މިކެއްސުމެއް ނުހުއްޓުނެވެ. މިރޯގާއެއް ނުފިލިއެވެ. މިހުމަކުން އަރައިނުގަތެވެ. އަހަރެން އެކަންޏެއް ނޫނެވެ. އަނބިމީހާއި ދަރިންވެސް މެއެވެ. ކެއްސަމުން ކެއްސަމުންގޮސް ބައެއް ފަހަރު ހޯއް ގޮވެން އުޅޭހެން ވެސް ހީވެއެވެ. ހޯއްގޮވާ ކެއްސުން ބަލި މިހާރު ރާއްޖޭގައި އުޅޭކަމަށް ކިޔައެވެ.

ޑޮކްޓަރަށް ދެއްކީމާ ބުނަނީ ތީ ދެން މިހާރު ވަރަށް ގިނަ މީހުން އުޅޭހާލެވެ. ކޮފްސިރަޕަކަށް ނުގުޑައެވެ. ޕެނަޑޯލަކަށް މަތައެއް ނުވެއެވެ. ސިޓިރެޒިންދޭތާ ހަފްތާއެއްވެގެންދިޔައިރުވެސް ދަރިފުޅުގެ ރޯގާއަށް އެނގުމެއް ނުވެއެވެ. މިއީ އަހުރެންގެ އާއިލާގެ އެކަނިހާލެއް ނޫނެވެ. ސްކޫލްތަކުން ދިމާވާ ޕޭރަންޓުންގެވެސް ޝަކުވާއެވެ. މިސްކިތަކަށް އަރައިފިއްޔާ ފަރާތްފަރާތުން އިވެނީ ކެއްސުމުގެ އަޑެވެ.

ދާދިފަހުން ހެލްތު މިނިސްޓްރީގެ އިސްބޭފުޅުންކޮޅަކާއެކު ސައެއްގައި އިނދެގެން މިވާހަކައެއް ދެކެވިގެން ގޮސް އެންމެފަހުން އެމީހުންނަށް ބުނެވުނީ އަހުރެންގެ ހިތުގައި ޝައްކު އުފެދިގެން އުޅުނު ކަންތަކެވެ. ހެލްތު މިނިސްޓްރީތެރެ އޮތީ މެޑިކަލް މާފިއާއިން ފަތަހަކޮށްފައެވެ.

މެޑްޓެކެއް، މެޑްއިކްއިޕެއް، މެޑިޕްލަސެއް، އޭޑީކޭ ހޮސްޕިޓަލެއް ކިޔާނެ ކަމެއް ނެތެވެ. މިތަންތަނުގެ ފަރާތުން ރެޕްރެޒެންޓެޓިވުންގެ ދަރަޖައިގައި މަސައްކަތްކުރާފަދަ ސްޓާފުން ހެލްތު މިނިސްޓްރީގެތެރޭގައި ވަޒީފާގައި އުޅެއެވެ.

ތަންކޮޅެއް ކުރިން ރައީސް ޔާމީންގެ ސަރުކާރުގައި ރައްޔިތުންގެ މަޖިލީހުގެ މިހާރުގެވެސް މެންބަރަކާއި ކުރީގެ މެންބަރަކު ގުޅިފައި އޮންނަ މިފަދަ ކުންފުންޏަކަށް އައިޖީއެމްއެޗަށް ސަޕްލައިކުރަންޖެހޭ ޚާއްސަ އިންޖެކްޝަނެއް އޭގެ އަގު އެތައް ގުނައެއް ބޮޑުކޮށް އައިޖީއެމްޗަށް ވިއްކާކަން ހެލްތު މިނިސްޓަރ މަރިޔަމް ޝަކީލާއަށް ފާހަގަ ކުރެއްވިގެން އެކަން ހުއްޓުވުމަށް މަސައްކަތްކުރެއްވުމުން އެކަމަނާގެ ވަޒީފާ ގެއްލިގެންދިޔައެވެ.

ރައީސް އިބްރާހީމް މުހައްމަދު ސާލިހްގެ ސަރުކާރުގައި ފެންމަތިވީ ވެންޓިލޭޓަރު ވައްކަމެވެ. ހެލްތު މިނިސްޓްރީގެ އަޅުގަނޑާއި ވާހަކަ ދެއްކެވި ބޭފުޅުން ވިދާޅުވާގޮތުން ރާއްޖޭގެ މެޑިކަލް މާފިއާ އޮންނަނީ ޑަބްލިޔުއެޗްއޯފަދަ އޭޖެންސީތަކުގެ މީހުންނާއިވެސް ގުޅިފައެވެ.

ރައީސް އިބްރާހީމް މުހައްމަދު ސާލިހް ދިވެހިރައްޔިތުންނާ މުޚާތަބު ކުރެއްވި ކުރެއްވުމެއްގައި އަގުހެޔޮކޮށް ދިވެހިރާއްޖެއަށް ބޭސް ހޯއްދެވުމުގައި ކާމިޔާބުތަކެއް ހޯއްދެވިކަމަށް ވިދާޅުވިއެވެ. ދެން އިވުނީ ރާއްޖެއަށް އެތެރެކޮށް ވިއްކަމުންދިޔަ ކުޑަކުދިންގެ ކޮފްސިރަޕަކުން ވިހަމާއްދާއެއް ހުރެގެން މަނާކުރި ވާހަކައެވެ. އަދި އަހަރެމެން އާއްމުކޮށް މިކާ ޕެނަޑޯލްގެ ފެންވަރު ދަށްކަމުން ފުނޑިފައި ހުންނާތީ އެވެސް މަނާކުރި ވާހަކައެކެވެ. އޭޑީކޭއާއި އެހެންވެސް ޕްރައިވެޓް ކްލިނިކްތަކާއި ރަށްރަށުގެ ހަސްފަތާލުތަކަށް ގެންނަ ޑޮކްޓަރުންގެތެރެއިން ފެންވަރު ދަށްވެގެން ފޮނުވާލެވޭ ޑޮކްޓަރުން ނުވަތަ ފޭކް ޑޮކްޓަރުންވެސް އެހާމެ ގިނައެވެ. އާއްމުގޮތެއްގައި ހެލްތު މިނިސްޓްރީއަށް މައްސަލައެއް އެގޭއިރު ޑޮކްޓަރު ހުންނަނީ ކޮންމެވެސް ގޮތަކުން ފުރުލާވާފައެވެ. އެކަންކަން ހެލްތު މިނިސްޓްރީގެތެރެއިން އޮއްބާލައެވެ.

ރާއްޖޭގެ މެޑިކަލް މާފިއާ ހަރަކާތްތައް ހުންނަނީ ވަރަށް ދުރަށް ރާވާފައެވެ. ރިޔާސީ އިންތިޚާބުގައި ދެކޮޅަށް ލާރިއަޅައެވެ. ކޮންމެ މީހަކު ރައީސްކަމަށް ހޮވުނަސް އެމީހެއްގެ ފަހަތަށް ވަދެ ތިބެނީ ރަނގަޅަށް ފައިހަރުކޮށްގެންނެވެ. އެސަރުކާރަކަށް ޖެހިފައި އޮންނަނީ ދައުލަތުގެ ސިއްހީ ބަޖެޓް އެމީހުންގެ ހިތަކަށް ހުޅުވައިލާފައި ބާއްވާށެވެ.

އިހަށް ދުވަހު ހެލްތު މިނިސްޓްރީން ބޭއްވި ބައްދަލުވުމަކަށް އޭޑީކޭގެ ޑޮކްޓަރ ނާއިފް ދުރުވީ އޭނާގެ ޖީބަށް ފައިލޭރިއާ ޓެސްޓް ކިޓެއް ލައިގެންނެވެ. ބައްދަލުވުމުގެތެރޭގައި އެޓެސްޓްކިޓް ނަންގަވައި ދައްކަވައިލައްވަމުން އޭނާ މިސާލެއް ޖެއްސެވިއެވެ.

ޑޮކްޓަރ ނާއިފް ޖެއްސެވި މިސާލު ކޮންފަރެންސްގެ ހެލްތު މިނިސްޓްރީގެ އޮފިޝަލުންނަށް އަންޑަސްޓޭންޑްވިއެވެ. އެއީ ރާއްޖޭގައި ފައިފަލަބަލި ޓެސްޓްކުރަން މުޅި ރާއްޖޭގައި ހިންގާ ހަރަކާތަށް ބޭނުންވާ މެޑިކަލް ސާމާނު އެތެރެކުރަން ހަމައެކަނި މެޑްޓެކާއި ހަވާލުކުރިއިރު އެހެން މީހުންނަށްވެސް ކޮލިޓީ ސާމާނު ގެނެވެން އޮތްކަން ދައްކަވައިދެއްވުމެވެ. އެވާހަކައަށް ހެލްތު މިނިސްޓްރީގެ ބޭފުޅުންނަށް ހެވުނީއެވެ. އެނޫންގޮތެއް ނެތީއެވެ.

ކޮންމެއަކަސް މިއީ އަކީ ކޮންމެހެން ރާއްޖޭގެ މެޑިކަލް މާފިޔާގެ ބާރާއި މުއްސަނދިކަން ހޯދަމުންދާގޮތުގެ ތެރެއަށް ވަންނަން އުޅެނީ އަކީ ނޫނެވެ.

ސަރުކާރުން މެޑިކަލް މާފިޔާ އަޑީދައުލަތަކަށް ހަދައި ދައުލަތުގެ ބަޖެޓް ހިތަކަށް އެމީހުންނަށް ހުޅުވާލާފައި ބައްވައިގެން އެމީހުންގެ އަތުން ވިހައެކުލެވޭ ބޭސްތަކާއި ފެންވަރު ދަށް ބޭސް އޭގެ އަސްލުއަގަށްވުރެ އެތައްގުނައެއް ބޮޑު އަގުގައި އެސްޓީއޯއަށާއި ސަރުކާރަށް ގަނެގެން އަހަރެމެންނަށް އެބޭސް ކާންދީހަދާތާ އެތައް އަހަރުތަކެއް ފަހުން މިއަދު ރައްޔިތުން މިތަޖުރުބާ ކުރަނީ އޭގެ އަފްޓަރ ޝޮކެވެ. ދިފާއީ ނިޒާމު ގަޑުބަޑު ވެއްޖެއެވެ. ސްޓްރޯކް ޖެހޭ ޒުވާނުން އިންތިހާއަށް އިތުރުވެއްޖެއެވެ. ކެންސަރުބަލި އެހާމެ ގިނައެވެ. އެންމެ އާދައިގެ ރޯގާ ހުމެއްވެސް މިހާރަކު ބޭހަކުން ނުފިލައެވެ.

މިވާހަކަ ލިޔަމުންދާއިރުވެސް ކެއްސަނީއެވެ. މިކެއްސުމެއް ނުހުއްޓެއެވެ. މިރޯގާއެއް ނުފިލިއެވެ.