މާލެއާއި ރާއްޖޭގެ އަތޮޅުތަކުގައި އެއްގަމުގައި ދުއްވާ އުނޅަދު ފަހަރުތައް ދުއްވޭނެ އަދަދާއި، އަދި އުނޅަދުތައް ބޭނުންކުރެވޭނެ މުއްދަތު ކަނޑައަޅާ ޤަވާއިދު މުރާޖައާކޮށް ބަދަލު ގެނެސް ކުރިއަށް އޮތް 10 ދުވަސްތެރޭ ގެޒެޓުކުރެވޭނެކަމަށް ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

މިނިސްޓަރ އަމީން މިފަދައިން ވިދާޅުވެފައި ވަނީ އެއްގަމު އުޅަނދުގެ ސަބަބުން މަގުތައް ތޮއްޖެހުމުގެ މައްސަލައަށް ހައްލު ހޯދުމުގެ ޕްރޮގްރާމު އިފްތާހުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.

ވަޒީރު ވިދާޅުވީ މި ޤަވާއިދަކީ މަގުތައް ތޮއްޖެހުމުން ސަލާމަތްކުރުމަށް ވަރަށް މުހިއްމު ޤަވާއިދަކަށް ވާއިރު މި ޤަވާއިދުން މުރާޖައާކޮށް އަލުން ނެރުމަށް 2 މަސްދުވަސް ހޭދަވާނެކަމަށް ކުރިން އަންދާޒާކުރެވުނު ނަމަވެސް މިހާރު މަސައްކަތް ގޮސްފައިވާ ހިސާބުން 10 ދުވަސްތެރޭ ޤަވާއިދު ގެޒެޓްކުރެވިގެންދާނެ ކަމަށެވެ.

Advertisement

ރާއްޖޭގައި ވެހިކަލް ތޮއްޖެހުން އެންމެބޮޑީ މާލެ ސިޓީގައި ކަމަށްވީ ނަމަވެސް ރާއްޖޭގެ ބޮޑަތި ސިޓީތަކާއި އަދި އާބާދީ ބޮޑަތި ރަށްތަކުގައި އެއްގަމު އުނޅަދުފަހަރު ގިނަވުމުގެ ސަބަބުން، އެފަރާތްތަކުންވެސް އަންނަނީ އުނޅަދު ލިމިޓްކުރުމުގެ ކަންތައްތައް ކުރިއަށް ގެންދަމުންނެވެ.

މާލެސިޓީ ކައުންސިލުން މިހާރު ނިންމާފައި ވަނީ މާލޭގައި އެއްގަމުލީ އުނޅަދުތައް ދުއްވޭނެ ލިމިޓަކާއި، އުނޅަދު ދުއްވޭނެ މުއްދަތެއް ކުރިއަށް އޮތް 6 މަސްދުވަހުގެ ތެރޭ ކަނޑައެޅުމަށެވެ.

އެއްގަމު ދަތުރުފަތުރުގެ ޤާނޫނުގައިވާ ގޮތުން ރަށެއްގައި ނުވަތަ ސިޓީއެއްގައި  ނޫންނަމަ ސަރަހައްދެއްގައި އެއްގަމު އުޅަނދު ރަޖިސްޓްރީކޮށްދޭނެ އަދަދާއި ރަޖިސްޓްރީކުރާ އުޅަނދުގެ އުމުރުވެސް ކަނޑައަޅަން ޖެހޭނީ އެރަށެއްގެ ނުވަތަ ސިޓީއެއްގެ ކައުންސިލުންނެވެ.