާ ﷲ ފުރުޞަތު ލިބިގެންދާނެ."
އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސަޢީދުގެ ޕޯސްޓުގައި ވިދާޅުވެފައި ވެއެވެ.
މިނިސްޓްރީން މިއަދު މިފަދައިން އިޢުލާން ކުރައްވާފައި ވާއިރު ދާދިފަހުން މިނިސްޓްރީން ވަނީ ސްކޫލްތަކުގެ ގްރޭޑް 10 ން މަތީގެ ދަރިވަރުންނަށް އިމާމުވެ ހުކުރު ކުރުމުގެ ފުރުޞަތު ދިނުމަށް ނިންމަވާފައެވެ. އަދި އެކަމަށް ޝަޢުޤުވެރިކަން ފާޅުކުރި ކުދިންނަށް ތަމްރީނުވެސް ދޭން ފަށާފައެވެ.
Advertisement
This content is created and paid for by advertisers and does not involve Voice Journalists
